Read Uzbek Muqaddas Kitob Xo‘sheya 13 Bible Online

Xo‘sheya 13 - Uzbek Muqaddas Kitob bible

Xo‘sheya 13

¹Egamiz shunday deydi: “Ilgari Efrayim[107] gapirganda hammani titroq bosardi, Isroilda uning martabasi ulugʻ edi. Ammo Efrayim Baalga sajda qilib, gunoh orttirdi, Shunday qilib, oʻzini oʻlimga mahkum etdi.

²Hozir ham xalqim gunoh ustiga gunoh qilishar. Oʻzlariga butlar yasashar, Kumushdan mahorat bilan sanamlar ishlashar[108], Bularning barchasi bor — yoʻgʻi hunarmandning ishi — ku! Mening xalqimga shunday deb aytishyapti[109]: «Butlarga qurbonliklar keltiringlar! Oltin buzoqlarni oʻpinglar![110]»

³Shuning uchun ular tonggi tumanday boʻladi, Birpasda gʻoyib boʻladigan shudringga oʻxshab qoladi. Shamol xirmondan uchirgan toʻponday ular gʻoyib boʻladi, Moʻridan chiqadigan tutunga oʻxshab qoladi.

⁴Ammo Egangiz Xudo — Menman. Ey Isroil, seni Misrdan olib chiqqanman. Mendan boshqa Xudoni sen bilmaysan, Mendan boshqa yoʻqdir najotkoring.

⁵Men sahroda[111] senga gʻamxoʻrlik qildim, Suvsiz qaqragan choʻlda seni boqdim.

⁶Serhosil oʻlkada qorningni toʻygʻizdim[112], Ammo qorning toʻygach, manman boʻlib ketding, Shu sababdan sen Meni unutding.

⁷Endi Men yoʻlingni qoplonday poylayman, Senga bir sherday hujum qilaman.

⁸Bolalaridan ayrilgan ona ayiq kabi tashlanaman, Seni tilka — pora qilaman. Oʻsha joydayoq seni sherday gʻajiyman, Yirtqichga oʻxshab seni qonga belayman.

⁹Ey Isroil, oʻz boshingga oʻzing balo orttirding, Axir, Menga — Oʻz Madadkoringga qarshi chiqding.

¹⁰Shaharlaringni qutqaradigan shohing qani?! «Bizga shohu hokimlar ber», deb soʻragan boshliqlaring qani?!

¹¹Men jahl ustida senga shohlarni berdim, Gʻazabga minganimda ularni olib tashladim.

¹²Efrayimning jinoyati yozib qoʻyilgan, Ha, uning gunohi kitobga bitilgan.

¹³Isroilning yashashga imkoniyati bor edi, Ammo u nodon bolaga oʻxshadi, Onani toʻlgʻoq tutganda, U qorindan chiqishni xohlamadi.

¹⁴Men bu xalqni oʻliklar diyoridan qutqararmikanman?! Ularni oʻlimdan xalos qilarmikanman?![113] Ey oʻlim, qirgʻin olib kelgin! Ey oʻliklar diyori[114], halokatli kuchingni koʻrsatgin![115] Endi Men rahm — shafqat qilmayman.”

¹⁵Isroil qarindoshlari orasida Serpusht va farovon boʻlsa — da, Egamiz uning ustiga sharq shamolini yuboradi, Sahrodan esgan garmselni[116] joʻnatadi. Isroilning bulogʻini quritadi, Uning chashmasini qovjiratadi. Xazinasidagi qimmatbaho ziynatlarini tortib oladi.