Read Uzbek Muqaddas Kitob Xo‘sheya 12 Bible Online

Xo‘sheya 12 - Uzbek Muqaddas Kitob bible

Xo‘sheya 12

¹Efrayim[90] garmsel[91] boqib yurar, Kun boʻyi sharqdan esgan shamol ketidan quvar. Yolgʻonu zoʻravonlikni u orttirar. Ossuriya bilan sulh tuzib, Zaytun moyini Misrga joʻnatar.

²Yahudoga Egamiz da’vo qiladi. Yoqub naslining[92] ta’zirini U beradi, Tutgan yoʻliga yarasha uni jazolaydi.

³Onasining qornidayoq Yoqub akasi bilan talashgan[93], Ulgʻaygach esa Xudo bilan olishgan[94].

⁴Ha, farishta[95] bilan olishib, uni yenggan edi, Keyin yigʻlab, iltifot qilishini soʻragandi. Baytilda[96] Yoqub Xudoni topgandi, Oʻsha yerda Xudo bilan suhbat qurgandi[97].

⁵Parvardigori Olam — Egamiz Oʻshadir, Egamizdir Uning nomi!

⁶Ey Yoqub nasli, Xudoyingizga qayting. Sevgi va adolatga intiling, Sabr — toqat ila Xudodan umid qiling.

⁷Egamiz shunday deydi: “Xalqim tarozidan urgan savdogarga oʻxshaydi, Firibgarlik qilishni ular xoʻp yaxshi koʻradi.

⁸«O, men boyman, — deb maqtanasan, ey Efrayim. — Men oʻzimga davlat orttirdim, Borimni peshana terim bilan topdim. Hech kim meni gunohda ayblay olmas.»

⁹Ammo Egangiz Xudo — Menman, Seni Misrdan olib chiqqanman. Men senga sahroda zohir boʻlar edim, Oʻsha davrdagiday seni yana chodirlarda yashattiraman[98].

¹⁰Men paygʻambarlarga gapirgandim, Oʻzim ularga koʻp vahiylar bergandim, Ular orqali seni, ey xalqim, ogohlantirgan edim.

¹¹Ammo Giladdagi[99] yovuzlik toʻxtamadi, Gilgalda[100] buqalar butlarga atalib Hamon qurbonlik qilinmoqda. Shuning uchun Gilad ahli albatta barham topadi, Gilgaldagi qurbongohlar buzib tashlanadi, Ular shudgor qilinadigan dalalardan Uloqtirib tashlangan toshlarday boʻlib qoladi.”

¹²Yoqub Oram[101] yurtiga qochib bordi[102], Xotin olish uchun u[103] qulday ishladi, Qalin evaziga qoʻylar boqdi[104].

¹³Egamiz vaqti kelib paygʻambar[105] yubordi, Yoqub naslini[106] Misrdagi qullikdan olib chiqdi, Oʻsha paygʻambari orqali ularni boqdi.

¹⁴Ammo Efrayim Egamizni qattiq ranjitdi. Toʻkkan qon uchun Efrayimni Rabbiy jazolaydi, Uni haqoratlagani uchun adabini beradi.