Read Uzbek Muqaddas Kitob Hizqiyol 8 Bible Online

Hizqiyol 8 - Uzbek Muqaddas Kitob bible

Hizqiyol 8

¹Surgun boʻlgan paytimizning oltinchi yili oltinchi oyining[26] beshinchi kunida Yahudo oqsoqollari meni koʻrgani uyimga kelishdi. Men ular bilan oʻtirganimda, Egam Rabbiyning qudrati meni qamrab oldi.

²Qarasam, inson qiyofasidagi bir kishi turibdi. Oʻsha kimsaning belidan pastki qismi olovday chaqnar edi. Yuqori qismi esa sayqallangan misday nur taratib turar edi.

³U qoʻlga oʻxshash bir uzvini uzatib, meni sochimdan tutdi. Soʻng Ruh meni zamin uzra koʻtardi — da, Xudoning mana shu vahiysida Quddus shahriga olib ketdi. U meni Ma’badning ichki hovlisidagi shimoliy darvozaning[27] oldida turgan katta bir but oldiga olib bordi. Bu but Xudoning rashkini qoʻzgʻatardi.

⁴Oʻsha yerda Isroil Xudosining ulugʻvorligi bor edi. Men bunday vahiyni vodiyda ham koʻrgan edim[28].

⁵Xudo menga shunday dedi: “Ey inson, shimol tomonga nazar tashla.” Men shimol tomonga nazar tashladim. Xudoning rashkini qoʻzgʻatadigan oʻsha but qurbongoh yonidagi darvozaning kiraverishida turardi.

⁶Shunda Xudo menga dedi: “Ey inson, xalqimning qilmishini koʻrdingmi? Ular bu yerda jirkanch ishlarni qilib, Meni muqaddas maskanimdan haydab yubormoqchilar. Qani yur, Men senga bundan battarini ham koʻrsataman.”

⁷U meni Ma’badning tashqi hovlisi kiraverishiga olib bordi. Qarasam, devorda bir teshik bor ekan.

⁸U menga dedi: “Ey inson, qani boʻl, devordagi teshikni kattalashtir.” Men devordagi teshikni kattalashtirdim, shunda bir eshikka duch keldim.

⁹Xudo menga dedi: “Ichkariga kir. Bu yerda qilinayotgan oʻtaketgan jirkanch ishlarni oʻz koʻzing bilan koʻrib qoʻy.”

¹⁰Men ichkariga kirdim. Devorlarning hamma yogʻiga sudralib yuruvchi jonivorlarning va harom hayvonlarning[29] rasmlari hamda Isroil xalqi sigʻinadigan barcha butlarning tasvirlari solingan edi.

¹¹Tasvirlarning oldida Isroil xalqining yetmishta oqsoqoli turgan edi. Shofon oʻgʻli Yazaniyo ham oʻshalarning orasida edi. Har birining qoʻlida bittadan olovkurak bor edi. Olovkuraklardan yonayotgan tutatqilarning xushboʻy tutuni koʻtarilardi.

¹²Xudo dedi: “Ey inson, Isroil oqsoqollarining butlarga toʻla qorongʻi xonada nima qilayotganini koʻrdingmi? Ular shunday deydilar: «Egamiz bizni koʻrmayapti, U yurtimizni tark etgan.»”

¹³Soʻng Xudo yana dedi: “Qarab tur, Men senga bundan ham battarrogʻini koʻrsataman.”

¹⁴Keyin Egamiz meni uyining shimoliy darvozasi yoniga olib bordi. U yerda xotinlar oʻtirib, xudo Tammuz uchun qaygʻurib yigʻlayotgan edilar[30].

¹⁵Shunda Xudo dedi: “Ey inson, buni koʻrdingmi?! Men senga bundan ham battarrogʻini koʻrsataman.”

¹⁶Egamiz meni uyining ichki hovlisiga olib kirdi. Uyning kiraverishida, ayvon va qurbongoh orasida yigirma besh nafar kishi turar edi. Ular Ma’badga orqasini oʻgirib, sharqdan chiqayotgan quyoshga sajda qilayotgan edilar.

¹⁷Egamiz menga shunday dedi: “Ana koʻrdingmi, inson? Yahudo xalqining mana shu yerda qilayotgan jirkanch ishlari yetmasmidi?! Ular butun yurtni zoʻravonlikka toʻldirmoqdalar, qayta — qayta qahrimni keltirmoqdalar. Meni haqorat qilayotganlarini[31] bir koʻrib qoʻy!

¹⁸Shuning uchun Men ularning ustiga gʻazabimni sochaman. Ularga achinmayman, rahm qilmayman. Ovozlari boricha Menga xitob qilishsa ham, ularga quloq solmayman.”