Read Uzbek Muqaddas Kitob Hizqiyol 28 Bible Online

Hizqiyol 28 - Uzbek Muqaddas Kitob bible

Hizqiyol 28

¹Egamiz menga Oʻz soʻzini ayon qildi:

²“Ey inson, Tir[144] shohiga ayt: «Egamiz Rabbiy shunday demoqda: sen magʻrurlanib ketding. ‘Men xudoman, dengiz bagʻridagi xudolar taxtida oʻtiribman’, deb aytding. Sen oʻzingni xudoday dono deb bilasan, axir, sen xudo emas, insonsan — ku!

³Nahotki Doniyordan[145] ham dono boʻlsang?! Nahot barcha sirlarni bilsang?!

⁴Sen donoliging va aqling bilan oʻzingga davlat orttirding, xazinalaringni oltinu kumushga toʻldirding.

⁵Savdo — sotiqdagi iqtidoring bilan koʻp davlat yigʻding. Ammo boyliging tufayli magʻrurlanib ketding.

⁶Egamiz Rabbiy shunday demoqda: sen oʻzingni xudoday dono deb bilganing uchun,

⁷Men ustingga begona xalqni tortib kelaman. Ular oʻtaketgan yovuz xalqdir. Ular goʻzalliging va donoligingga qarshi chiqib, qilich yalangʻochlaydilar. Hashamatingni oyoq osti qiladilar.

⁸Oʻzingni esa tubsiz chuqurlikka uloqtiradilar. Ha, sen dengiz bagʻrida azoblanib jon berasan.

⁹Shunda, jallodlaring oldida ‘men xudoman’, deb aytarmikansan?! Axir, qotillaring qoʻlida sen xudo emas, oddiy bir inson boʻlasan!

¹⁰Sen musofirlar qoʻlida sunnatsizlar kabi oʻlasan. Bularni Men aytdim. Egamiz Rabbiyning kalomi shudir.»”

¹¹Egamiz menga yana shunday dedi:

¹²“Ey inson, Tir shohi haqida marsiya ayt: «Egamiz Rabbiy shunday demoqda: Ey Tir shohi, sen barkamollikning a’lo namunasi boʻlding. Nihoyatda dono, goʻzallikda barkamol eding.

¹³Sen Xudoning bogʻi Adanda yashar eding. Qizil yoqut, xrizolit, olmos, Topaz, aqiq, yashma, Zangori yoqut, firuza va zumrad[146] kabi Qimmatbaho toshlar bilan bezanar eding. Taqinchoqlaring oltindan yasalgan edi. Sen yaralgan kuning bular tayyorlangandi.

¹⁴Men seni soqchi karub qilib tanladim, Oʻsha martabaga seni tayinladim. Sen Xudoning togʻida yashar eding, Olovday tovlangan toshlar orasida yurar eding.

¹⁵Bino boʻlganingdan to qabihlik qilguningga qadar, Sen toʻgʻri yoʻldan yurding.

¹⁶Katta tijorating tufayli, Yovuzlikka toʻlib, gunoh qilding. Men seni sharmandalarcha Xudoning togʻidan haydadim. Ey soqchi karub, Men seni chiqarib yubordim, Olovday tovlangan toshlar orasidan haydadim.

¹⁷Sen goʻzalliging tufayli magʻrurlanib ketgan eding. Savlating tufayli aql — farosatdan voz kechgan eding. Shuning uchun Men seni yerga uloqtirdim, Shohlar oldida sharmandangni chiqardim.

¹⁸Sen cheksiz gunohlaring bilan, Savdo — sotiqdagi nohaqliklaring bilan, Oʻz sajdagohlaringni bulgʻading. Shuning uchun Men ichingdan olov chiqardim, Seni kuydirib tashladim. Odamlarning koʻzi oldida kulingni koʻkka sovurdim.

¹⁹Seni bilgan xalqlar ahvolingni koʻrib, dong qotdilar. Sening boshingga dahshatli oʻlim keldi, Sen abadiy yoʻq boʻlasan.»”

²⁰Egamiz menga Oʻz soʻzini ayon qildi:

²¹“Ey inson, Sidon[147] shahriga yuzlan, unga qarshi bashorat qilib ayt:

²²«Egamiz Rabbiy shunday demoqda: ey Sidon, Men senga qarshiman! Seni jazolab, sen orqali muqaddasligimni ayon qilaman, shu tariqa orangda Oʻzimni ulugʻlayman. Oʻshanda Egang Men ekanligimni bilib olasan.

²³Men seni dahshatli oʻlatga giriftor qilaman. Koʻchalaringda qon daryo boʻlib oqadi. Dushmanlaring senga har tomondan hamla qiladi, odamlarning jasadlari shahar ichida yotadi. Oʻshanda Egang Men ekanligimni bilib olasan.»”

²⁴Egamiz Rabbiy shunday demoqda: “Isroil xalqidan hazar qilib, zulm oʻtkazgan bironta qoʻshni xalq bundan buyon Isroil xalqi uchun tikan va yantoqday boʻlmaydi. Isroil xalqi Egasi Rabbiy Men ekanligimni bilib oladi. Men tarqatib yuborgan xalqim Isroilni uzoq yurtlardan Oʻzim yigʻib olaman. Ular orqali barcha xalqlarga muqaddasligimni ayon qilaman. Men qulim Yoqubga mulk qilib bergan yerda ularni oʻrnashtiraman.

²⁶Ular osoyishta hayot kechiradilar. Uylar qurib, uzumzorlar barpo qiladilar. Ulardan hazar qilgan qoʻshni xalqlarni jazolaganim uchun xalqim bexatar, tinch yashaydi. Oʻshanda Egasi Xudo Men ekanligimni bilib oladi.”