Read Uzbek Muqaddas Kitob Hizqiyol 13 Bible Online

Hizqiyol 13 - Uzbek Muqaddas Kitob bible

Hizqiyol 13

¹Egamiz menga Oʻz soʻzini ayon qildi:

²“Ey inson, Isroilda oʻzicha bashorat qilib yurgan paygʻambarlarga qarshi bashorat qil. Ularga shunday deb ayt: «Egamizning soʻzlarini eshiting!

³Egamiz Rabbiy shunday demoqda: ey ahmoq paygʻambarlar, holingizga voy! Sizlar hech qanday vahiy koʻrmagansiz, bashoratlaringizni oʻzingiz oʻylab toʻqigansiz.»

⁴Isroil xalqiga ayt: «Paygʻambarlaringiz shahar vayronalari orasida daydib yurgan chiyaboʻrilarga oʻxshaydi.

⁵Mana, ular devorning oʻpirilib tushgan joylarini qoʻriqlamadilar, devorni tuzatmadilar. Endi Mening gʻazab kunimdagi jangda sizlar oʻzingizni muhofaza qila olmaysiz.

⁶Paygʻambarlaringizning koʻrgan vahiylari soxta, karomatlari yolgʻondir! Men ularni yubormaganman, ammo ular ‘Egamiz shunday demoqda’, deb gapiradilar. Yana oʻz gaplari amalga oshishini kutadilar!

⁷Koʻrgan vahiylari soxta emasmi?! Aytgan karomatlari yolgʻon emasmi?! Men ularga gapirmasam ham, ‘Egamiz shunday demoqda’, deb aytishadi!

⁸Paygʻambarlaringiz yolgʻon gaplar aytib yuribdilar, soxta vahiylar koʻryaptilar. Shuning uchun ularga qarshiman, — deb aytmoqda Egamiz Rabbiy.

⁹— Bu yolgʻonchi paygʻambarlarga qoʻl koʻtaraman, ularni kengashingizdan yoʻq qilaman. Nomlarini Isroil xalqi roʻyxatidan oʻchirib tashlayman, ular hech qachon Isroil yurtiga qaytib kelmaydilar. Oʻshanda Egangiz Rabbiy Men ekanligimni bilib olasizlar.»

¹⁰Ey inson, notinch paytlarda, bu paygʻambarlar «tinchlik», deya xalqimni yoʻldan uradilar. Xalqim zaif devor koʻtarganda, paygʻambarlar uni ohak bilan oqlaydilar.

¹¹Shuning uchun devorni oqlayotganlarga ayt: «Bu devor qulaydi. Uning ustiga jala yogʻadi, katta — katta doʻl tushadi, unga qarshi dovul turadi.

¹²Devor qulaganda odamlar sizlarga: ‘Devorni oqlaganingizdan nima foyda chiqdi?!’ deb aytmaydimi?

¹³Egamiz Rabbiy shunday demoqda: Men gʻazab ustida dovul turgʻizaman. Qahr ustida jala yogʻdiraman. Jahl ustida doʻl yuborib, devorni qulataman.

¹⁴Sizlar ohak bilan oqlagan bu devorni Men yiqitaman. Uni poydevorigacha ochib tashlayman. Qulagan devor sizlarni bosib qoladi, sizlar hammangiz halok boʻlasizlar. Oʻshanda Egangiz Men ekanligimni bilib olasizlar.»

¹⁵Isroil xalqiga ayt: «Egamiz Rabbiy shunday deb aytmoqda: shu yoʻsinda Men gʻazabimni devor va devorni oqlagan odamlar ustiga yogʻdiraman. Men sizlarga: ‘Devor ham, uni oqlagan odamlar ham yoʻq boʻldi’, deb aytaman. Ha, bu paygʻambarlar notinch damlarda Quddus aholisiga bashorat qilib, tinchlik vahiylarini bergan edilar.»

¹⁷Ey inson, Isroil xalqining oʻzicha bashorat qilib yurgan ayollariga yuzlan. Ularga qarshi bashorat qilib

¹⁸ayt: «Egamiz Rabbiy shunday demoqda: ey odamlarning jonini ovlab yurgan ayollar, sizlarning holingizga voy! Sizlar har bir odamning bilagiga tumor taqasizlar. Yoshu qarining boshiga yopinchiqlar yopasizlar[41]. Sizlar xalqimning jonlarini ovlab turib, oʻz jonimizni saqlab qolamiz, deb oʻylaysizmi?!

¹⁹Sizlar bir hovuch arpa bilan bir burda non uchun xalqim oldida Meni badnom qildingiz — ku! Yolgʻonni xush koʻrgan xalqimga yolgʻon gapirib, aybsiz odamni nobud qildingiz. Oʻlimga loyiq boʻlgan odamning jonini esa asrab qoldingiz.

²⁰Shuning uchun Egamiz Rabbiy aytmoqda: sizlar tumorlaringiz bilan odamlarning jonlarini ovlayapsizlar. Men oʻsha tumorlaringizga qarshiman. Men ularni qoʻllaringizdan yulib olaman, qafasdagi qushni ozod qilganday, xalqimni ozod qilaman.

²¹Yopinchiqlaringizni yirtib tashlayman, xalqimni changalingizdan xalos qilaman. Ular endi sizning qurbonlaringiz boʻlmaydi. Oʻshanda Egangiz Men ekanligimni bilib olasizlar.

²²Sizlar yolgʻonlaringiz bilan solih odamning dilini ranjitdingiz. Men esa uni ranjitmoqchi emas edim. Fosiq odam yomon yoʻlidan qaytmasligi, jonini saqlab qolmasligi uchun sizlar uni qoʻllab turdingiz.

²³Shu sababdan endi sizlar yolgʻon vahiylar koʻrmaysizlar, fol ochib yurmaysizlar. Men Oʻz xalqimni changalingizdan ozod qilaman. Oʻshanda Egangiz Men ekanligimni bilib olasizlar.»”