Read Uzbek Muqaddas Kitob Doniyor 1 Bible Online

Doniyor 1 - Uzbek Muqaddas Kitob bible

Doniyor 1

¹Yahudo[1] shohi Yohayiqim hukmronligining uchinchi yilida[2] Bobil shohi Navuxadnazar Quddusga qoʻshin tortib kelib, shaharni qamal qildi.

²Rabbiy Yohayiqimni Navuxadnazarning qoʻliga berdi[3]. Navuxadnazar Xudoning uyidagi ayrim idishlarni oʻlja qilib, Bobil[4] yurtiga olib bordi — da, idishlarni oʻz xudosining uyidagi xazinaga joylashtirdi.

³U saroyning bosh mulozimi[5] Ashnapazga shunday buyruq bergan edi: “Isroil xalqidan olingan asirlardan shoh va zodagonlarning oilalariga mansub boʻlgan

⁴yigitlarni olib kel. Ular yosh, jismonan sogʻlom, xushqomat, zehni oʻtkir, qobiliyatli, farosatli, xullas, shoh saroyida xizmat qilishga layoqatli boʻlishsin. Sen ularga bobil tilini[6] va adabiyotini oʻrgatishing kerak.

⁵Har kungi yegulik bilan sharob ularga mening dasturxonimdan berilsin. Ular uch yil ta’lim olishgach, mening huzurimda hozir boʻlishlari lozim.”

⁶Tanlanganlarning orasida Yahudo qabilasidan boʻlgan Doniyor, Xanoniyo, Mishail va Ozariyo ismli oʻspirinlar bor edi.

⁷Bosh mulozim ularning ismlarini oʻzgartirib, Doniyorni — Beltashazar, Xanoniyoni — Shadrax, Mishailni — Meshax, Ozariyoni esa Abednaxu deb atadi.

⁸Doniyor shohona yegulik va sharobdan bulgʻanishni xohlamadi[7]. Bu taomlardan u voz kechmoqqa ahd qilib, bosh mulozimdan buning uchun ijozat soʻradi.

⁹Xudoning irodasi bilan Doniyor bosh mulozimning muruvvatiyu iltifotiga sazovor boʻlgan edi.

¹⁰Ammo bosh mulozim Doniyorning taklifini eshitib lol qoldi va dedi: “Yoʻq, yegulik bilan ichimliklarni sizlarga[8] shoh hazratlarining oʻzlari belgilaganlar. Hazratimning buyruqlaridan bosh tortishdan qoʻrqaman. Bordi — yu, koʻrinishlaring tengdoshlaringnikidan yomonroq boʻlsa, mening jonimni xavf ostiga qoʻygan boʻlasizlar.”

¹¹Keyin Doniyor bu masala xususida bosh mulozim tayinlagan soqchi bilan gaplashdi, chunki bu soqchi Doniyor va uning uch ogʻaynisi uchun mas’ul bir odam edi. U soqchiga shunday dedi:

¹²“Iltimos, qullaringizni oʻn kun davomida sinab koʻring. Bizga yegani sabzavot, ichgani suv bering.

¹³Keyin esa bizni shohona yegulikni yegan yigitlar bilan solishtirib koʻring, soʻng bilganingizni qilavering.”

¹⁴Soqchi rozi boʻlib, ularni oʻn kun davomida sabzavotlar bilan boqdi.

¹⁵Oʻn kun oʻtgach, ularning gavdalari toʻlishib, shohona yegulik yegan boshqa yigitlardan ancha koʻrkam boʻldi.

¹⁶Shunday qilib, soqchi ularning shohona yeguliklari va sharobini oʻziga olib qolib, ularga faqat sabzavotlar beradigan boʻldi.

¹⁷Xudo bu toʻrtta yigitga adabiyot va falsafaning har sohasini fahmlamoq uchun bilim va iste’dod bergan edi. Bundan tashqari, Doniyor turli xil vahiy va tushlarni ta’birlash qobiliyatiga ega edi.

¹⁸Shoh belgilagan muddat tugagach, bosh mulozim hamma yigitlarni Navuxadnazar huzuriga olib bordi.

¹⁹Shoh ularning har biri bilan suhbatlashdi. Ular orasida hech kim Doniyor, Xanoniyo, Mishail va Ozariyoga teng kela olmasdi. Shuning uchun shoh ularni oʻz saroyida olib qoldi.

²⁰Shoh qanday savol bermasin va qanday jumboqni yechishni soʻramasin, ularning bilimi va donoligi butun shohlikdagi folbinu munajjimlarnikidan oʻn barobar ziyoda edi.

²¹Doniyor saroyda shoh Kurush hukmronligining birinchi yiligacha[9] xizmat qildi.