Read Uzbek Muqaddas Kitob Hizqiyol 39 Bible Online

Hizqiyol 39 - Uzbek Muqaddas Kitob bible

Hizqiyol 39

¹Egamiz menga dedi: “Ey inson, Goʻgga qarshi bashorat qilib ayt: «Egamiz Rabbiy shunday demoqda: ey Meshex va Tuvalning bosh hukmdori[206] Goʻg, Men senga qarshiman!

²Men seni orqaga qaytarib, sudrab kelaman. Seni uzoq shimoldan olib chiqib, Isroil togʻlariga olib kelaman.

³Chap qoʻlingdagi yoying va oʻng qoʻlingdagi oʻqlaringni urib tushiraman.

⁴Sen Isroil togʻlarida jon berasan! Sening hamma lashkarlaring va senga ergashib kelgan xalqlar u yerda halok boʻlishadi. Ularning jasadlari turli yirtqich qushlarga va yovvoyi hayvonlarga oʻlja boʻladi.

⁵Sen ochiq maydonda oʻlasan. Buni Men aytdim.

⁶Men Magoʻg ustiga va dengiz qirgʻogʻida osoyishta hayot kechirayotgan barcha xalqlar ustiga olov yogʻdiraman. Oʻshanda barcha xalqlarning Egasi Men ekanligimni ular bilib oladilar.»

⁷Ey inson, Men Oʻz muqaddasligimni xalqim Isroilga ayon qilaman. Meni badnom qilishlariga endi yoʻl qoʻymayman. Shunda barcha xalqlar Men, Isroil xalqining Xudosini muqaddas deb biladilar, ularning Egasi Men ekanligimni bilib oladilar.

⁸Men aytgan oʻsha kun albatta keladi, — deb aytmoqda Egamiz Rabbiy. —

⁹Shunda Isroil xalqi shaharlardan chiqib, magʻlub boʻlgan yovning qurol — aslahalarini yigʻadi. Ular yigʻib olgan kattayu kichik qalqonlarni, yoy va oʻqlarni, tayoq va nayzalarni yoqishadi. Yetti yil davomida ularni oʻtin oʻrniga ishlatishadi.

¹⁰Oʻtin yigʻish, oʻrmonda daraxt kesishga ehtiyoj qolmaydi, chunki bu qurol — aslahalar xalqim uchun yoqilgʻi boʻladi. Shu tariqa Isroil xalqi oʻz talonchilaridan oʻch oladi.” Egamiz Rabbiyning kalomi shudir.

¹¹Egamiz menga dedi: “Ey inson, bu hodisalar roʻy bergan kuni Goʻg va uning toʻdasi uchun Men bir qabriston hozirlayman. Bu qabriston Oʻlik dengizning sharq tomonidagi Sayyohlar vodiysida joylashgan boʻladi. U sayyohlarning yoʻlini toʻsib qoʻyadi. Shuning uchun sayyohlar oʻsha vodiyning nomini oʻzgartirib, uni «Goʻg toʻdasining vodiysi» deb ataydigan boʻlishadi.

¹²Isroil xalqi yetti oy mobaynida jasadlarni koʻmib, oʻz yurtini poklaydi.

¹³Butun yurt aholisi jasadlarni koʻmadi. Shu qilganlari uchun Men ulugʻvorligimni namoyon qilgan kunda ular yuksak obroʻga erishadi, — deb aytmoqda Egamiz Rabbiy.

¹⁴— Yetti oy oʻtgach, yurtni poklaydigan maxsus odamlar tayinlanadi. Ular yurtni kezib, koʻmilmay qolib ketgan jasadlarni koʻmadilar.

¹⁵Ular yurtni kezib yurganlarida topilgan har bir suyak oldiga belgi qoʻyadilar. Goʻrkovlar bu suyaklarni yigʻib olib, «Goʻg toʻdasining vodiysi»ga koʻmadilar.

¹⁶Qabriston yonidagi shaharning nomi ham Toʻda boʻladi. Shunday qilib, ular yurtni poklaydilar.

¹⁷Ey inson, turli xil qushlarni va hamma yovvoyi hayvonlarni yigʻib, ularga shunday deb ayt: «Egamiz Rabbiy demoqda: qani, kelinglar! Men sizlar uchun qurbonlik hozirlayman, Isroil togʻlarida katta ziyofat uyushtiraman. Sizlar toʻyguningizcha goʻshtdan yeb, qondan ichasizlar.

¹⁸Bashan oʻlkasida semirtirilgan qoʻchqor, qoʻzichoq, echki va buqalar boʻgʻizlanganday, bahodir jangchilaru jahon hukmdorlari qurbon qilinadi. Sizlar ularning tanalarini yeb, qonini ichasizlar.

¹⁹Men sizlar uchun uyushtiradigan bu ziyofatda sizlar toʻyguningizcha yogʻdan yeysizlar, mast boʻlguningizcha qondan ichasizlar.

²⁰Sizlar Mening dasturxonimdan xohlaganingizcha ot va otliqlarning goʻshtidan, sipoh va turli xil jangchilarning goʻshtidan tanovul qilasizlar. Egamiz Rabbiyning kalomi shudir.»

²¹Men Oʻz ulugʻvorligimni xalqlar orasida namoyon qilaman. Xalqlarni jazolab, ularga Oʻz qudratimni koʻrsataman.

²²Oʻsha kundan boshlab, Isroil xalqi Egasi Xudo Men ekanligimni biladi.

²³Isroil xalqi gunoh qilib, Menga xiyonat qilgani uchun, Men ularni begona yurtlarga surgun qilganimni boshqa xalqlar tushunib olishadi. Xalqimning bu qilmishi uchun Men ulardan yuz oʻgirib, dushmanlarning qoʻliga topshirgan edim, qirilib ketishlariga toʻsqinlik qilmadim.

²⁴Men ulardan yuz oʻgirdim, buzuqligi va qilgan gunohlariga yarasha jazosini berdim.”

²⁵Egamiz Rabbiy shunday demoqda: “Mana endi Men Yoqub naslini yana farovonlikka erishtiraman[207]. Butun Isroil xalqiga shafqat koʻrsataman. Obroʻyim toʻkilishiga yoʻl qoʻymayman!

²⁶Ular oʻz yurtiga qaytib kelganlaridan keyin oʻtmishdagi sharmandagarchiligi va Menga qilgan xiyonatiga iqror boʻladilar. Ular tinch yashaydilar, hech kim ularga tahdid qilmaydi.

²⁷Men ularni gʻanimlarning yurtlaridan olib chiqqanimda, xalqlar muqaddasligimni koʻrishadi.

²⁸Egasi Xudo Men ekanligimni xalqim bilib oladi. Garchi Men ularni oʻzga yurtlarga tarqatib yuborgan boʻlsam — da, ularni ona yurtiga qaytarib olib kelaman. Xalqimdan birontasi ham begona yurtda qolib ketmaydi.

²⁹Men xalqim Isroil ustiga Oʻz Ruhimdan yogʻdiraman, endi ulardan yuz oʻgirmayman.” Egamiz Rabbiyning kalomi shudir.