Read Uzbek Muqaddas Kitob Marsiya 3 Bible Online

Marsiya 3 - Uzbek Muqaddas Kitob bible

Marsiya 3

¹Azoblarda qolgan insonman, Xudoning gʻazabi tufayli tayoq yedim.

²Boshlab bordi Egam meni zulmatga, Nur tushmaydigan qorongʻi joyga.

³Yolgʻiz menga qarshi U qoʻl koʻtardi, Kun boʻyi meni qayta — qayta jazoladi.

⁴Qaritib yubordi etu terimni, Sindirib tashladi suyaklarimni.

⁵Gʻam — alamga meni tutqun qildi, Jabru jafo zindoniga meni tashladi.

⁶Majbur qildi meni zimistonda yashashga, Oʻxshab qoldim men ancha oldin oʻlgan odamga!

⁷Qochib ketmasin deya, Xudo atrofimni qurshadi, Ogʻir zanjirlar bilan meni kishanband etdi.

⁸Yordam soʻrab yolvorsam ham men Unga, Quloq solmas U mening figʻonimga.

⁹Yoʻnilgan toshlar bilan U yoʻlimni toʻsdi, Yurgan yoʻlimni chalkashtirib yubordi.

¹⁰Poyladi U meni ayiqday, Tashlanmoqchi boʻldi menga sherday.

¹¹Soʻng meni sudradi bir chetga, Gʻajidi, solib ketdi tang ahvolga.

¹²Xudo Oʻz yoyini tortdi, Oʻqlariga meni nishon qildi.

¹³Sadogʻidagi oʻqlari bilan yuragimni teshdi.

¹⁴Mana endi oʻz xalqim ustimdan kulmoqda, Uzzukun ular meni mazax qilib, qoʻshiq kuylamoqda.

¹⁵Xudo menga achchiq oʻtdan yedirdi, Zaharli suvdan menga ichirdi.

¹⁶Meni oyoq osti qilib, tuproqqa beladi, Shagʻal yedirib, tishlarimni sindirdi.

¹⁷Tinchlik bilmas endi mening jonim, Baxt nimaligini tamom unutdim,

¹⁸Shunda oʻzimga dedim: “Adoyi tamom boʻldim! Barbod boʻldi Egamga boʻlgan umidim!”

¹⁹Kulfatu sargardonlik haqidagi oʻylarim Zaharli suvga, achchiq oʻtga oʻxshaydi.

²⁰Bunday oʻylarga tolgan mening jonim Tushkunlikka tushdi.

²¹Biroq men bir narsani yodda tutarman, Shuning uchun doim umid qilarman:

²²Egamning sodiq sevgisi boʻlmaydi ado[20], Uning rahmu shafqati tugamas aslo.

²³Har tong ular yangilanadi, Buyukdir Egamning sadoqati!

²⁴Qalbimda aytaman: “Egamdir mening bor — yoʻgʻim, Shunday ekan, yolgʻiz Undadir mening umidim.”

²⁵Egamiz Oʻziga umid bogʻlaganlarga yaxshilik qiladi, Unga intilgan har bir jonga ezguligini koʻrsatadi.

²⁶Egamizning najotini toqat ila kutish yaxshidir.

²⁷Yoshlikdan tarbiyaga boʻysunish yaxshidir.

²⁸Rabbiy tarbiyalaganda, Yolgʻiz oʻtirib, sukut saqlaylik.

²⁹Bunday vaqtlarda yer oʻpib ta’zim qilaylik, Axir, yana umid bordir.

³⁰Tarsaki yeganimizda qarshilik qilmaylik, Eshitgan koʻp haqoratlarni ichimizga yutaylik.

³¹Zero, Rabbiy bizni abadiy tashlab qoʻymaydi!

³²Uning Oʻzi bizga qaygʻu keltirgan boʻlsa — da, Oʻzi bizga rahm — shafqat qiladi. Axir, Uning sodiq sevgisi buyukdir!

