Read Uzbek Muqaddas Kitob Hizqiyol 16 Bible Online

Hizqiyol 16 - Uzbek Muqaddas Kitob bible

Hizqiyol 16

²“Ey inson, Quddusning barcha jirkanch odatlarini yuziga solib,

³ayt: «Egamiz Rabbiy shunday demoqda: asli sen Kan’on yurtida tugʻilgansan, sening otang Amor xalqidan, onang Xet urugʻidan boʻlgan[44].

⁴Sen tugʻilganingda, hech kim senga qaramagan. Hech kim kindigingni qirqmagan, seni yuvintirmagan, teringni tuz bilan artib, yoʻrgaklamagan.

⁵Bironta odamning senga rahmi kelmagan, hech kim senga achinmagan, qaramagan. Sen tugʻilganingda, hamma sendan hazar qilgan, shuning uchun seni dalaga olib borib tashlashgan.

⁶Men oʻsha yerdan oʻtib ketayotib, seni koʻrib qoldim. Sen oʻz qoningga belanib, tipirchilab yotgan eding. Shunda Men senga: ‘Sen oʻlmaysan!’ dedim. Senga umr tiladim.

⁷Men seni dashtdagi oʻsimlik kabi oʻstirdim. Sen ulgʻayding, boʻying choʻzildi, eng goʻzal bir gavharga oʻxshab qolding[45]. Sening koʻkraklaring toʻlishdi, sochlaring uzun boʻldi, ammo sen qip — yalangʻoch eding.

⁸Men yana oʻsha yerdan oʻtib ketayotib, seni koʻrib qoldim. Sen sevgi uchun yetilganingni koʻrib, kiyimimning etagi bilan yalangʻoch badaningni yopdim. Men senga qasamyod qildim, sen bilan nikoh ahdini tuzdim. Shunda sen Meniki boʻlding, — deb aytmoqda Egamiz Rabbiy.

⁹— Seni choʻmiltirib, badaningga yopishib qolgan qon qoldiqlarini yuvib tashladim. Teringga xushboʻy moylarni surtdim.

¹⁰Egningga naqsh solingan koʻylak, oyogʻingga yumshoq teridan tikilgan choriqlar kiydirdim. Boshingga harir roʻmol oʻrab, ustingga shoyi toʻn tashladim.

¹¹Qimmatbaho bezaklar bilan senga zeb berdim: qoʻllaringga bilaguzuklar, boʻyningga tilla zanjir,

¹²burningga uzuk, quloqlaringga sirgʻa taqdim, boshingga goʻzal bir toj kiydirdim.

¹³Seni oltinu kumush bilan bezantirdim, ustingga qimmatbaho shoyi, mayin zigʻir matosidan tikilgan liboslaru naqsh solingan koʻylaklar kiydirdim. Oliy navli undan yopilgan nonlar bilan, zaytun moyi va asal bilan seni boqdim. Sen nihoyatda goʻzal boʻlding, haqiqiy malikaga oʻxshab qolding.

¹⁴Mislsiz goʻzalliging bilan xalqlar orasida dong taratding, chunki Men senga bergan ulugʻvorligim goʻzalligingni mukammal qilgan edi. Egamiz Rabbiyning kalomi shudir.

¹⁵Sen esa goʻzalligingga ishonding. Shuhratingdan foydalanib, fahsh yoʻliga kirding[46]. Oʻtgan — ketgan erkakka oʻzingni berding, goʻzalligingdan ularni bahramand qilding.

¹⁶Men senga bergan nafis matolar bilan sajdagohlaringni[47] bezab, u yerda fohishalik qilding. Qanday sharmandagarchilik! Aslo bunday boʻlishi kerak emas edi!

¹⁷Bundan tashqari, Men senga bergan oltin va kumush bezaklardan oʻzingga erkak tasviridagi haykalchalar yasattirding. Ular bilan zino qilding.

¹⁸Naqsh solingan koʻylaklaringni butlar ustiga kiydirding. Men senga bergan moy bilan xushboʻy tutatqilarni ularga nazr qilding.

¹⁹Senga non uchun bergan oliy navli unni, zaytun moyi va asalni butlaringga xushboʻy hadyalar sifatida tortiq qilding. Eha, shular sodir boʻldi, — deb aytmoqda Egamiz Rabbiy.

²⁰— Soʻng Mendan koʻrgan oʻgʻil — qizlaringni olding, ularni oʻz butlaringga yem qilib, qurbon qilding. Nahotki fohishalik qilganing yetmagan boʻlsa?!

