Read Uzbek Muqaddas Kitob Hizqiyol 23 Bible Online

Hizqiyol 23 - Uzbek Muqaddas Kitob bible

Hizqiyol 23

²“Ey inson, bir onadan tugʻilgan ikki opa — singil bor edi.

³Ular Misrda fohishalik qilardilar. Yoshligidan fahsh yoʻliga kirgandilar. Qizlik koʻkragi u yerda silandi, emchaklari siypalandi.

⁴Kattasining ismi Oxola, kichkinasining ismi Oxolibo edi. Men ikkovini ham Oʻz nikohimga olgan edim, ular Menga oʻgʻil — qizlar tugʻib berishdi. Oxola Samariyani, Oxolibo Quddusni bildiradi[94].

⁵Oxola Mening nikohimda boʻla turib, fohishalik qilar edi. U oʻynashlari boʻlgan Ossuriyalik jangchilarga hirs qoʻygan edi.

⁶Ularning hammasi kelishgan yigitlar, zangori libos kiygan, ot mingan hokimu lashkarboshilar edi.

⁷Oxola Ossuriyaning hamma sara erkaklari bilan fohishalik qilar edi. Hirs qoʻygan har bir erkakning butlariga sigʻinib, oʻzini bulgʻab yurardi.

⁸U Misrda qilgan fohishaliklarini tashlamadi. Yoshligida erkaklar u bilan yotishgan edi, qizlik koʻkragini silab, shahvatini qondirishgan edi.

⁹Shu sababdan Men uni oʻynashlarining qoʻliga topshirib qoʻydim. U hirs qoʻygan oʻsha Ossuriyaliklarning qoʻliga berdim.

¹⁰Ular Oxolani qip — yalangʻoch qildilar, uni oʻldirdilar. Oʻgʻil — qizlarini oʻzlariga qul qilib oldilar. Jazosini tortgan Oxola ayollarning ogʻzidan tushmay qoldi.

¹¹Singlisi Oxolibo bularni koʻrdi. Shunday boʻlsa — da, suyuqoyoqligi va fohishaligi bilan opasidan oʻtib tushdi.

¹²U ham oʻsha Ossuriyalik hokimu lashkarboshilarga, qurol — aslahalar taqqan otliq xushbichim jangchilarga hirs qoʻydi.

¹³Men Oxoliboning bulgʻanganini koʻrdim, opasi bilan bir yoʻlni tanlaganini bildim.

¹⁴U borgan sari fohishalikka berilib ketar edi. Bir kuni u Bobilliklarning[95] devorga tushirilgan rasmlarini koʻrib qoldi. Ular qizil rangga boʻyalgan edi.

¹⁵Bellarida kamar, boshlarida koʻrkam salla bilan tasvirlangan edilar. Ular Xaldey[96] yurtida tugʻilgan Bobil otliq sarkardalariga oʻxshar edilar.

¹⁶Oxolibo oʻsha rasmlarni koʻrdi — yu, shahvat uning qonini qizdira boshladi. U Bobilga choparlar joʻnatib, Bobilliklarni oʻz huzuriga chorladi.

¹⁷Bobilliklar uning oldiga kirdilar, ishq toʻshagiga u bilan yotdilar, oʻz hirsi bilan uni bulgʻadilar. Oxolibo bulgʻangandan keyin Bobilliklardan jirkanib ketdi, ulardan yuzini oʻgirdi.

¹⁸U fohishalikka berilib, yalangʻoch badanini hammaga koʻz — koʻz qilganda, Men undan jirkanib ketdim, opasidan yuz oʻgirganimday undan ham yuzimni oʻgirdim.

¹⁹U esa yoshlik davrini, Misrda qilgan behayoligini eslab, yanada koʻp fohishalik qilaverdi.

²⁰Jinsiy a’zolari eshaklarnikiday, maniylari aygʻirlarnikiday boʻlgan oʻynashlariga hirs qoʻydi.

²¹Yoshligida qilgan behayoliklarini qaytarmoqchi boʻldi. Oʻsha paytlarda Misrliklar emchaklarini siypalagan edilar, qizlik koʻkraklarini silagan edilar.

²²Shuning uchun, Oxoliboga ayt: «Egamiz Rabbiy shunday demoqda: sen oʻsha oʻynashlaringdan jirkanib, ulardan yuzingni oʻgirgansan, ammo Men oʻshalarni senga qarshi qoʻzgʻataman. Ular har tomondan kelib, senga hamla qiladilar.

²³Men Bobilliklarni, Paxoʻd, Shoʻva va Qoʻvadan kelgan hamma Xaldeylarni[97], jamiki Ossuriyaliklarni boshlab kelaman. Ot mingan oʻsha xushbichim yosh aslzodalarni, hokimu lashkarboshilarni, sarkardayu zodagonlarni yigʻib kelaman.

²⁴Ular qurollanadilar, senga qarshi jang aravalari, yuk aravalari va talay lashkarni tortib keladilar. Boshiga dubulgʻa kiygan, qoʻliga qalqon va sipar tutgan jangchilar seni qurshovga oladilar. Hukm qilishlari uchun Men seni ularning qoʻliga topshiraman. Ular seni oʻz qonunlariga muvofiq hukm qiladilar.

