Read Uzbek Muqaddas Kitob Marsiya 5 Bible Online

Marsiya 5 - Uzbek Muqaddas Kitob bible

Marsiya 5

¹Ey Egam, boshimizga tushgan koʻrgilikni yodingda tutgin, Qanchalar xor boʻlganimizni bir koʻrib qoʻygin!

²Mulk qilib olgan yerimiz ajnabiylar qoʻliga tushdi, Kelgindilar uylarimizga ega boʻlishdi.

³Otasiz yetimday boʻlib qoldik biz, Bevaga oʻxshab qoldi onalarimiz.

⁴Biz ichgan suvimizga pul toʻlaymiz, Yoqqani oʻtinni sotib olamiz.

⁵Yovlarimiz ta’qib qilib, qoʻymas bizni holimizga, Charchab ketdik, tinim yoʻq bizga.

⁶Toʻyguncha non yeymiz deb, Misr va Ossuriya bilan biz sulh tuzdik.

⁷Ajdodlarimiz gunoh qilib, oʻtib ketdi, Ammo ularning jazosini biz tortyapmiz endi.

⁸Bizga hukmronlik qilayotir qullar, Ular zulmidan bizni kim qutqarar?!

⁹Non izlaymiz jonimizni qoʻyib xavf ostiga, Chunki kallakesarlar pisib yotibdi dalalarda.

¹⁰Ocharchilik dastidan chiqqan issigʻimiz, Tandirday qizigan bizning badanimiz.

¹¹Gʻanimlarimiz Quddusda[31] ayollarni zoʻrlashdi, Yahudo shaharlarida qizlarning nomusiga tegishdi.

¹²Qoʻllaridan osishdi yoʻlboshchilarimizni, Xor qilishdi oqsoqollarimizni.

¹³Yigitlar tegirmon toshini tortyapti, Oʻgʻlonlar ogʻir oʻtin ostida gandiraklab qoldi.

¹⁴Shahar darvozasida[32] oqsoqollar oʻtirmaydigan boʻldi, Yigitlar shodon kuylar chalmaydigan boʻldi.

¹⁵Koʻnglimizni shodlik tark etdi, Oʻyin — kulgimiz azaga aylandi.

¹⁶Boshimizdagi tojimiz tushib ketdi, Gunoh qildik! Shoʻrimiz quridi!

¹⁷Dardu alamga toʻldi yuragimiz, Yigʻlayverib xiralashdi koʻzimiz.

¹⁸Axir, Sion togʻi[33] huvullab qoldi, Chiyaboʻrilar u yerda izgʻib yuribdi.

¹⁹Sen esa, ey Egam, abadiy hukmronlik qilasan, Avlodlar osha Oʻz taxtingda oʻtirasan.

²⁰Nechun bizni Sen tamom unutding? Nechun uzoq vaqtga tashlab qoʻyding?

²¹Ey Egam, bizni Oʻzingga qaratgin, Toki Senga qaytaylik. Qadimgi ulugʻvorligimizni tiklagin.

²²Nahotki Sen bizdan butunlay voz kechding?! Qahru gʻazabingning had — poyoni bordir, axir?!