²¹Bolalarimni soʻyishing, ularni butlaringga qurbonlik qilib, olovda kuydirishing[48] shartmidi?!

²²Jirkanch odatlaru fohishalik qilganingda sen biron marta ham oʻz bolaligingni eslamading, qip — yalangʻoch boʻlganingni, oʻz qoningga belanib tipirchilab yotganingni esga olmading.

²³Sening holingga voy! — deb aytmoqda Egamiz Rabbiy. — Qilgan qabihliklaring yetmaganday sen

²⁴oʻzing uchun soʻrilar qurding, har bir maydonda baland supalar[49] oʻrnatding.

²⁵Har bir koʻchaning boshida baland supalar qurib, goʻzalligingni xor qilding. Oʻtgan — ketganga putingni ochding, fohishalikka berilib ketding.

²⁶A’zosi yirik boʻlgan qoʻshni Misr bilan yotding. Fahshga berilib, gʻazabimni keltirding.

²⁷Shunda Men qoʻlimni senga qarshi koʻtardim. Rizqingni kamaytirib, seni dushmanlaring boʻlgan Filist ayollarining ixtiyoriga topshirdim. Hattoki oʻshalar ham sening behayoligingni koʻrib, yoqalarini ushlashgan.

²⁸Sen toʻymas hirsingni qoniqtirish uchun Ossuriya[50] bilan fohishalik qilding. Ammo shunda ham qoniqmading.

²⁹Savdogarlar yurti boʻlgan Bobil[51] bilan ham fahshga berilding, ammo shunda ham qoniqmading.

³⁰Naqadar buzuqdir sening yuraging! — deb aytmoqda Egamiz Rabbiy. — Sen oʻzingni shaloq xotinday tutding — ku!

³¹Sen har bir koʻchaning boshida soʻrilar qurding, har bir maydonda baland supalar oʻrnatding. Yoʻq, sen fohishaday emas eding, sen toʻlovdan hazar qilarding.

³²Sen buzuq ayolsan! Begona erkaklarni oʻz eringdan afzal koʻrding.

³³Hamma fohishalarga sovgʻalar beriladi. Lekin sen hamma oʻynashlaringga sovgʻalar berding. Har yoqdan kelib, sen bilan fohishalik qilishlari uchun ularni sotib olding.

³⁴Ha, sen boshqa fohishalardan ajralib turasan. Hech kim seni fohishalik qilishga undamagan, hech kim senga toʻlov bermagan. Aksincha, boshqalarga sen toʻlov bergansan. Haqiqatan ham, sen boshqachasan!»

³⁵Ey inson, Quddusga ayt: «Endi esa, ey fohisha, Egamizning soʻzlarini eshit!

³⁶Egamiz Rabbiy shunday demoqda: sen kiyimlaringni yechib, oʻynashlaring bilan fohishalik qilding, makruh butlaringga sajda etding. Oʻz bolalaringning qonini toʻkib, xudolaringga qurbon qilding.

³⁷Shuning uchun sendan lazzatlangan hamma oʻynashlaringni Men har yerdan yigʻib kelaman. Sen sevganlarni ham, nafratlanganlarni ham senga qarshi yigʻaman. Seni qip — yalangʻoch qilib, ularning oldiga chiqarib qoʻyaman. Ular seni tomosha qiladilar.

³⁸Men seni qotilliging va zinokorliging uchun hukm qilaman. Rashku gʻazabda seni qonga belayman.

³⁹Seni oʻynashlaring ixtiyoriga topshiraman. Ular soʻrilaringni buzadilar, supalaringni vayron qiladilar. Ustingdagi kiyimlaringni yulib oladilar, chiroyli taqinchoqlaringni tortib oladilar. Sen qip — yalangʻoch qolasan.

⁴⁰Ular olomonni yigʻib, seni toshboʻron qiladilar, jasadingni qilich bilan nimtalab tashlaydilar.

⁴¹Uylaringni yondirib yuboradilar, seni bir talay ayollarning koʻzi oldida jazolaydilar. Shu yoʻsin Men fohishaligingga chek qoʻyaman. Sen oʻynashlaringga boshqa toʻlov bermaysan.

