Read Uzbek Muqaddas Kitob Hizqiyol 5 Bible Online

Hizqiyol 5 - Uzbek Muqaddas Kitob bible

Hizqiyol 5

¹Egamiz shunday dedi: “Ey inson, oʻtkir bir qilich ol. Ustara oʻrniga oʻshani ishlatib, soching bilan soqolingni qirib tashla[20]. Soʻng sochingni tarozida oʻlchab, teng uch qismga boʻl.

²Shaharning qamal kunlari tugaganda, sochingning bir qismini gʻishtga chizilgan shahar oʻrtasida yondir. Ikkinchi qismini shahar atrofiga sochib tashlab, qilich bilan maydala. Uchinchi qismini esa shamolda uchirtirib yuborgin. Men qilichimni yalangʻochlab, shahar aholisini ta’qib qilaman.

³Sochingning ozginasini olib, choponing etagiga qistirib qoʻy.

⁴Oʻsha sochingning bir qismini olovga tashlab, yondirib yubor. Undan chiqqan olov avj olib, butun Isroil xalqiga yoyiladi.”

⁵Egamiz Rabbiy shunday deb aytmoqda: “Mana, Quddusga bir qarang. Men uni xalqlarning oʻrtasiga joylashtirdim, boshqa yurtlar uni oʻrab turibdi.

⁶Ammo u qonun — qoidalarimga qarshi chiqdi, atrofdagi xalqlardan koʻra, koʻproq qabihlik qildi. U qonun — qoidalarimni rad etdi, farmonlarimga boʻysunmadi.”

⁷Shuning uchun Egamiz Rabbiy Quddusga aytmoqda: “Sizlar badkirdorlikda atrofingizdagi xalqlardan ham oʻtib tushdingiz. Farmonlarimga boʻysunmadingiz, qonun — qoidalarimga rioya qilmadingiz. Axloqsizlikda boshqa xalqlardan battar boʻldingiz.

⁸Ey Quddus ahli, Men Oʻzim sizlarga qarshi chiqaman, — deb aytmoqda Egamiz Rabbiy. — Xalqlarning koʻzi oldida sizlarni jazolayman.

⁹Qilgan jirkanch ishlaringiz tufayli Men boshingizga dahshatli bir koʻrgilik keltiraman. Men bunaqasini hech qachon qilmaganman va bundan keyin ham qilmayman.

¹⁰Quddusda ota — onalar oʻz farzandlarining etini, farzandlar esa oʻz ota — onalarining etini yeydilar. Men sizlarni jazolayman, omon qolganlaringizni dunyoning toʻrt tomoniga tarqatib yuboraman.

¹¹Men, Egangiz Rabbiy, barhayot Xudo boʻlganim haqi ont ichib aytamanki, sizlarni yoʻq qilaman. Sizlar muqaddas maskanimni makruh butlaru jirkanch odatlaringiz bilan harom qildingiz. Shuning uchun sizlarga achinmayman, rahm qilmayman.

¹²Xalqingizning uchdan bir qismi oʻlatu qahatchilikdan nobud boʻladi. Ikkinchi qismi jangda, shahar tashqarisida qirilib ketadi. Qolgan qismini esa Men toʻrt tomonga tarqatib yuboraman, qilichimni yalangʻochlab ta’qib qilaman.

¹³Shunda gʻazabimdan tushaman, qahrimni sizlarga sochib boʻlganimdan keyingina taskin topaman. Qahrimni sizlarga sochib boʻlganimdan keyin, Men, Egangiz, rashk ustida gapirganimni sizlar bilib olasiz.

¹⁴Men sizlarni xonavayron qilaman. Yon — atrofda yashovchi xalqlar hamda oʻtgan — ketgan odamlar sizlarni mazax qiladilar.

¹⁵Men sizlarni qahru gʻazab bilan hukm qilganimda, jahl ustida qattiq jazolaganimda, atrofdagi xalqlar dahshatga tushadilar. Ular bundan saboq oladilar, sizlarni esa mazax qilib, ustingizdan kuladilar. Bularni Men, Egangiz, aytdim.

¹⁶Men ustingizga qahatchilikning halokatli oʻqlarini yogʻdiraman, sizlarni yoʻq qilaman. Shahardagi ocharchilikni avjiga chiqaraman, sizlarni bir burda nonga zor qilaman.

¹⁷Men sizlarni qahatchilikka giriftor qilaman, ustingizga yovvoyi hayvonlarni yuboraman. Ular sizlarni farzandlaringizdan judo qiladi. Yurtingizda oʻlat va qotillik hukm suradi, Men sizlarga qarshi dushman qilichini yalangʻochlayman. Bularni Men, Egangiz, aytdim.”