Read Uzbek Muqaddas Kitob Hizqiyol 41 Bible Online

Hizqiyol 41 - Uzbek Muqaddas Kitob bible

Hizqiyol 41

¹Keyin oʻsha odam[217] meni Ma’badning asosiy xonasiga[218] olib kirdi. U asosiy xona eshigining ikki yon devorini oʻlchadi. Yon devorlarning qalinligi 6 tirsak[219] chiqdi.

²Ostonaning eni 10 tirsak, ostona ikki yon devorlarining uzunligi 5 tirsakdan chiqdi. Soʻngra oʻsha odam asosiy xonani oʻlchadi. Xonaning uzunligi 40 tirsak, eni 20 tirsak chiqdi.

³Keyin u asosiy xonadan Ma’badning ichki xonasiga kirib, ichki xona eshigining yon devorlarini oʻlchadi. Yon devorlarning qalinligi 2 tirsak chiqdi. Ostonaning eni 6 tirsak, ostona ikki yon devorlarining uzunligi esa 7 tirsakdan chiqdi.

⁴Oʻsha odam ichki xonani ham oʻlchadi. Ichki xonaning uzunligi bilan eni bir xil — 20 tirsakdan chiqdi. U menga: “Bu Eng muqaddas xona”, deb tushuntirdi.

⁵Soʻng oʻsha odam Ma’bad devorini oʻlchadi. Devorning eni 6 tirsak chiqdi. Ma’badning tashqi devoriga taqab yon xonalar qurilgan edi. Xonalarning uzunligi 7 tirsak edi.

⁶Xonalar uch qavat qilib qurilgan boʻlib, har bir qavatda oʻttiztadan xona bor edi. Ma’badning devorlari uch pogʻonali zina shaklida boʻlib, xonalarga tayanch boʻlib xizmat qilar edi. Shu sababdan Ma’bad devorlarining oʻzi butun edi.

⁷Ma’bad devorining quyi qismi yuqori qismiga nisbatan qalinroq boʻlgani uchun tepadagi xonalar kengroq edi. Zinapoya orqali pastki qavatdan ikkinchi qavatga, soʻng uchinchi qavatga chiqilar edi.

⁸Men Ma’bad atrofida balandligi 6 tirsak boʻlgan poydevor borligini ham koʻrdim. Yon xonalar mana shu poydevor ustiga qurilgan edi.

⁹Yon xonalarning tashqi devori 5 tirsak qalinlikda edi. Yon xonalar va

¹⁰ichki hovlining devori boʻylab qurilgan hujralar orasidagi masofa 20 tirsak edi. Ma’badning gir aylanasi hovli edi.

¹¹Yon xonalarga ikkita eshik orqali kirilar edi. Bir eshik shimol tomonda, boshqasi janub tomonda joylashgan edi. Yon xonalar tevaragida boʻsh qolgan joyning eni 5 tirsak edi.

¹²Ma’bad hovlisining gʻarb tomonida katta bir imorat bor edi. Imoratning eni 70 tirsak, uzunligi 90 tirsak, devorlarning qalinligi 5 tirsak edi.

¹³Oʻsha odam Ma’badning uzunligini oʻlchadi. Ma’badning uzunligi 100 tirsak chiqdi. Soʻng u Ma’badning orqa devoridan gʻarbdagi imoratning orqa devorigacha boʻlgan masofani oʻlchadi, masofa 100 tirsak chiqdi.

¹⁴Ma’badning old tomonidagi, ya’ni sharq tomondagi hovlining eni ham 100 tirsak chiqdi.

¹⁵Soʻngra u odam hovlining gʻarbida joylashgan imoratning uzunligini oʻlchadi. Imorat va uning ikki yon tomonidagi xonalarning uzunligi 100 tirsak chiqdi. Ma’badning ayvoni, asosiy xonasi va ichki xonasi

¹⁶yerdan derazalargacha yogʻoch bilan qoplangan edi. Ma’badning ostonalari, panjarali derazalari va yon xonalari yogʻoch bilan pardoz qilingan edi.

¹⁷Ma’badning ichkaridagi hamma devorlariga, eshiklarning tepalarigacha oʻyma naqshlar solingandi.

¹⁸Hamma devorlarga karublarning suratlari oʻyilgan edi. Karublarning orasiga palma daraxtining suratlari ham oʻyilgandi. Har bir karubning ikkitadan yuzi bor edi.

¹⁹Karubning inson yuziga oʻxshagan yuzi bir tomondagi palma daraxtiga, sher yuziga oʻxshagan boshqa bir yuzi boshqa tomondagi palma daraxtiga qaratilgan edi. Bunday suratlar Ma’badning ichki devorining gir aylanasiga,

²⁰yerdan eshiklar ustidagi devorlargacha oʻyilgan edi.

²¹Asosiy xona eshigining kesakisi[220] toʻrtburchak shaklida yasalgan edi. Eng muqaddas xonaning roʻparasida

²²qurbongohga oʻxshash bir narsa bor edi. Uning boʻyi 3 tirsak, uzunligi va eni 2 tirsak edi. Burchaklari, asosi va yon tomonlari yogʻochdan yasalgan edi. Oʻsha odam menga shunday dedi: “Bu Egamiz huzurida turadigan xontaxtadir.”

²³Asosiy xonaning va Eng muqaddas xonaning[221] eshiklari bor edi.

²⁴Eshiklarning har biri ikki tavaqali, yigʻma edi.

²⁵Asosiy xona eshiklarining yuzasiga devordagiday karublar va palma daraxtlarining suratlari oʻyilgan edi. Ma’bad ayvonining oldi tomoniga yogʻoch bostirma qurilgan edi.

²⁶Ayvon yon devorlarining panjarali derazalari bor edi. Devorlarga palma daraxtining suratlari oʻyilgan edi. Ma’baddagi yon xonalarning kiraverishiga yogʻoch bostirmalar qurilgandi.