²⁵Men ustingga qahrimni yogʻdiraman, lashkarlar seni shafqatsizlarcha jazolaydilar. Ular burning va quloqlaringni kesib tashlaydilar, omon qolgan har bir odamni qilichdan oʻtkazadilar. Oʻgʻil — qizlaringni asir qilib oladilar, omon qolganlarni yondirib yuboradilar.

²⁶Ustingdagi kiyimlarni yechib oladilar, qimmatbaho taqinchoqlaringni olib ketadilar.

²⁷Sen Misrda boshlagan fohishaligu suyuqoyoqligingga Men shu yoʻsin chek qoʻyaman. Bularga boʻlgan ishtiyoqing yoʻqoladi, sen Misrni unutib yuborasan.

²⁸Zero, seni oʻzing nafratlangan, jirkanib, yuzingni oʻgirgan odamlarning qoʻliga topshiraman, — deb aytmoqda Egamiz Rabbiy.

²⁹— Ular nafrat bilan seni jazolaydilar, topgan — tutganingni tortib oladilar. Seni yalangʻoch, hech vaqosiz tashlab ketadilar. Fohishaliging ochiladi, sharmanda boʻlasan. Suyuqoyoqliging, fohishaliging

³⁰tufayli shu ahvolga tushasan. Sen boshqa xalqlar bilan fohishalik qilding, ularning butlari bilan bulgʻanding.

³¹Sen opangning yoʻlidan ketding, shuning uchun Men opangga ichirgan jazo kosasidan[98] senga ham ichiraman.

³²Ha, Men, Egang Rabbiy, aytamanki: Sen ham opangning kosasidan ichasan, U kosa katta va chuqurdir. Seni mazax qilishadi, ustingdan kulishadi, U kosa limmo — lim toʻladir.

³³Sen qaygʻuga botib mast boʻlasan. Ha, bu dahshatu vayronalik kosasidir, Opang Samariyaning kosasidir.

³⁴Sen kosani oxirigacha ichasan, Uni chil — chil sindirasan. Koʻksingni yulib, faryod qilasan. Bularni Men, Egang Rabbiy, aytdim.

³⁵Egamiz Rabbiy shunday demoqda: sen Meni unutib, Menga orqa oʻgirganing uchun, fohisha va suyuqoyoq boʻlganing uchun jazo tortasan.»”

³⁶Egamiz menga dedi: “Ey inson, sen Oxola va Oxoliboni hukm qilishga tayyormisan? Tayyor boʻlsang, ularning jirkanch odatlarini yuzlariga sol.

³⁷Axir, ular zino qildilar, qonli jinoyatlarga qoʻl urdilar. Butlari bilan zino qilib, Mendan koʻrgan bolalarini oʻsha butlarga taom nazri sifatida qurbonlik qilib, olovda kuydirdilar[99].

³⁸Bundan tashqari, oʻsha vaqtning oʻzidayoq muqaddas maskanimni harom qildilar, Mening Shabbat kunlarimni bulgʻadilar.

³⁹Bolalarini butlarga atab soʻygan kuni muqaddas maskanimga kirib, uyimni harom qildilar!

⁴⁰Ular uzoq yurtlarga choparlar joʻnatib, erkaklarni oʻz huzuriga chorladilar. Ular yetib kelganlarida, bu opa — singillar yuvinib — tarandilar, koʻzlariga surma surdilar, taqinchoqlar bilan bezanib oldilar.

⁴¹Dasturxon tuzalgan serhasham supaga oʻtirdilar. Oʻsha dasturxon ustiga Mening xushboʻy tutatqimni va moyimni qoʻydilar.

⁴²Xonalaridan aysh — ishrat qilayotgan erkaklarning ovozi kelar edi. Sahrodan kelgan bu mayxoʻr qalangʻi — qasangʻilar[100] opa — singillarning qoʻllariga bilaguzuklar taqdilar, boshlariga chiroyli tojlar kiydirdilar.

⁴³Shunda men: «Bu ayollar fohishalik qilaverib, holdan toyganlar. Nahotki kelganlar ularning bu ahvolini koʻra turib, ular bilan jinsiy aloqa qilishsa?!» deb oʻyladim ichimda.

⁴⁴Kelgan erkaklar bu suyuqoyoqlar bilan birga boʻlishdi. Ular, fohishaning oldiga kirganday, qayta — qayta Oxola va Oxoliboning oldiga kiraverishdi.

⁴⁵Solih odamlar esa bu ikki opa — singilni zinokorlik va qotillikda ayblaydilar, chunki opa — singillar zinoga ruju qoʻyib, qoʻllarini qonga beladilar.

⁴⁶Oxola va Oxoliboga ayt: «Egamiz Rabbiy shunday demoqda: sizlarga qarshi bir olomonni yigʻib kelaman. Ular sizlarni azoblab, bor — yoʻgʻingizni tortib oladilar.

⁴⁷Sizlarni toshboʻron qilib, tanalaringizni nimtalab tashlaydilar, oʻgʻil — qizlaringizni oʻldiradilar, uylaringizga oʻt qoʻyadilar.

⁴⁸Shu yoʻsin Men yurtdagi bu behayolikka chek qoʻyaman. Buni koʻrgan boshqa ayollar oʻzlari uchun saboq oladilar, bunday behayolikni boshqa qilmaydigan boʻladilar.

⁴⁹Sizlar oʻz behayoligingiz tufayli jabr tortasizlar, gunohkor butparastligingizning jazosini olasizlar. Oʻshanda Egangiz Rabbiy Men ekanligimni bilasizlar.»”