Read Uzbek Muqaddas Kitob Xo‘sheya 9 Bible Online

Xo‘sheya 9 - Uzbek Muqaddas Kitob bible

Xo‘sheya 9

¹Ey Isroil, bas qil shodligingni! Boshqa xalqlarday nishonlading sen bayramingni! Sen Xudoga bevafolik qilding. Baalga fohishaday[58] sajda etding, Olgan hosilingni Baaldan toʻlov deb bilding.

²Endi xirmonu sharob meshlaring senga yetarlicha ozuqa bermas, Yangi sharobing chanqogʻingni bosmas.

³Sen Egamizning yurtida qolmaysan, Misrga qaytib ketasan[59]. Ha, Ossuriyada harom ovqat yeysan.

⁴Egamizga sharob nazr qila olmaysan, Keltirgan qurbonliklaring Unga ma’qul boʻlmaydi. Bunday qurbonliklar azadorning noniga oʻxshaydi[60], Undan yeganlarning hammasi bulgʻanadi. Zero, keltirgan qurbonliklaring qorin uchun, xolos, Bunday qurbonliklar Egamizning uyiga kiritilmaydi, Egamizga ular nazr qilinmaydi.

⁵Ey Isroil, endi sen tayinlangan bayramlarni oʻtkaza olmaysan! Egamizning muqaddas yigʻinlarini nishonlay olmaysan!

⁶Sen ofatdan qochib qutulsang ham, Misr[61] senga changalini soladi, Poytaxti Nuf[62] senga qabr boʻladi. Kumush xazinalaring yantoqqa nasib boʻladi, Xaroba uylaringni tikanak oʻt bosadi.

⁷Ey Isroil, bilib qoʻygin: Hisob — kitob vaqti keldi! Jazo olish payti yetdi! Koʻplab gunohlaring sababli, Cheksiz adovating tufayli, Sen paygʻambarlarni ahmoq hisoblaysan, Ruhdan ilhomlangan odamlarni telba deb bilasan.

⁸Ey Efrayim[63], Xudoyim paygʻambarlarni senga posbon qildi. Ammo sen ularni tuzoqqa tushirding, Xudosining yurtida ularga adovat qilding.

⁹Givoda razillik qilgan ajdodlaringga[64] oʻxshab qolding, Ularday yaramas ishlarga berilib ketding. Ammo Xudo jinoyatingni esga oladi, Gunohingga yarasha jazoingni beradi.

¹⁰Egamiz shunday deydi: “Men Isroilni ilk bor topganimda, Sahroda uzum solgan tokni topganday boʻldim. Ha, ota — bobolarini birinchi koʻrganimda, Anjirning chillaki mevalarini koʻrganday boʻldim. Ammo ular Piyor togʻiga kelganda[65], Oʻzlarini sharmanda Baalga bagʻishladilar. Koʻngil qoʻygan oʻsha butday jirkanch boʻlib qoldilar.

¹¹Efrayimning shuhrati qushday uchib ketadi. Ularda na farzand tugʻiladi, Na ayollari homilador boʻladi, Na pushti kamaridan bola bino boʻladi!

¹²Farzand oʻstirish nasib qilgan taqdirda ham, Birontasini qoldirmay yoʻq qilaman. Holiga voy, ularni tark etaman!

¹³Men Efrayimni koʻrganimda, U Tir shahriga oʻxshardi, Goʻzal yerda joylashgandi. Ammo endi Efrayim oʻz bolalarini Qotil oldiga olib chiqadi.”

¹⁴Ey Egam, bu xalqingga Sendan nima tilay?! Ayollarini bepusht qilgin, Emiza olmaydigan qilgin.

¹⁵Egamiz shunday deydi: “Ularning har bir qabihligi Gilgaldan[66] boshlangan, Oʻsha yerda nafratlana boshladim ulardan. Qabih qilmishlari uchun Ularni yurtimdan haydab chiqaraman. Endi ularga mehr qoʻymayman. Ularning hamma beklari Menga qarshi bosh koʻtargan.

¹⁶Efrayim quladi, Uning ildizlari quridi, Meva berishga u ojiz boʻldi. Farzand koʻrgan taqdirda ham, Avaylagan zurriyotini oʻldiraman.”

¹⁷Isroil xalqini Xudoyim rad etadi, Ular Xudoga itoat qilmadi. Xalqlar orasida darbadar boʻlishadi.