³³Ha, U insonga gʻam keltirib, ozor berishni xush koʻrmaydi.

³⁴Yurtdagi hamma asirlarning oyoq osti boʻlganini,

³⁵Odamlar haq — huquqdan mahrum boʻlganini Xudoyi Taolo koʻrib turibdi.

³⁶Bir yoqlama hukm chiqarilganini Rabbiy bilib turibdi.

³⁷Rabbiyning ijozatisiz, Hech kimning buyrugʻi bajo boʻlmas.

³⁸Yaxshilik ham, yomonlik ham Xudoyi Taoloning amrisiz sodir boʻlmas.

³⁹Hanuz hayot ekanmiz, Gunohimiz uchun jazo tortganda nolimaylik!

⁴⁰Tutgan yoʻllarimizni yaxshilab tekshiraylik, Egamizga qaytaylik.

⁴¹Qoʻllarimizni osmonga choʻzib, Chin dildan samodagi Xudoga yolvorib aytaylik:

⁴²“Ey Egamiz! Biz itoatsizlik qildik, Senga qarshi bosh koʻtardik, Sen bizni kechirmading.

⁴³Sen gʻazabga minib, ta’qib qilding bizni, Shafqatsiz qirding hammamizni.

⁴⁴Iltijolarimiz Senga yetib bormasligi uchun Bulutlar bilan oldingni toʻsding.

⁴⁵Sen bizni axlatday tashlab yubording, Xalqlar orasida supurindiday qilding.

⁴⁶Mana, barcha yovlarimiz ustimizdan kulyapti.

⁴⁷Biz vahimaga tushdik, tuzoqqa ilindik, Falokatu halokatga giriftor boʻldik.”

⁴⁸Sel — sel boʻlib oqar mening koʻz yoshlarim, Axir, qirilib ketdi mening xalqim!

⁴⁹Egamiz samodan bizga qaramaguncha, Men toʻxtamay obi diyda qilaman, Tinmay koʻz yosh toʻkaman.

⁵⁰

⁵¹Quddusdagi hamma qizlarning qismati Yurak — bagʻrimni ezib yubordi!

⁵²Sababsiz dushmanlik qilayotir menga odamlar, Qushni ovlaganday meni ovladi ular.

⁵³Meni tiriklayin chuqurlikka tashlashdi, Chuqurlik ogʻzini tosh bilan berkitishdi.

⁵⁴Suvlar koʻtarilib oshdi boshimdan, “Ado boʻldim” dedim ichimda.

⁵⁵Ey Egam, chuqurlik tubidan Senga iltijo qildim.

⁵⁶“Dodimni tingla, berkitma qulogʻingni!” dedim. Sen eshitding bu iltijoimni.

⁵⁷Yolvorganimda Sen menga yaqinlashding, “Qoʻrqma!” deb oʻshanda menga aytding.

⁵⁸Yo Rabbiy, Sen da’voimni himoya qilding, Mening jonimni xalos etding.

⁵⁹Koʻrding menga qilingan nohaqlikni, Ey Egam, Oʻzing yoqlagin meni.

⁶⁰Yovlarimning til biriktirganini Sen koʻrding, Menga qarshi qilgan yovuz niyatlarini bilding.

⁶¹Ey Egam, ular meni mazax qilganini Oʻzing eshitding, Menga qarshi til biriktirganini bilding.

⁶²Gʻanimlarim meni gʻiybat qilar, Kun boʻyi menga piching otar!

⁶³Qara, ular oʻtirsa ham, tursa ham, Meni mazax qilib, qoʻshiq kuylashar.

⁶⁴Ularning qilmishlariga yarasha, Jazosini bergin, ey Egam!

⁶⁵Yuraklariga gʻulgʻula solgin, Ularni la’natga duchor qilgin,

⁶⁶Gʻazab bilan ularning ketidan quvla, Yer yuzidan tamomila yoʻq qilib tashla!