Read Uzbek Muqaddas Kitob Hizqiyol 14 Bible Online

Hizqiyol 14 - Uzbek Muqaddas Kitob bible

Hizqiyol 14

¹Isroil oqsoqollaridan ba’zi birlari meni koʻrgani keldilar.

²Shu onda Egamiz menga Oʻz soʻzini ayon qildi:

³“Ey inson, bu odamlar butlarga koʻngil qoʻyganlar, gunoh ularning boshiga halokat keltiradi[42]. Shunday ekan, Menga maslahat solishlariga qanday yoʻl qoʻyay?!

⁴Sen ularga ayt: «Egamiz Rabbiy shunday demoqda: Isroil xalqidan birorta odam butlarga koʻngil qoʻysa, bu gunoh uning boshiga halokat keltiradi. Agar bunday odam maslahat soʻragani paygʻambar oldiga kelsa, Men, Egangiz, oʻsha odamning sanoqsiz butlariga yarasha javobini beraman.

⁵Oʻsha butlari tufayli butun Isroil xalqi Mendan uzoqlashib ketdi, ammo Men beradigan javobim bilan ularning sadoqatini qozonaman.»

⁶Isroil xalqiga ayt: «Egamiz Rabbiy shunday demoqda: tavba qilinglar, butlaringizdan voz kechinglar. Jirkanch odatlaringizdan yuz oʻgiringlar.

⁷Ey Isroil xalqi, bilib qoʻyinglar, agar sizlardan birortangiz yoki orangizda yashab yurgan birorta musofir Mendan yuz oʻgirib, butlarga koʻngil qoʻysa, bu gunoh uning boshiga halokat keltiradi. Bunday odam paygʻambar oldiga kelib, Menga maslahat solsa, oʻsha odamga javobni Oʻzim beraman.

⁸Men bunday odamlarga qarshi chiqaman. Boshqalar ularni misol qilib, masallar aytadi. Men ularni orangizdan yoʻq qilaman. Oʻshanda Egangiz Men ekanligimni bilib olasizlar.

⁹Agar paygʻambar yanglishib, notoʻgʻri maslahat bersa, oʻsha paygʻambarni Men, Egangiz, yanglishtirgan boʻlaman. Men unga qarshi qoʻlimni koʻtaraman, uni orangizdan daf qilaman.

¹⁰Men paygʻambarni ham, uning oldiga maslahat soʻrab kelgan odamni ham birday jazolayman.

¹¹Shunda sizlar yoʻlimdan ozmaydigan boʻlasiz, gunohlaringiz bilan oʻzingizni bulgʻamaysiz. Sizlar Mening xalqim boʻlasiz, Men esa sizlarning Xudoyingiz boʻlaman. Egamiz Rabbiyning kalomi shudir.»”

¹²Egamiz menga Oʻz soʻzini ayon qildi:

¹³“Ey inson, agar biror yurtning aholisi Menga boʻlgan sadoqatini unutib, gunohga qoʻl ursa, Men ularga qarshi qoʻlimni koʻtarib, butun yurtga ocharchilik yuboraman. Odamlarni bir burda nonga zor qilaman. Yurtdagi odamu hayvonlarni qirib tashlayman.

¹⁴Bunday xalq orasida hattoki Nuh, Doniyor[43] va Ayub paygʻambarlar yashagan taqdirda ham, ular solihligi tufayli faqat oʻz jonlarini saqlab qolgan boʻlishardi, — deb aytmoqda Egamiz Rabbiy.

¹⁵— Men oʻsha yurt aholisini yirtqich hayvonlarga talatmoqchi boʻldim, deylik. Yurt huvullab qolib, hayvonlar tufayli odamlar u yerga oyoq bosmay qoʻydi ham, deylik.

¹⁶Men, Egangiz Rabbiy, barhayot Xudo boʻlganim haqi ont ichib aytamanki, agar oʻsha uchala paygʻambar u yerda boʻlganda edi, ular oʻz bola — chaqasini ham qutqara olmagan boʻlardi. Ular faqat oʻz jonlarini saqlab qolgan boʻlardi. Yurt esa xarobazorga aylanardi.

¹⁷Yoki Men oʻsha yurtga dushman yuborib, u yerdagi bor jonzotni qilichdan oʻtkazishga qaror qildim, deylik.

¹⁸Men, Egangiz Rabbiy, barhayot Xudo boʻlganim haqi ont ichib aytamanki, agar oʻsha uchala paygʻambar u yerda boʻlganda edi, ular oʻz bola — chaqasini ham qutqara olmagan boʻlardi. Ular faqat oʻz jonlarini saqlab qolgan boʻlardi, xolos.

¹⁹Yoki Men oʻsha yurtga gʻazabimni yogʻdirib, butun jonzotni oʻlat orqali qirib tashlamoqchi boʻldim, deylik.

²⁰Men, Egangiz Rabbiy, barhayot Xudo boʻlganim haqi ont ichib aytamanki, hattoki Nuh, Doniyor va Ayub u yerda boʻlganda edi, ular oʻz bola — chaqasini ham qutqara olmagan boʻlardi. Ular faqat oʻz jonlarini saqlab qolgan boʻlardi.”

²¹Egamiz Rabbiy shunday demoqda: “Men bundan ham battarini qilaman, Quddus ustiga toʻrt xil dahshatli kulfat yogʻdiraman. Shahardagi odamlar va hayvonlar urush, ocharchilik, yovvoyi hayvonlar dastidan va oʻlatdan nobud boʻladilar!

²²Ammo ba’zi erkagu ayollar omon qoladilar. Ular qochib, sizlarning oldingizga, Bobilga keladilar. Oʻshanda ularning yurish — turishini, qilmishlarini oʻzlaringiz koʻrib, Men Quddus ustiga yuborgan hamma kulfatlardan taskin topasizlar.

²³Ha, oʻsha odamlarning yurish — turishini, qilmishlarini koʻrganlaringizdan keyin taskin topasizlar. Qilgan hamma ishlarim bejiz emasligini bilib olasizlar.” Egamiz Rabbiyning kalomi shudir.