Read Uzbek Muqaddas Kitob Xo‘sheya 8 Bible Online

Xo‘sheya 8 - Uzbek Muqaddas Kitob bible

Xo‘sheya 8

¹Egamiz shunday deydi: “Qani boʻling, bong uring! Dushman[53] burgutday xonadonimga hujum qilmoqda. Axir, xalqim ahdimni barbod qildi, Ular qonunimni buzdi.

²Isroil xalqi Menga faryod qiladi: «Ey Xudoyim, Seni tan olamiz», deb aytadi.

³Oʻzlari esa ezgulikni rad etishdi, Dushmanlar ularni ta’qib qiladi.

⁴Ular roziligimni soʻramay shohlar tanlashdi, Ijozatimni olmay, mulozimlar tayinlashdi. Oltinu kumushlaridan butlar yasashdi, Shu orqali boshlariga halokat keltirishdi.

⁵Samariyaliklarning oltin buzogʻini[54] Men rad etdim! Ularga qarshi alanga olgandir Mening gʻazabim. Qachon ular oʻzlarini poklab olishadi?

⁶Butni Isroillik hunarmand yasagan — ku, But Xudo emas! Samariya shahrining buzogʻi parchalanib tashlanadi.

⁷Shamolni ekkan odam boʻronni oʻrib olar. Bugʻdoy boshoqsiz boʻlsa, xalq nonga zor boʻlar. Bugʻdoyingiz boshoq tukkan taqdirda ham, Uni begonalar yeb ado qilar.

⁸Boshqa xalqlar orasida Isroil ado boʻldi, Qadrsiz sopol idishga u oʻxshab qoldi.

⁹Yolgʻiz daydigan qulonday u, Ossuriyaga yordam soʻrab bordi. Efrayim[55] oʻzini oʻynashlariga sotdi.

¹⁰U boshqa xalqlarga sotilgan boʻlsa ham, Men uni yigʻib olaman. Ossuriya shohining[56] zulmi ostida U tezda xazon boʻladi.

¹¹Efrayim gunohlarini yuvmoqchi boʻldi, Qurbongohlar qurib tashladi. Qurbongohlar esa gunoh makoni boʻlib qoldi.

¹²Men bu xalqqa koʻplab qonunlar yozdim, Biroq qonunlarimni ular yot deb biladi.

¹³Ular Men, Egasiga a’lo qurbonliklar keltirishsa ham, Qurbonlik goʻshtidan tanovul qilishsa ham, Men ulardan mamnun boʻlmayman. Men jinoyatlarini esga olaman, Gunohlari uchun jazosini beraman. Ular Misrga qaytib ketadi[57].

¹⁴Isroil oʻz Yaratuvchisini unutib, saroylar qurdi. Yahudo koʻplab shaharlarni mustahkam qildi. Men esa shaharlariga oʻt qoʻyaman, Qal’alarini olovga yem qilaman.”