Read Uzbek Muqaddas Kitob Hizqiyol 45 Bible Online

Hizqiyol 45 - Uzbek Muqaddas Kitob bible

Hizqiyol 45

¹Egamiz dedi: “Isroil qabilalariga yerni boʻlib berayotganingizda, Men, Egangizga tegishli qismini ham ajratib qoʻyinglar. Menga ajratilgan hududning uzunligi 25.000 tirsak[236], eni 20.000 tirsak[237] boʻlsin. Butun hudud tabarruk hisoblansin.

²Hududning 500 tirsakka 500 tirsak boʻlgan toʻrtburchak yeri Ma’bad uchun ajratiladi. Uning atrofi 50 tirsak masofada ochiq joy boʻladi.

³Tabarruk hududning yarmi muqaddas maskanda Menga xizmat qilgan ruhoniylarga qarashli boʻladi. Uzunligi 25.000 tirsak, eni 10.000 tirsak boʻlgan hududning bu qismida ruhoniylarning uylari va Ma’bad joylashadi. Bu eng muqaddas joy boʻladi.

⁵Tabarruk hududning ikkinchi yarmi Ma’baddagi yumushlarni bajarayotgan levilarga qarashli boʻladi. Ular yashaydigan shaharlar shu yerda joylashadi[238].

⁶Tabarruk hududning yoniga uzunligi 25.000 tirsak, eni 5000 tirsak boʻlgan yerni qoʻshinglar. Bu yerda shahar joylashadi. Isroil xalqidan boʻlgan har qanday odam kelib, bu shaharda yashasa boʻladi.

⁷Taxtda oʻtirgan hukmdorga alohida yer berilsin. Unga beriladigan yerning bir qismi tabarruk hududning gʻarbiy chegarasidan Oʻrta yer dengizigacha choʻzilsin. Ikkinchi qismi tabarruk hududning sharqiy chegarasidan Iordan daryosigacha choʻzilsin. Demak, hukmdorga qarashli yerning uzunligi Isroil qabilalariga ajratilgan yerning uzunligi bilan bir xil boʻladi.

⁸Bu hukmdorning ulushidir. Bundan buyon hukmdorlar xalqimga zulm oʻtkazmaydilar, Isroil qabilalari oʻz yerlariga oʻzlari egalik qiladilar.

⁹Isroil hukmdorlariga ayt: «Egamiz Rabbiy shunday demoqda: zoʻravonligu zulmingizni bas qiling! Adolatu toʻgʻrilik ila ish tuting. Xalqimni oʻz yeridan mahrum qilmang, — deb aytmoqda Egamiz Rabbiy.

¹⁰— Doim toʻgʻri oʻlchovni[239] va toʻgʻri tarozini ishlating:

¹¹sochiluvchan quruq narsalarni oʻlchash uchun efa oʻlchov birligidan foydalaning, suyuq narsalarni oʻlchash uchun bat oʻlchov birligidan foydalaning. Efa va batning hajmi bir xil boʻlsin. Efa ham, bat ham hoʻmrning[240] oʻndan bir qismini sigʻdirsin.

¹²Ogʻirlik birligi sifatida shaqalni ishlating. Bir shaqal 20 geraga, bir mina 60 shaqalga toʻgʻri kelsin[241].»

¹³Hukmdorga quyidagi miqdorda soliq toʻlansin: Bugʻdoy hosilining oltmishdan bir qismi[242]. Arpa hosilining oltmishdan bir qismi.

¹⁴Zaytun moyining bir foizi[243]. (Zaytun moyini oʻlchash uchun bat oʻlchov birligidan foydalaning. Oʻn bat bir korga, ya’ni bir hoʻmrga[244] toʻgʻri keladi.)

¹⁵Suruvdagi ikki yuzta qoʻydan biri. Bular don nazri, kuydiriladigan va tinchlik qurbonliklari sifatida xalqni gunohlaridan poklash uchun keltiriladi, — deb aytmoqda Egamiz Rabbiy.

¹⁶— Butun Isroil xalqi bu nazrlarni hukmdorga berishi lozim.

¹⁷Hukmdor yangi oy shodiyonasida, Shabbat va boshqa bayramlarda keltiriladigan qurbonliklaru nazrlar uchun hayvonlarni, don va sharobni ta’minlab berishi shart. Isroil xalqini gunohlaridan poklash uchun keltiriladigan gunoh, tinchlik va kuydiriladigan qurbonliklar hamda don nazri uchun hukmdor mas’uldir.”

¹⁸Egamiz Rabbiy menga dedi: “Birinchi oyning[245] birinchi kunida Ma’badni poklash uchun nuqsonsiz bir buqani qurbonlik qil.

¹⁹Ruhoniy bu gunoh qurbonligining qonidan olib, Ma’bad eshiklarining kesakisiga[246], qurbongohning toʻrt burchagiga va ichki hovli darvozalarining yondorlariga surtsin.

²⁰Birinchi oyning yettinchi kuni ham xuddi shunday qilsin va shu yoʻl bilan xalqning bilmay qilgan gunohlarini yuvsin. Shunda Ma’bad pok boʻladi.”

²¹Soʻng Egamiz dedi: “Birinchi oyning oʻn toʻrtinchi kunidan boshlab, Fisih ziyofatini va yetti kun davomida Xamirturushsiz non bayramini[247] nishonlanglar. Oʻsha vaqt davomida xamirturushsiz non yenglar.

²²Bayramning birinchi kunida hukmdor oʻzining va butun xalqning gunohlari uchun bir buqani gunoh qurbonligi qilib, olib kelsin.

²³U bayramning yetti kuni davomida Menga kuydiriladigan qurbonlik uchun har kuni yettitadan buqa va yettitadan nuqsonsiz qoʻchqor yetkazib bersin. Bundan tashqari, har kuni gunoh qurbonligi uchun bittadan taka bersin.

²⁴Qurbonlik qilinadigan har bir buqa va har bir qoʻchqor bilan birga bir togʻora[248] don va sakkiz kosa[249] zaytun moyini bersin.

²⁵Yettinchi oyning[250] oʻn beshinchi kunida boshlanadigan Chayla bayrami[251] uchun ham, yetti kun davomida keltiriladigan gunoh qurbonliklari, kuydiriladigan qurbonliklar, don va zaytun nazrlarini yetkazib tursin.”