Read Uzbek Muqaddas Kitob Yeremiyo 9 Bible Online

Yeremiyo 9 - Uzbek Muqaddas Kitob bible

Yeremiyo 9

¹Koshkiydi, boshim bir buloq boʻlsa, Koʻzlarim yoshlar chashmasi boʻlsa. Xalqim halokatga uchragani uchun, Kechayu kunduz yigʻlagan boʻlar edim!

²Qaniydi, sahroda bir qoʻnolgʻam boʻlsa, Men xalqimni tark etgan boʻlardim, Ularning orasidan chiqib ketardim! Axir, ularning hammasi zinokor, xoinlar toʻdasidir.

³Egamiz shunday demoqda: “Xalqim tillarini kamon kabi qayirib, Yolgʻon soʻzlarni oʻqdek otishadi. Xalqim nohaqlik qilib, yurtda kuchayib bormoqda, Yomonlik ketidan yomonlik qilmoqda, Ular Meni tan olmaydilar.

⁴Qoʻshningizdan ehtiyot boʻling, Qarindoshingizga ishonmang. Hamma qarindoshingiz yolgʻonchi[64], Hamma qoʻshningiz tuhmatchi.

⁵Qoʻshni qoʻshnisini aldaydi, Birontasi toʻgʻri gap gapirmaydi. Tili yolgʻon gapirishga oʻrganib qolgan. Holdan toyguncha gunoh qilishadi.

⁶Ey Yeremiyo, sen yolgʻonchilar orasida yashayapsan, Ular yolgʻonlari dastidan Meni tan olishni xohlamayaptilar.” Egamizning kalomi shudir.

⁷Shu sababdan Sarvari Olam demoqda: “Men xalqimni sinovdan oʻtkazib, poklayman. Ularni boshqa nima ham qilar edim?!

⁸Ularning tili halokat keltiradigan oʻqqa oʻxshaydi, Ogʻzidan faqat yolgʻon soʻzlar chiqadi. Qoʻshnilariga shirin gapirishadi, Ichlarida esa ularni tuzoqqa tushirmoqchi boʻlishadi.

⁹Shunday ekan, bu qilmishlari uchun ularni jazolamaymi?! Shunday bir xalqdan oʻch olmaymi?!” Egamizning kalomi shudir.

¹⁰Men togʻlar uchun faryod qilib, yigʻlayman, Dashtdagi yaylovlar uchun marsiya aytaman, Chunki yaylovlarning hammasi qurib qolgan. U yerdan hech kim oʻtmaydi, Sigirlarning ma’rashi eshitilmaydi. Qushlaru hayvonlar bu yerlarni tark etgan.

¹¹Egamiz shunday dedi: “Men Quddusni vayron qilaman, Bu yerni chiyaboʻrilarning makoniga aylantiraman. Yahudo shaharlari huvullab qoladi, U yerda bironta ham odam qolmaydi.”

¹²Men Egamizdan soʻradim: — Ey Egam, nechun bu yurt shu qadar vayron boʻlib ketdi? Nechun sahro kabi huvullab qoldi? U yerda bironta ham sayyoh koʻrinmaydi. Qaysi farosatli odamning bunga aqli yetadi?! Sen bularni kim orqali xalqqa yetkazasan?

¹³Egamiz shunday javob berdi: — Men xalqimga qonunlar bergan edim, lekin ular rad etdilar, Menga itoat etmadilar, qonunlarimga rioya qilmadilar.

¹⁴Aksincha, yuraklarining oʻjarliklariga itoat qildilar, ota — bobolari oʻrgatgandek Baalga sigʻindilar.

¹⁵Shuning uchun Men bu xalqqa achchiq oʻtdan yedirib, zaharli suvdan[65] ichiraman, — deb aytmoqda Isroil xalqining Xudosi — Sarvari Olam. —

¹⁶Oʻzlari va ota — bobolari bilmagan xalqlar orasiga Men ularni tarqatib yuboraman. Ularning ketidan qilich joʻnatib, qirdirib tashlayman.

¹⁷Sarvari Olam shunday demoqda: “Endi quloq soling! Yigʻichi ayollarni[66] chaqirib keling, Ularning eng mohirlari kelsin.”

¹⁸Xalq shunday dedi: “Ularga ayting, tezroq kelsin. Biz uchun marsiya aytishsin, Koʻzimizdan yoshlar oqsin, Kipriklarimizdan suvlar toʻkilsin.

¹⁹Ana, Quddusdan[67] faryod eshitilmoqda: «Xonavayron boʻldik! Qanday sharmandagarchilik! Yurtimizni tark etishga majburmiz, Uylarimiz vayron boʻldi.»”

²⁰Ey ayollar, Egamizning soʻzini eshiting, Uning ogʻzidan chiqqan har bir soʻziga quloq soling. Qizlaringizga marsiya aytishni oʻrgating, Bir — biringizga yigʻi qoʻshigʻini yodlating.

²¹Ana, derazalardan oʻlim oʻrmaladi, Qal’alarimizga kirib oldi. Koʻchalardagi bolalarni yoʻq qilib tashladi, Maydonlardagi yoshlarni qirib yubordi.

²²Ey ayollar, sizlar ayting: “Egamiz shunday demoqda: «Odamlarning jasadlari yotadi Daladagi goʻng kabi Oʻroq solingan bugʻdoy kabi, Ularni hech kim yigʻishtirib olmaydi.»”

²³Egamiz shunday deb aytmoqda: “Donolar donoligi bilan maqtanmasin. Kuchlilar kuchi bilan maqtanmasin. Boylar boyligi bilan maqtanmasin.

²⁴Kim maqtanmoqchi boʻlsa, Egamizni bilaman, deb maqtansin, Egamizni tushunaman, deb maqtansin. Men Egangizman. Men mehr — shafqat koʻrsataman, yer yuzida adolatu haqiqat ila ish tutaman. Bunday qilishdan Men zavqlanaman.” Egamizning kalomi shudir.

²⁵Egamiz demoqda: “Shunday kunlar keladiki, badani sunnat qilingan, ammo yuragi sunnat qilinmagan odamlarning[68] hammasini Men jazolayman.

²⁶Ha, Men Misrliklarni, Edom naslini, Ommon xalqini, Moʻabliklarni, sochini oldirib yuradigan[69] choʻl qabilalarining hammasini[70] va ular bilan birga Oʻz xalqim Yahudoni jazolayman. Aslida, bu xalqlarning hammasi sunnatsiz, ularning yuragi sunnat qilinmagan.”