Read Uzbek Muqaddas Kitob Hizqiyol 30 Bible Online

Hizqiyol 30 - Uzbek Muqaddas Kitob bible

Hizqiyol 30

¹Egamiz menga Oʻz soʻzini ayon qildi:

²“Ey inson, Misr haqida bashorat qilib ayt: «Egamiz Rabbiy shunday demoqda: Shoʻrimiz qursin, evoh!

³Dahshatli kun yaqinlashdi, Mening gʻazab kunim[156] kelishiga oz qoldi. Mana shu kun bulutli kun boʻladi, Xalqlar kulfat chekadigan zamon boshlanadi.

⁴Misrning boʻgʻziga qilich keladi, Habashiston[157] kulfat azobida qoladi. Misrda koʻp odamlar halok boʻladi, Uning boyligi olib ketiladi, Poydevori buzib tashlanadi.

⁵Habashiston, Liviya, Lidiya[158], butun Arabiston, Kub[159] va Misrning qolgan barcha ittifoqchilari jangda halok boʻladilar.

⁶Egamiz aytmoqda: Misr ittifoqchilarining ustiga qirgʻin keladi. Ular qilich tigʻidan halok boʻlib, jasadlari shimoldagi Migdoldan to janubdagi Savanaygacha yotadi. Misrning magʻrur qudrati halok boʻladi, — deb aytmoqda Egamiz Rabbiy.

⁷— Misr dunyoning eng xarob yurtiga aylanadi, u yerdagi shaharlar vayron boʻladi.

⁸Men Misrga oʻt qoʻyib, uning madadkorlarini tor — mor qilaman. Shunda Egasi Men ekanligimni Misrliklar bilib oladilar.

⁹Oʻsha kuni xotirjam yashayotgan Habashistonliklarni qoʻrqitish uchun Men kemalarda elchilarimni joʻnataman. Misr ustiga kulfat tushgan kuni Habashistonliklar azobda qoladilar. Mana, oʻsha kun hademay keladi.

¹⁰Egamiz Rabbiy shunday demoqda: Men Bobil shohi Navuxadnazar orqali Misrning toʻdasini yakson qilaman.

¹¹Navuxadnazar qoʻshin tortib keladi. Ular oʻtaketgan yovuz xalqdir. Ular butun yurtni xarob qiladilar. Misrliklarni qilichdan oʻtkazib, yurtni jasadlarga toʻldiradilar.

¹²Men Nil havzalarini quritaman, yurtni razil odamlarning qoʻliga beraman. Kelgindilarning qoʻli bilan Misrni va u yerdagi hamma narsani xarob qilaman. Bularni Men aytdim.

¹³Egamiz Rabbiy shunday demoqda: Men barcha butlarni yoʻq qilaman, Nuf[160] ma’budalariga chek qoʻyaman. Misr yurtida bironta hukmdor qolmaydi, Misrliklarni qoʻrquv qamrab oladi.

¹⁴Men Patroʻsni[161] tashlandiq joyga aylantiraman. Zoʻvan shahriga oʻt qoʻyaman, Misr poytaxti Noʻni[162] jazolayman.

¹⁵Misrning mustahkam Sin qal’asini gʻazabimga giriftor qilaman, poytaxt shahar Noʻning toʻdasini qirib tashlayman.

¹⁶Butun Misr yurtiga oʻt qoʻyaman! Sin aholisi cheksiz azobda qoladi, Noʻ shahrining devori yiqitiladi, dushmanlar kuppa — kunduzi Nuf shahriga hujum qiladi.

¹⁷On[163] va Pi — Bashat[164] yigitlari jangda halok boʻlishadi, shaharlar aholisi asirlikka tushadi.

¹⁸Men Misrning hukmronligini yoʻq qilganimda, uning pesh qilgan qudratini sindirganimda, Taxpanxas shahri qorongʻilikka botadi, uni qora bulutlar qoplab oladi. Shahar atrofidagi qishloqlar asirlikka tushadi.

¹⁹Shu yoʻsin Men Misrni jazolayman. Oʻshanda ular Egasi Men ekanimni bilib oladilar.»”

²⁰Surgun boʻlgan paytimizning oʻn birinchi yili birinchi oyining[165] yettinchi kunida Egamiz menga Oʻz soʻzini ayon qildi:

²¹“Ey inson, Men Misr fir’avnining qoʻlini sindirdim. Hech kim uning qoʻlini bogʻlamadi, taxtakachlab qoʻymadi. Endi uning qoʻli shifo topmaydi, qilich ushlashga qodir boʻlmaydi.

²²Men fir’avnga qarshiman, — deb aytmoqda Egamiz Rabbiy. — Uning ikkala qoʻlini — sogʻ qoʻlini ham, singan qoʻlini ham sindiraman. Qoʻlidagi qilichni yerga tushirib yuboraman.

²³Misrliklarni xalqlar orasiga tarqatib tashlayman, boshqa yurtlarga quvib yuboraman.

²⁴Bobil shohining kuchiga esa kuch qoʻshib, qoʻllariga qilichimni tutqazaman. Ha, Men fir’avnning qoʻllarini sindiraman, u dushmani oldida ogʻir yaralangan odam kabi ingraydi.

²⁵Uning qoʻllari arqonday osilib qoladi, Bobil shohining qoʻllarini esa Men kuchli qilaman. Uning qoʻllariga qilichimni tutqazib, Misrga qarshi yuboraman. Shunda Egasi Men ekanligimni Misrliklar bilib oladilar.

²⁶Ha, Men Misrliklarni xalqlar orasiga tarqatib tashlayman, boshqa yurtlarga quvib yuboraman. Oʻshanda Egasi Men ekanligimni ular bilib oladilar.”