Read Uzbek Muqaddas Kitob Xo‘sheya 10 Bible Online

Xo‘sheya 10 - Uzbek Muqaddas Kitob bible

Xo‘sheya 10

¹Isroil gurkiragan, Hosildor tok kabidir. Ammo hosili koʻpaygani sari, U koʻplab qurbongohlar qurdi. Yurti ravnaq topgani sari, Butsimon toshlariga zeb berdi.

²Sadoqatsiz bu xalq endi ta’zirini yeydi. Egamiz qurbongohlarini vayron qiladi, Butsimon toshlarini sindirib tashlaydi.

³Koʻp oʻtmay ular aytishadi: “Biz Egamizdan qoʻrqmadik, Shuning uchun shohimizdan ayrilib qoldik. Ammo shohning qoʻlidan nima ham kelardi?!”

⁴Ular bema’ni gaplar gapirmoqda, Soxta qasamlar ichib, ahdlar tuzishmoqda. Natijada egatlardagi zaharli oʻtday, Da’volar unib chiqmoqda.

⁵Samariya ahli[67] Bayt — Obundagi[68] Oltin buzogʻidan[69] xavotir oladi, Uning uchun ular aza tutishadi. Butidan xursand boʻlgan ruhoniylar ham But surgun boʻlganidan yigʻlashadi.

⁶Butning oʻzi Ossuriyaga olib ketiladi, Buyuk shohga[70] taqdim qilinadi. Efrayim[71] sharmanda boʻladi, Umidini butga bogʻlagani uchun[72] Isroil uyatga qoladi.

⁷Samariya shohi suvga gʻarq boʻlgan payrahaday Halok boʻladi.

⁸Isroilning gunohiga sabab boʻlgan Obundagi[73] sajdagohlar yoʻq qilinadi. Qurbongohlarini yantogʻu tikan bosadi. Odamlar togʻlarga: “Bizni bosib qolinglar!” deya baqirishadi. Qirlarga: “Ustimizga qulanglar!” deb yolvorishadi.

⁹Egamiz shunday demoqda: “Ey Isroil, sen Givoda gunoh qila boshlading[74], Oʻsha yerda gunohdan chiqmay qoldi sening boshing. Givodagi jinoyatchilar jazosini olganday, Sen ham jazodan qochib qutula olmaysan.

¹⁰Men xohlagan paytimda jazoingni beraman. Senga qarshi xalqlarni birlashtiraman. Ikki barobar koʻpaygan jinoyatlaring uchun Dushmanlar senga kishan soladi.

¹¹Efrayim oʻrgatilgan buzoqqa oʻxshardi, Yanchishni u xoʻp yaxshi koʻrardi[75]. Mana endi uning goʻzal boʻyniga, Men boʻyinturuq taqaman. Endi unga omoch torttiraman[76]. Qani, Yahudo shudgor qilsin![77] Efrayim[78] oʻzi uchun mola bossin!

¹²Ey Isroil, oʻzingiz uchun solihlik urugʻini eking, Cheksiz sevgini oʻrib oling. Haydalmagan yeringizga ishlov bering, Vaqt keldi! Men, Egangizga intiling! Shunda Men oldingizga boraman, Yomgʻir yogʻdirganday, sizga najot beraman.

¹³Sen yovuzlikni ekding, Adolatsizlikni oʻrib olding, Yolgʻonning mevasidan yeding. Sen oʻz kuchingga tayanganing uchun, Son — sanoqsiz sipohlaringga ishonganing uchun,

¹⁴Jangu jadallar seni chetlab oʻtmaydi. Shoh Shalman Bayt — Arbelni jangda vayron qilganday[79], Xotinlarni bola — chaqalari bilan toshga urib oʻldirganday, Hamma shaharlaring vayron boʻladi.

¹⁵Ey Baytil[80], sen qabihliklar qilganing uchun, Bu kunlar boshingga tushadi. Tong otgach, ey Isroil, shohing oʻldiriladi.”