Read Uzbek Muqaddas Kitob Yo‘el 2 Bible Online

Yo‘el 2 - Uzbek Muqaddas Kitob bible

Yo‘el 2

¹Quddusda[5] burgʻu chalinglar! Egamizning muqaddas togʻida[6] bong uringlar! Titrasin Yahudoning jamiki ahli, Axir, kelyapti Egamizning kuni[7]. U kunga oz vaqt qoldi.

²Zimziyo zulmat kuni boʻlar u kun, Bulut qoplagan tim qorongʻi boʻlar u kun! Katta kuchli lashkar yurtni bosar, Yorishgan tongday togʻlar uzra yoyilar. Bunaqasi azaldan hech sodir boʻlgan emas, Bundan keyin ham hech qachon sodir boʻlmas.

³Alanga yutib borar ular oldidan, Olov guvullab yonar ular ortidan, Biron jonzot qochib qutulmas ulardan. Ilgari edi zamin Adan bogʻiday, Endi boʻlib qoldi qaqroq sahroday.

⁴Ularning koʻrinishi otlarga oʻxshar, Jang otlari kabi hujum qilishar.

⁵Togʻ choʻqqilariga sakrab chiqishar, