Read Uzbek Muqaddas Kitob Hizqiyol 47 Bible Online

Hizqiyol 47 - Uzbek Muqaddas Kitob bible

Hizqiyol 47

¹Oʻsha odam[261] meni Ma’badning eshigi yoniga olib bordi. Qarasam, Ma’bad ostonasidan bir irmoq oqib chiqayotgan ekan. Ostonaning janub tomonidan chiqqan bu irmoq qurbongohning janubidan oʻtib, sharqqa oqayotgan edi.

²Soʻng oʻsha odam meni shimoliy darvoza orqali tashqariga olib chiqdi. Biz aylanib, Ma’badning sharqiy darvozasi yoniga bordik. Irmoq sharqiy darvozaning janub tomonidan jildirab oqib chiqayotgan edi.

³Oʻsha odam qoʻlidagi arqon bilan sharq tomonga oqayotgan bu irmoqning uzunligini oʻlchay boshladi. U 1000 tirsak[262] oʻlchab boʻlgandan soʻng, menga irmoqdan kechib oʻtishimni buyurdi. Oʻsha yerdagi suv toʻpigʻimgacha kelar edi.

⁴Soʻng yana 1000 tirsak oʻlchab, irmoqdan kechib oʻtishimni buyurdi. Bu safar suv tizzamgacha chiqdi. Keyingi 1000 tirsak masofadan soʻng suv belimgacha chiqdi.

⁵Soʻng u odam yana 1000 tirsak oʻlchadi, bu yerda irmoq oʻtib boʻlmaydigan bir daryoga aylangan edi. Daryo shu qadar chuqur ediki, uni faqat suzib oʻtsa boʻlar edi.

⁶Shunda u odam menga: “Ey inson, koʻrgan bu narsani doim yodingda tut”, — dedi — da, meni qirgʻoqqa boshlab ketdi.

⁷Qirgʻoqqa chiqqanimizdan soʻng, men daryoning ikki tomonida oʻsayotgan juda koʻp daraxtlarni koʻrdim.

⁸Odam menga dedi: “Bu daryo sahro orqali Iordan vodiysiga[263] oqib, Oʻlik dengizga quyiladi. Shunda Oʻlik dengizning shoʻr suvlari shirin boʻladi.

⁹Daryo oqib borgan hamma joyda sudraluvchilar yashaydi, baliqlar toʻlib — toshadi. Shirin boʻlgan bu suvlar oqib oʻtgan hamma joyda hayot boshlanadi.

¹⁰Odamlar Oʻlik dengizning qirgʻoqlarida turib baliq tutishadi, En — Gedidan En — Exlayimgacha[264] boʻlgan joyda toʻrlarini quritishadi. Oʻrta yer dengizidagi[265] kabi, baliqlarning turi koʻp boʻladi.

¹¹Biroq botqoqliklar bilan xalqoblarning suvlari yangilanmaydi. Ular tuz manbayi boʻlib qoladi.

¹²Daryoning ikki tomonida turli xil mevali daraxtlar oʻsadi. Ular har oyda yangi mevalar tugadi, barglari hech qachon soʻlimaydi. Ma’baddan chiqqan suv ularni sugʻorgani uchun ular hech qachon hosildan qolmaydi. Ularning mevalari ozuqa boʻladi, barglari shifo keltiradi.”

¹³Soʻng Egamiz Rabbiy shunday dedi: “Yurtni Isroilning oʻn ikki qabilasiga boʻlib berayotganingizda quyidagi koʻrsatmalarga rioya qilinglar: Yusuf avlodlariga[266] ikki ulush yer berilsin.

¹⁴Men ota — bobolaringizga ont ichib, va’da qilgan bu yerni qabilalar orasida teng boʻlinglar. Bu yer sizning mulkingiz boʻladi.

¹⁵Shimoliy chegarangiz Oʻrta yer dengizidan boshlanib, sharqqa — Xetlon shahri tomon boradi, soʻng Levo — Xomat[267] orqali oʻtib, Zadod shahrigacha davom etadi.

¹⁶Keyin Damashq va Xomat oraligʻidagi[268] Baroʻtax va Sivrayim shaharlarigacha borib, Xavron chegarasidagi Xazer — Xatikongacha choʻziladi.

¹⁷Shunday qilib, shimoliy chegarangiz Oʻrta yer dengizidan sharqdagi Xazor — Enan shahrigacha boradi. Xazor — Enan shahri janubdagi Damashq va shimoldagi Xomat hududlari orasida joylashgan.

¹⁸Sharqiy chegara Xavron va Damashq hududlari orasida boshlanib, Isroil va Gilad yerlari oʻrtasidan oqib oʻtgan Iordan daryosi boʻylab boradi. Oʻlik dengizdan ham oʻtib, janubdagi Tamar shahrigacha yetib boradi. Mana shu sharqiy chegaradir.

¹⁹Janubiy chegara Tamar shahridan boshlanib, Kadeshdagi Mariva suvlarigacha boradi, keyin Misr chegarasidagi irmoq[269] boʻylab borib, Oʻrta yer dengizigacha yetadi. Bu janubiy chegaradir.

²⁰Oʻrta yer dengizining qirgʻogʻi gʻarbiy chegarani tashkil qilib, Levo — Xomatning gʻarbdagi shimoliy chegarasi boshlangan joyigacha boradi.

²¹Bu yerlarni Isroil qabilalariga boʻlib beringlar.

²²Ular bu yerlarni qur’a boʻyicha[270] meros qilib olsinlar. Bolalari Isroilda tugʻilgan orangizdagi musofirlarga ham yeringizdan ulush beringlar. Ularni Isroilning mahalliy aholisi deb bilinglar. Ularga oʻzingiz qatori Isroil qabilalari orasidan yerni mulk qilib beringlar.

²³Ular qaysi qabila orasida yashashsa, oʻsha qabila hududidan yer olishsin.” Egamiz Rabbiyning kalomi shudir.