Read Uzbek Muqaddas Kitob Xo‘sheya 11 Bible Online

Xo‘sheya 11 - Uzbek Muqaddas Kitob bible

Xo‘sheya 11

¹Egamiz shunday deydi: “Men Isroilni bolaligida yaxshi koʻrar edim, Oʻz oʻgʻlonimni Misrdan chaqirib olgan edim[81].

²Uni qancha koʻp chaqirsam, Mendan[82] shuncha koʻp uzoqlashardi. Baalga qurbonliklar keltirardi, Butlarga tutatqilar nazr qilardi.

³Efrayimga[83] yurishni Men oʻrgatgan edim, Uni qoʻllarimda koʻtarib yurgan edim. Ammo qilgan gʻamxoʻrligimni u bilmadi.

⁴Men esa uni mehr ila yetaklagandim, Muhabbat rishtalari ila olib yurgan edim. Boʻynidan boʻyinturuqni[84] olib tashlagandim, Muloyimlik bilan uni boqqandim.

⁵Xalqim tavba qilishdan bosh tortdi. Shuning uchun Men ularni endi Misrga joʻnatib jazolayman[85], Ha, zolim Ossuriyaga tobe qilaman.

⁶Shaharlarida qilich hukm suradi, Darvozalarining tambalarini yoʻq qiladi. Yovuz rejalari tufayli xalqim qilichdan halok boʻladi.

⁷Qachon qaramang, ular Mendan yuzini oʻgirishadi. Paygʻambarlarim xalqni Menga qaytishga da’vat qilsa — da, Xalq Mendan — Xudoyi Taolodan madad tilamaydi[86].

⁸Ey Efrayim, qanday qilib sendan voz kechay?! Ey Isroil, qanday qilib seni tashlab ketay?! Admani yoʻq qilganimday, seni yoʻq qila olarmikanman?! Zavoʻyimga[87] qilganimni senga qila olarmikanman?! Bunday qilishga yuragim betlamas aslo! Senga boʻlgan mehrim uygʻondi.

⁹Yoʻq, sochmayman senga qahr — gʻazabimni, Ey Efrayim, qayta barbod qilmayman seni, Zero, Men Xudoman, inson emas, Orangizdagi Muqaddas Xudoman, Oldingizga jahl bilan bormayman.

¹⁰Men, Egangiz, sherday oʻkiraman, Oʻshanda xalqim ortimdan ergashadi, Ovozimni eshitgach, farzandlarim gʻarbdan shoshib kelishadi.

¹¹Ular qushlarday uchib keladi Misrdan, Kaptarlarday yetib keladi Ossuriya yurtidan[88]. Men ularni uylariga eltib qoʻyaman. — Egamizning kalomi shudir. —

¹²Efrayim atrofimni yolgʻon bilan oʻrab tashladi, Isroil xonadoni Meni hiylaga koʻmib tashladi. Yahudo xalqi Menga qarshi bosh koʻtardi, Men, Muqaddas Xudoga ular itoat qilmayapti[89].”