Read Uzbek Muqaddas Kitob Xo‘sheya 14 Bible Online

Xo‘sheya 14 - Uzbek Muqaddas Kitob bible

Xo‘sheya 14

¹Samariya aholisi[117] oʻz Xudosiga qarshi bosh koʻtardi, Endi ular gunohining jazosini tortadi. Ular qilichdan halok boʻladi, Goʻdaklarini dushmanlar yerga urib oʻldiradi, Homilador ayollarning qorinlarini yoradi.

²Ey Isroil, Egang Xudoga qaytgin! Axir, gunoh tufayli sen qulading.

³Gapingni tayyorlab, Egamizga qayt. Sen Unga shunday deb ayt: “Gunohlarimizdan kechib yuborgin, Ibodatimizni qabul qilgin. Qurbongohingda buqalarni qurbonlik qilganday, Biz Senga madhiyamizni nazr qilamiz.

⁴Ossuriya bizga najot bermaydi, Biz jangovar otlarga minmaymiz. Qoʻl bilan yasalgan butlarni Endi biz «xudolarimiz» deb atamaymiz. Ey Egamiz, biz — yetimlarga Faqat Sen rahm — shafqat qilasan.”

⁵Egamiz shunday deydi: “Men xalqimga shifo berib, Ularni bevafolikdan qaytaraman, Ularga qayta koʻngil qoʻyaman, Men jahldan tushdim.

⁶Men Isroil uchun shudringday boʻlaman, Shunda Isroil nilufarday ochiladi, Lubnon oʻrmoniday tomir otadi.

⁷Ularning novdalari oʻsib chiqadi, Zaytun daraxtidek koʻrkam boʻladi, Lubnon sadriday muattar hid taratadi.

⁸Ularning soyasida xalqlar yashaydi. Isroil moʻl bugʻdoy yetishtiradi, Ular uzumzorday koʻp hosil berishadi, Lubnon sharobiday mashhur boʻlishadi.

⁹Ey Efrayim[118], Men butlaringga aslo oʻxshamayman![119] Sening ibodatlaringga javob beraman, Senga gʻamxoʻrlik qilaman. Men doim yashil sarv daraxti kabidirman[120], Olgan moʻl hosilingning manbaidirman.”

¹⁰Kim dono boʻlsa, Bu yerda yozilgan soʻzlarni tushunadi, Kim fahm — farosatli boʻlsa, Bularning hammasini anglab oladi. Egamizning yoʻllari toʻgʻridir. Solihlar Uning yoʻllaridan yuradi, Isyonchilar esa qoqilib tushadi.