Read Uzbek Muqaddas Kitob Hizqiyol 27 Bible Online

Hizqiyol 27 - Uzbek Muqaddas Kitob bible

Hizqiyol 27

¹Egamiz menga Oʻz soʻzini ayon qildi:

²“Ey inson, Tir[119] haqida bir marsiya kuyla.

³Dengiz boʻyidagi yurtlar bilan savdo — sotiq qiladigan, dengiz darvozasida oʻrnashgan Tir shahriga ayt: «Egamiz Rabbiy shunday demoqda: Ey Tir, sen: ‘Goʻzallikda barkamolman’, deding.

⁴Ha, sening chegaralaring dengiz bagʻridan oʻtgan, Quruvchilaring goʻzalligingni barkamol qilgan.

⁵Xermon togʻidagi[120] archa yogʻochidan qurilgan Ulkan bir kemaday eding sen. Quruvchilaring machtangni yasash uchun Lubnondan keltirilgan sadr yogʻochini[121] ishlatdilar.

⁶Eshkaklaringni Bashan emanlaridan yasadilar. Kema sahnini Kipr[122] qaragʻaylaridan qildilar, Fil suyagi bilan uni bezatdilar.

⁷Yelkanlaring Misrdan keltirilgan naqshli matolardan edi, Ular senga bayroq boʻlib xizmat qilardi. Elishox qirgʻoqlaridan olib kelingan Koʻk va safsar gazlamalar soyaboning edi.

⁸Sidon va Arvod[123] odamlari eshkaklaringni eshar edi, Oʻz mohir odamlaring esa kemalaringni boshqarar edi.

⁹Gabollik[124] tajribali kemasozlaring bor edi, Ular kemangning yoriqlarini saqichlardi. Barcha kemalaru dengizchilar kelib, Sening mollaringni sotib olishar edi.

¹⁰Fors, Lidiya va Liviya[125] yurtlarining askarlari Saflaringda xizmat qilar edi. Qalqonu dubulgʻalarini devorlaringga osib, Seni salobatli qilishar edi.

¹¹Arvod va Xelekdan[126] kelgan odamlar Devorlaringda soqchilik qilishardi, Gamadliklar minoralaringni qoʻriqlashardi. Devorlaringga qurollarini osib, Goʻzalligingni barkamol qilishardi.

¹²Sening boyliklaring shu qadar koʻp ediki, hatto Tarshish[127] aholisi sen bilan savdo — sotiq qilardi. Ular kumush, temir, qalay va qoʻrgʻoshinni mollaringga ayirboshlashardi.

¹³Yunonlar[128], Tuval va Meshex[129] xalqlari sen bilan savdo — sotiq qilar edi. Mollaring evaziga qullarni va bronza buyumlarni berishar edi.

¹⁴Toʻxarmoliklar[130] aravaga qoʻshiladigan otlarni, jang otlariyu xachirlarini mollaringga almashtirishardi.

¹⁵Roʻdon[131] xalqi sen bilan savdo — sotiq qilar edi. Dengiz sohilidagi koʻp yurtlar sening xaridorlaring edi. Ular fil suyagi va obnus yogʻochini[132] senga toʻlov sifatida berishardi.

¹⁶Mollaring behisob boʻlgani uchun Oram[133] xalqi ham sen bilan savdo — sotiq qilardi. Mollaring evaziga qimmatbaho firuza toshlarni, safsar matolarni, naqsh solingan gazlamalarni, mayin zigʻir matolarini, marjonu yoqutlarni olib kelardi.

¹⁷Yahudo va Isroil yurtlari sen bilan oldi — sotdi qilishardi. Ular mollaring evaziga Minnitdan keltirilgan bugʻdoyni, shuningdek, shirinliklar, asal, zaytun moyi va mumiyo olib kelishardi.

¹⁸Sening cheksiz boyliklaring, turli xil mollaring tufayli, Damashq aholisi sen bilan savdo — sotiq qilardi. Mollaring evaziga ular Xelbon[134] sharobini va oppoq yungni[135] olib kelishardi.

¹⁹Uzol shahridan sharob keltirib[136], sen bilan oldi — sotdi qilishardi. Ishlov berilgan toza temirni, dolchin va xushboʻy qamishni mollaringga almashtirishardi.

²⁰Dedonliklar[137] senga ot terligini[138] sotishar edi.

²¹Qoʻzichoq, qoʻchqor va echkilar bilan seni ta’minlagan Arabiston va Kedar[139] shahzodalari mollaringni xarid qilishardi.

²²Shava va Ramo[140] savdogarlari sen bilan savdo — sotiq qilishardi. Mollaring evaziga eng a’lo ziravorlarni, qimmatbaho toshlaru oltinni berishardi.

²³Xoron, Xannox va Eden shaharlari hamda Shava, Oshur va Xilmad[141] savdogarlari sen bilan savdo — sotiq qilishardi.

²⁴Ular qimmatbaho liboslar, koʻk matolar, naqsh solingan koʻylaklar, rang — barang gilamlar, puxta eshilgan arqonlarni senga sotishardi.

²⁵Tarshish[142] kemalari karvonlaring boʻlib xizmat qilardi. Sen dengizda suzgan bir kemadaydirsan, Ogʻir yuk senga yuklangan.

²⁶Evoh, eshkakchilaring seni ochiq dengizga olib chiqishadi. Sharq shamoli seni dengiz bagʻrida parchalab yuboradi.

²⁷Kemang halokatga uchragan kuni Mollaring, boyliklaring, Dengizchilaring, dargʻalaring, Kemasozlaring, savdogarlaring, Jangchilaring va kemadagi odamlaring Dengiz tubiga choʻkib, halok boʻladilar.

²⁸Choʻkayotgan dargʻalaring faryod qiladi, Dodlari sohillarni larzaga soladi.

²⁹Hamma eshkakchilar kemalarini tark etadi, Dengizchilaru dargʻalar sohilga chiqib oladi.

³⁰Ular sen uchun faryod qiladi, Achchiq — achchiq koʻz yoshlar toʻkadi. Boshlaridan tuproq sochadi, Kulga belanib, yotib oladi.

³¹Seni deb sochlarini qirdiradi, Qanorga oʻranib oladi[143], Qaygʻudan yurak — bagʻri qon boʻladi.

³²Ular yigʻlab, sen haqingda marsiya kuylaydi: ‘Tir kabi bironta shahar bormi?! Dengiz uni oʻz qa’riga tortib ketdi.’

³³Sen dengiz ortidan keltirgan mollaring bilan, Koʻplab xalqlarning ehtiyojini qondirding. Cheksiz ziynatlaru mollaring bilan Dunyo shohlarini sen boyitding.

³⁴Endi esa dengiz seni parchaladi, Oʻz domiga seni tortib ketdi. Barcha mollaringu dengizchilaring Sen bilan birga nobud boʻldi.

³⁵Sohildagi xalqlar kulfatingni koʻrib, dahshatga tushadi. Qoʻrquvdan shohlarning afti burishib ketadi.

³⁶Ahvolingdan dunyo savdogarlari yoqasini ushlaydi. Ha, sening boshingga dahshatli oʻlim keldi, Sen abadiy yoʻq boʻlasan.»”