⁴²Sen bolaligingni eslamaganing uchun, qilmishlaring bilan qahrimni keltirganing uchun, Men qilmishlaringga yarasha jazoingni beraman, — deb aytmoqda Egamiz Rabbiy. — Shunda Men jahldan tushaman, rashkimni bosib olaman. Tinchlanib, boshqa gʻazablanmayman. Ey Quddus, jirkanch odatlaring yetmasmidi, nimaga behayolik qilding?

⁴³

⁴⁴Odamlar sen haqingda gapirganda ‘qiz onasiga tortar’ degan maqolni ishlatishadi.

⁴⁵Sen haqiqatan ham oʻz eri va bolalaridan hazar qilgan onangga oʻxshaysan. Erlari va bolalaridan hazar qilgan opa — singillaringdan qolishmaysan. Sening onang Xet urugʻidan, otang Amor xalqidan edi[52].

⁴⁶Sening opang Samariya oʻz qizlari bilan shimolda, singling Sadoʻm esa oʻz qizlari bilan janubda yashar edilar.

⁴⁷Sen nafaqat ularning yoʻllaridan yurgansan, jirkanch odatlariga taqlid qilgansan, balki qisqa vaqt ichida barcha qabihliklaring bilan ulardan oʻzib ham ketgansan.

⁴⁸Men, Egang Rabbiy, barhayot Xudo boʻlganim haqi ont ichib aytamanki, sening singling Sadoʻm oʻz qizlari bilan senchalik va sening qizlaringchalik qabihliklar qilmagan.

⁴⁹Sadoʻmning aybi shudir: u va uning qizlari magʻrur edilar. Ular toʻq, tinch va osoyishta hayot kechirar edilar, ammo mazlumu nochorlarga yordam bermas edilar.

⁵⁰Ha, ular magʻrur edilar, oldimda jirkanch ishlar qilgandilar. Men buni koʻrib, ularni yoʻq qilgan edim.

⁵¹Hatto Samariya ham sen qilgan gunohlarning yarmisini qilmagan. Sen ulardan koʻproq qabihliklar qilgansan. Qilgan qabihliklaring oldida opang bilan singling solih boʻlib koʻrinadi.

⁵²Mana endi sharmandaligingga toqat qilishga majbursan. Sen opa — singillaringning jazosini yengillashtirding. Sen ulardan ham battar gunohlar qilib, ularni begunohday koʻrsatding. Endi uyalgin, sharmandaligingga toqat qilgin, chunki sen opa — singillaringni oppoq qilib koʻrsatding.

⁵³Ammo bir kun kelib, Men Sadoʻm va Samariyani ularning qizlari bilan birga yana farovonlikka erishtiraman. Ular bilan birga seni ham tiklayman.

⁵⁴Shunda sen sharmandaligingga toqat qilib, oʻzingdan — oʻzing uyalib ketasan, chunki sen qilgan qilmishlaring bilan opa — singillaringni ancha yupatding.

⁵⁵Ha, opa — singillaring Sadoʻm va Samariya qizlari bilan tiklanadi. Sen ham qizlaring bilan qayta tiklanasan.

⁵⁶Sen magʻrurlanib, singling Sadoʻmni mazax qilar eding.

⁵⁷Ammo endi, sening fosiqliging butun dunyoga oshkor boʻldi. Sen Edom[53] qizlari va ularning hamma qoʻshnilari uchun mazax boʻlding. Filist qizlari hamma joyda seni masxara qiladilar.

⁵⁸Sen behayoliging va jirkanch odatlaringga yarasha jazo tortishing shart. Egamizning kalomi shudir.

⁵⁹Egamiz Rabbiy demoqda: ey Quddus, Men qilgan qilmishingga yarasha jazoingni beraman, chunki sen bergan va’dalaringni mensimading, ahdingni buzding.

⁶⁰Ammo Men yoshligingda sen bilan tuzgan ahdimga[54] sodiq qolaman, sen bilan abadiy bir ahd tuzaman.

⁶¹Sen qilgan qilmishlaringni eslaysan. Opangni ham, singlingni[55] ham qabul qilganingda uyalasan. Men ularni senga farzand qilib beraman. Buni sen bilan tuzadigan ahddan tashqari qilaman.

⁶²Ha, Men sen bilan ahd tuzaman, shunda Egang Men ekanligimni bilib olasan.

⁶³Men qilgan barcha gunohlaringni kechiraman, ammo sen ularni doim yodingda tutib, xijolat boʻlasan. Uyalganingdan sen hatto ogʻzingni ham ocha olmaysan. Egamiz Rabbiyning kalomi shudir.»”