Read Uzbek Muqaddas Kitob Xo‘sheya 5 Bible Online

Xo‘sheya 5 - Uzbek Muqaddas Kitob bible

Xo‘sheya 5

¹Egamiz shunday deydi: “Ey ruhoniylar, eshiting buni! Diqqat qilgin, Isroil xalqi! Quloq solgin, shoh xonadoni! Sizning ustingizdan hukm ketyapti. Sizlar Mispaxda odamlar uchun tuzoq boʻldingiz, Tovur togʻida[37] yoyilgan toʻr boʻldingiz.

²Qabih ishlarga botib ketdingiz! Men hammangizning adabingizni beraman.

³Ey Efrayim[38], juda yaxshi bilaman seni, Isroil, Mendan yashira olmassan oʻz qilmishingni. Sen, Efrayim, Xudoga bevafo boʻlding, Ey Isroil, oʻzingni harom qilding.

⁴Men Xudoyingman, Ammo qilmishlaring Menga qaytib kelishingga yoʻl qoʻymas. Men, oʻz Egangni sen bilmaysan, Chunki qalbing shahvatga toʻlgan[39].”

⁵Isroilning magʻrurligi oʻziga qarshi guvohlik beryapti, U[40] jinoyatlari tufayli qulaydi. Yahudo ham u bilan birga yiqiladi.

⁶Isroil Egamizning iltifotini izlaydi, Qoʻy — mollarini qurbonlik qiladi, Ammo Egamizni topa olmaydi, Chunki Egamiz uni tark etgan.

⁷U Egamizga xiyonat qildi[41], Begonalardan nikohsiz bolalar tugʻdi. Koʻp oʻtmay u mulki bilan birga xarob boʻladi.

⁸Egamiz shunday deydi: “Burgʻu chaling Givoda! Karnay chaling Ramada![42] Bayt — Obunda[43] bong uring! Ey Benyamin, ortingdan dushman kelyapti!

⁹Jazo kuni Efrayim xarob boʻladi. Isroil qabilalariga e’lon qilgan bu soʻzlarim Albatta roʻyobga chiqadi.

¹⁰Yahudo shahzodalari chegarani buzgan[44] firibgarlarga oʻxshaydi, Men ularning ustiga Oʻz qahrimni jaladay yogʻdiraman.

¹¹Axir, Efrayim butlarga ergashishni afzal koʻrdi, Endi u ezilib, hukmga bardosh bera olmaydi.

¹²Men Efrayimni kuyaday yemiraman, Yahudo xalqini qurtday kemiraman.

¹³Efrayim oʻz betobligini tushungach, Yahudo oʻz yaralarini koʻrgach, Efrayim Ossuriyaga[45] bordi, Buyuk shohni[46] yordamga chaqirdi. Ammo shoh ularni davolay olmaydi, Yaralariga shifo bera olmaydi.

¹⁴Men Efrayimga sherday hujum qilaman, Yahudo xalqiga yosh arslonday tashlanaman. Ularni Oʻzim tilka — pora qilaman, Sudrab, Oʻzim bilan olib ketaman. Ularni hech kim xalos eta olmas.

¹⁵Ular oʻz aybini boʻyniga olguncha, Chin dildan Menga intilguncha, Men Oʻz makonimga qaytib ketaman. Balki qaygʻuli damlarida ular Menga qaytishar.”