Read Uzbek Muqaddas Kitob Hizqiyol 1 Bible Online

Hizqiyol 1 - Uzbek Muqaddas Kitob bible

Hizqiyol 1

¹Hayotimning oʻttizinchi yilida[1], toʻrtinchi oyning[2] beshinchi kunida men, Buzi oʻgʻli ruhoniy Hizqiyol[3], surgunda yashayotgan odamlar bilan birga Bobildagi[4] Kavor daryosining boʻyida edim. Shunda osmon qopqasi ochildi — da, Xudodan menga vahiylar keldi. Oʻsha kuni Egamiz menga Oʻz soʻzini ayon qildi. Men Egamizning qudratini yaqqol sezib turar edim. Bu voqea shoh Yohayixin surgundaligining beshinchi yilida[5] sodir boʻlgan edi.

⁴Qarasam, shimoldan boʻron turdi. Ulkan bir bulutdan chaqmoq chaqar edi, bulut atrofi yarqirab turardi. Bulutning olovli markazi sayqallangan misday tovlanardi.

⁵Oʻshaning oʻrtasida men toʻrtta jonli mavjudotni koʻrdim. Ular inson qiyofasida edi.

⁶Ammo har birining toʻrtta yuzi va toʻrtta qanoti bor edi.

⁷Ularning oyoqlari tekis boʻlib, buzoqning tuyoqlariga oʻxshash tuyoqlari bor edi. Tuyoqlar yaltiroq bronza kabi tovlanib turardi.

⁸Qanotlari ostida odam qoʻliga oʻxshagan qoʻllari bor edi.

⁹Mavjudotlar bir — biriga orqa oʻgirib turar edilar, qanotlarining uchlari bir — biriga tegib turardi. Ular har tomonga birgalikda yurardilar, yurganlarida burilmas edilar.

¹⁰Mavjudotlarning yuzlariga kelsak, ular toʻrt xil edi: old tomonida inson yuzi, oʻng tomonida sher yuzi, chap tomonida buqa yuzi va orqa tomonida burgut yuzi bor edi.

¹¹Mavjudotlarning bir juft qanoti tepaga yoyilgan boʻlib, yonidagi mavjudotlarning qanotlariga tegib turardi. Qolgan bir juft qanoti esa tanasini yopib turardi.

¹²Mavjudotlar toʻgʻriga qarab yurishar edi. Ruh ularni qayerga yoʻnaltirsa, ular oʻsha yoqqa borishardi, yurganda burilmas edilar.

¹³Jonli mavjudotlarning koʻrinishi yonayotgan koʻmirga yoki mash’alaga oʻxshar edi. Mavjudotlarning orasida olov aylanib yurardi. Bu olov chaqnardi, undan chaqmoq chaqib turar edi.

¹⁴Mavjudotlarning oʻzlari ham chaqmoq tezligi bilan u yerdan — bu yerga borib kelishardi.

¹⁵Men toʻrtta mavjudotni tomosha qilib turganimda, mavjudotlar yonidagi gʻildiraklarni koʻrdim. Har bir mavjudotning yonida bittadan gʻildirak bor edi. Gʻildiraklar yerga tegib turardi.

¹⁶Toʻrtala gʻildirakning koʻrinishi va tuzilishi bir xil edi. Ular qimmatbaho toshday tovlanardi. Har bir gʻildirakning ichida koʻndalangiga solingan yana bittadan gʻildirak bor edi.

¹⁷Shu sababdan gʻildiraklar harakatga kelganda, toʻrt tomonga yura olar edi, yurganda burilmasdi.

¹⁸Gʻildiraklarning gardishlari baland va bahaybat edi. Ularning gir aylanasi koʻzlar bilan qoplangan edi.

¹⁹Jonli mavjudotlar yurganda, yonlaridagi gʻildiraklar ham harakatga kelardi. Yerdan koʻtarilganda, gʻildiraklar ham ular bilan birga koʻtarilardi.

²⁰Mavjudotlardagi ruh gʻildiraklarda ham bor edi. Shu sababdan ruh mavjudotlarni qayerga yoʻnaltirsa, mavjudotlar oʻsha yoqqa borishardi, gʻildiraklar ham ular bilan birga harakatga kelardi. Mavjudotlar yurganda, ular ham yurar edi, toʻxtaganda toʻxtar edi, yerdan koʻtarilganda koʻtarilar edi.

²²Mavjudotlarning boshlari uzra gumbazga oʻxshash bir narsa bor edi, oʻsha narsa billurdek tovlanardi.

²³Qanotlarini yoygan mavjudotlar gumbaz ostida turar edi. Ularning qanotlari bir — biriga tegib turardi. Ikkinchi juft qanotlari esa badanlarini yopib turardi.

²⁴Ular qanot qoqib uchardilar. Qanot qoqqanlarida chiqqan tovushi shovullagan dengiz shovqiniday, Qodir Xudoning gumburlagan ovoziday, ulkan lashkarning shovqin — suroniday edi. Mavjudotlar toʻxtaganlarida qanotlarini yigʻib olishardi.

²⁵Ular toʻxtab, qanotlarini yigʻib oldilar. Shunda boshlari tepasidagi gumbaz uzra bir ovoz yangradi.

²⁶Gumbaz ustida zangori yoqutdan yasalgan taxtga oʻxshash bir narsa bor edi. Taxt ustida inson qiyofasidagi bir Zot oʻtirardi.

²⁷Oʻsha kimsaning belidan yuqori qismi sayqallangan misday yarqirardi, atrofini olov oʻragandi. Belidan pastki qismi esa otash kabi porlardi. Uning butun borligʻi nur taratib turardi.

²⁸Oʻsha nur yomgʻirdan keyin bulutlar orasida paydo boʻladigan kamalakdek jilvalanardi. Bu yogʻdu Egamizning ulugʻvorligini aks ettirardi. Men buni koʻrishim bilanoq yerga muk tushdim, soʻng bir ovoz eshitdim.