Read Uzbek Muqaddas Kitob Hizqiyol 3 Bible Online

Hizqiyol 3 - Uzbek Muqaddas Kitob bible

Hizqiyol 3

¹U menga shunday dedi: — Ey inson, Men senga berayotgan bu oʻrama qogʻozni[8] olib yegin. Soʻng Isroil xalqining oldiga borib, aytganlarimni ularga yetkaz.

²Men ogʻzimni ochdim, U menga oʻsha oʻrama qogʻozni yegani berdi.

³U menga dedi: — Qogʻozning hammasini yeb, qorningni toʻygʻaz. Men qogʻozni yedim, uning ta’mi asalday shirin edi.

⁴U menga yana shunday dedi: — Ey inson, endi borib, Isroil xalqiga Mening gaplarimni ayt.

⁵Men seni qiyin va murakkab tilda gapiradigan xalq oldiga emas, balki Isroil xalqi oldiga yuboryapman.

⁶Agar Men seni tili tushunarsiz boʻlgan koʻp xalqlar oldiga yuborganimda edi, ular senga albatta quloq solishgan boʻlar edi.

⁷Ammo Isroil xalqi senga quloq solmaydi, ular hatto Menga ham quloq solishmaydi. Ha, bu xalq qaysar va oʻjardir.

⁸Mana qara, Men seni ular kabi qaysar va oʻjar qilaman.

⁹Sening boshing toshday qattiq, qayroqtoshdan ham qattiqroq boʻladi. Ular isyonkor xalq boʻlsa — da, sen ulardan choʻchima, dahshatga tushma.

¹⁰U gapida davom etib shunday dedi: — Ey inson, senga aytadigan gapimni ikki qulogʻing bilan yaxshilab eshitib, hammasini dilingga tugib olgin.

¹¹Soʻng surgundagi yurtdoshlaring oldiga bor. Ular senga quloq soladimi, yoʻqmi, ularga: “Egamiz Rabbiy shunday demoqda”, deb gaplarimni yetkaz.

¹²Ruh meni koʻtardi. Shunda men orqadan kelayotgan qattiq gumburlagan tovushni eshitdim. Oʻsha tovush: “Egamizning ulugʻvorligini Uning makonida madh qilinglar”, deb aytayotgan edi[9].

¹³Men jonli mavjudotlarning bir — biriga ishqalangan qanotlarining tovushini va yonlaridagi gʻildiraklarning guldurosini eshitdim.

¹⁴Ruh meni boshqa yoqqa olib ketdi. Men achchiqlanib, jahlim chiqa boshladi. Egamizning qudrati meni qamrab olgan edi.

¹⁵Men Kavor daryosining boʻyidagi Tel — Ovuvda yashayotgan surgundagilarning oldiga bordim. Oʻsha yerda yetti kun davomida oʻzimga kela olmay gangib oʻtirdim.

¹⁶Yetti kundan keyin Egamiz menga Oʻz soʻzini ayon qildi:

¹⁷— Ey inson, Men seni Isroil xalqiga soqchi qilib tayinladim. Ogʻzimdan chiqqan har bir gapimni ularga aytib, ogohlantirasan.

¹⁸Agar Men fosiqqa: “Sen albatta oʻlasan”, deb aytsam — u, sen esa oʻsha odamni bu haqda ogohlantirmasang, hayotini saqlab qolay deb, uni fosiqlik yoʻlidan qaytarmasang, oʻsha odam oʻz gunohi uchun[10] oʻladi. Biroq uning oʻlimi uchun Men seni javobgar qilaman.

¹⁹Agarda sen fosiqni ogohlantirsang — u, u esa fosiqlik yoʻlidan qaytmasa, u oʻz gunohi uchun oʻladi, sen esa oʻz joningni asrab qolgan boʻlasan.

²⁰Agar solih kishi yomon yoʻlga kirib, gunohga qoʻl ursa, Men uning oyogʻiga toʻgʻonoq solaman, u qoqilib yiqiladi[11]. Bordi — yu, sen oʻsha odamni ogohlantirmasang, u nobud boʻladi. Men uning qilgan savob ishlarini esga olmayman, u oʻzining gunohi uchun oʻladi. Uning oʻlimi uchun esa seni javobgar qilaman.

²¹Bordi — yu, sen solih kishini yomon yoʻldan qaytarsang, u senga quloq solgani uchun yashaydi. Sen esa oʻz joningni asrab qolgan boʻlasan.

²²Egamiz menga Oʻz qudratini ato etib, shunday dedi: — Qani, tur, vodiyga tush. Men sen bilan oʻsha yerda gaplashaman.

²³Men turib, vodiyga tushdim. Egamizning ulugʻvorligi menga zohir boʻldi. Men u yerda koʻrgan Egamizning ulugʻvorligi xuddi Kavor daryosi boʻyida koʻrgan ulugʻvorlikka oʻxshar edi[12]. Men muk tushdim.

²⁴Ruh vujudimga kirib, meni oyoqlarimga turgʻizib qoʻydi. Soʻng Egamiz menga shunday dedi: — Uyingga kirib, eshiklarni ichidan qulflab ol.

²⁵Koʻchaga chiqa olmasliging uchun seni arqonlar bilan bogʻlashadi.

²⁶Sen bu isyonkor xalqqa tanbeh bera olmasliging uchun, Men seni gung qilib, tilingni tanglayingga yopishtirib qoʻyaman.

²⁷Ammo ularga aytadigan gapim boʻlganda, seni yana tilga kiritaman[13]. Ularga: “Egamiz Rabbiy shunday demoqda”, deb gapirasan. Senga quloq soladiganlar quloq solsin, quloq solishni xohlamaganlar esa solmasin. Axir, ular isyonkor xalq — ku!