Read Uzbek Muqaddas Kitob Doniyor 2 Bible Online

Doniyor 2 - Uzbek Muqaddas Kitob bible

Doniyor 2

¹Navuxadnazar oʻz hukmronligining ikkinchi yilida[10] bir tush koʻrdi. Bu tush uni shu qadar bezovta qilib yubordiki, koʻziga boshqa uyqu kelmadi.

²Shoh tushining ta’birini bilish uchun qoʻli ostidagi barcha folbin, munajjim, sehrgar va afsungarlarni[11] chaqirtirdi. Ular shoh huzurida hozir boʻlganlarida,

³shoh ularga shunday dedi: — Men gʻalati bir tush koʻrdim. Yuragimga gʻulgʻula solgan bu tushning ta’birini bilmoqchiman.

⁴Ular shohga oramiy tilida dedilar[12]: — Shoh hazratlarining umri boqiy boʻlsin! Shoh hazratlari avval tushlarini aytsinlar, bu qullaringiz uni ta’birlashga tayyordirlar.

⁵— Bilib qoʻyinglar, — dedi ularga shoh. — Agar menga tush va uning ta’birini aytib bermasangiz, men tanalaringizni boʻlak — boʻlak qildirib, sizlarni jazolayman, uylaringizni esa vayron qilib, bir uyum toshga aylantiraman.

⁶Bordi — yu, tushimni aytib, uni ta’birlab bersangiz, sizlarga in’omu mukofotlar berib, izzat — ikrom koʻrsataman. Qani, endi menga koʻrgan tushimni va uning ta’birini aytib beringlar!

⁷Ular shohga ikkinchi marta dedilar: — Shoh hazratlari avval tushlarini aytsinlar, kaminalaringiz uni ta’birlashga tayyordirlar.

⁸— Sizlar qarorim qat’iy ekanini koʻrib, vaqtni choʻzmoqchisizlar, — dedi shoh. — Buni aniq bilib turibman.

⁹Agar tushimni aytib bermasangizlar, hammangizga jazo bitta! Sizlar meni laqillatib, vaziyat oʻzgarguncha vaqtni choʻzishga kelishib olgansizlar. Tushni menga aytib beringlar, shunda uni ta’birlay olishingizni ham bilaman.

¹⁰— Yer yuzida shohning bu talabini qondiradigan bironta jon bormikan?! — deya ajablandilar ular. — Shuhrati roʻyi zaminga yoyilgan shohlarning birontasi ham bunday narsani na folbin, na munajjim, na afsungardan talab qilgan.

¹¹Shoh hazratlari bizdan imkonsiz bir narsani talab qilyaptilar. Buni shohga foniy bandalar dunyosidan yiroq yashaydigan xudolardan boshqa hech kim ochib berolmaydi.

¹²Dargʻazab boʻlgan shoh: “Bobildagi barcha saroy maslahatchilari qatl qilinsin!” — deb farmon berdi.

¹³Farmon e’lon qilindi. Saroy maslahatchilari qatl qilinish arafasida edi. Doniyor va uning oʻrtoqlari ham qatl qilinishlari kerak edi.

¹⁴Shoh soqchilarining boshligʻi Oriyox saroy maslahatchilarini qatl qilmoq uchun yoʻlga chiqqanda, Doniyor uning oldiga borib, ehtiyotkorlik bilan murojaat qilib:

¹⁵“Ey Oriyox hazratlari, nima bois shoh bunday shoshilinch[13] farmon chiqardilar?” — deb soʻradi. Shunda Oriyox boʻlib oʻtgan voqeani unga birma — bir soʻzlab berdi.

¹⁶Doniyor shosha — pisha shoh huzuriga kirib, tushning ta’birini topmoq uchun hazratlaridan muhlat soʻradi.

¹⁷Soʻng uyga borib, boʻlib oʻtgan voqeani sheriklari Xanoniyo, Mishail va Ozariyolarga aytib berdi:

¹⁸“Saroy maslahatchilari bilan birga halok boʻlmasligimiz uchun, Samoviy Xudoga iltijo qilinglar. U bizga rahm qilib, bu sirni ochib berishini soʻranglar.”

¹⁹Oʻsha kecha Doniyorga bu sir vahiy orqali oshkor boʻldi va Doniyor Samoviy Xudoga hamdu sanolar aytdi:

²⁰“Xudoyimiz dono va qudratlidir, Asrlar osha Uning nomi ulugʻlansin!

²¹U zamon va davrlarni oʻzgartirar, Shohlarni taxtdan tushirib taxtga oʻtqazar. Donishmandlarga donolik, Oqilu fozillarga bilim berar.

²²Pinhon saqlangan sirlarni ochar, Zulmatda yashiringan narsalarni bilar, Yorugʻlik Uning dargohida maskan topar.

²³Ey ota — bobolarimning Xudosi, Senga shukurlar aytaman, madhlar kuylayman, Zero, donoligu qudratni menga bergan Sensan, Istagan narsamni menga ochgan Sensan, Shoh tushini bizga oshkor qilgan Sensan.”

²⁴Doniyor saroy maslahatchilarini qatl qilish uchun shoh tomonidan tayinlangan Oriyoxning oldiga borib: — Hazratim, saroy maslahatchilarining jonlariga zinhor qasd qilmang, — dedi. — Meni darhol shoh huzuriga olib kiring, men shoh hazratlari koʻrgan tushni ta’birlab beraman.

²⁵Oriyox zudlik bilan Doniyorni shoh huzuriga olib kirib: — Ey olampanoh, kaminangiz Yahudo asirlari orasidan tushingizni ta’birlab beradigan bir odamni topib keldi, — dedi.

²⁶Shoh Doniyorga yuzlanib (Doniyorning boshqa ismi Beltashazar edi[14]): — Sen menga koʻrgan tushimni hamda uning ta’birini aytib bera olasanmi? — dedi.

²⁷Doniyor shohga shunday javob berdi: “Ey hazrati oliylari, na saroy maslahatchisi, na munajjim, na folbin, na rammol[15] buning uddasidan chiqa oladi.

²⁸Lekin samoda shu kabi, sirlarni oshkor qila oladigan bir Xudo bordir. U sizga, ey shoh hazratlari, oxiratda boʻladigan narsalarni ayon qilmoqchi. Siz tushingizda koʻrgan vahiy quyidagicha edi:

²⁹Ey olampanoh, siz uxlab, kelajak haqida bir tush koʻrdingiz. Bu tush orqali sirlarni oshkor qiluvchi Xudo sizga kelajakda roʻy beradigan narsalarni ayon qildi.

³⁰Bu sirning menga ochilganligi esa donoligim boshqalarnikidan ziyoda boʻlgani uchun emas, balki shohanshohim koʻrgan tushining ta’birini bilib, uning ma’nosini tushunishlari uchundir.

³¹Ey shoh hazratlari, tushingizda siz bahaybat bir haykal koʻrdingiz. Oldingizda turgan oʻsha ulkan haykalning koʻrinishi nihoyatda yarqiroq va qoʻrqinchli edi.

³²Haykalning boshi toza oltindan, koʻkrak va qoʻllari kumushdan, beli va sonlari bronzadan,

³³boldirlari temirdan, oyoqlarining bir qismi loydan, bir qismi temirdan edi.

³⁴Unga qarab turganingizda, togʻdan oʻz — oʻzidan[16] uzilgan bir tosh dumalab kelib haykalning loy va temirdan boʻlgan oyoqlariga urildi — da, ularni parcha — parcha qildi.

³⁵Temir, loy, bronza, kumush va oltin parchalanib, yozgi xirmonlardagi toʻponday boʻldi. Shamol ularni uchirib ketib, hech bir asar qoldirmadi. Haykalga urilgan tosh esa katta togʻ boʻlib, butun yer yuzini qopladi.

³⁶Bu siz koʻrgan tush edi. Endi esa shoh hazratlari tushining ta’birini eshitsinlar.

³⁷Ey shoh hazratlari, siz kabi buyuk hukmdorni dunyo hali koʻrmagan. Samoviy Xudo sizga saltanat, kuch — qudrat va shon — shuhrat ato qilgandir.

³⁸U sizga yerda yashovchi barcha insonlarni, hatto dashtdagi yovvoyi hayvonlaru osmonda uchuvchi qushlarni tobe qilgan, ular ustidan hukmronligingizni mustahkam oʻrnatgan. Tilla bosh — sizsiz.

³⁹Ammo sizdan keyin jahon sahnasiga boshqa buyuk bir shohlik chiqadi. Bu shohlik siznikidan zaifroq boʻladi. Soʻng haykalning bronza beli va sonlari bilan ifodalangan uchinchi shohlik hukmronlik qiladi.

⁴⁰Undan keyin temirday qattiq toʻrtinchi shohlik boʻladi. Temir hamma narsani sindirib yoʻq qilganiday, oʻsha shohlik ham undan oldingi shohliklarni buzib, yoʻq qiladi.

⁴¹Siz haykalning oyoqlari va oyoq barmoqlarining bir qismi loydan, bir qismi temirdan ekanligini koʻrdingiz, bu boʻlingan shohlik boʻladi. Loy bilan temir birga qorilgani uchun bu shohlikda bir oz temirning kuchi boʻladi.

⁴²Shohlik ayrim jihatdan kuchli, ayrim jihatdan zaif boʻladi.

⁴³Temir bilan loyning qorishmasi yana shundan dalolat beradiki, oʻsha zamon hukmdorlari quda — andachilik yoʻli bilan shohliklarini mustahkam qilmoqchi boʻladilar, ammo temir loy bilan qovushmagani kabi, ular ham bir — biri bilan qovusha olmaydilar.

⁴⁴Oʻsha shohlarning davrida Samoviy Xudo bitmas — tuganmas bir shohlik oʻrnatadi. Hech kim uni yenga olmaydi. Bu shohlik boshqa barcha shohliklarni yer bilan yakson qilib, oʻzi abadiy turadi.

⁴⁵Togʻdan oʻz — oʻzidan dumalab tushib, temir, bronza, loy, kumush va oltinni parchalab tashlagan tosh oʻsha shohlikning ifodasidir. Buyuk Xudo sizga, ey shoh hazratlari, kelajakda sodir boʻladigan narsalarni ayon qildi. Siz koʻrgan tushingiz haqiqatan ham karomatli, ta’biri esa roʻyirostdir[17].”

⁴⁶Shoh Navuxadnazar muk tushib Doniyorga sajda qildi. Soʻng odamlariga Doniyor oldida nazrlar keltirib, xushboʻy tutatqilar tutatishni buyurdi.

⁴⁷Shoh Doniyorga dedi: — Chindan ham sening Xudoying sirlarni oshkor qiluvchi eng buyuk Xudodir, U shohlarning haqiqiy Egasidir, chunki bu sirni menga faqat sen oshkor qila olding!

⁴⁸Shoh Doniyorni yuqori mansabga koʻtarib, koʻpdan — koʻp in’omlar taqdim qildi, uni Bobil viloyatining hokimi va saroy maslahatchilarining boshligʻi qilib tayinladi.

⁴⁹Doniyorning iltimosiga binoan shoh Bobil viloyatining boshqaruvini Shadrax, Meshax va Abednaxuga topshirdi. Doniyorning oʻzi esa shoh saroyida xizmat qilib qoldi.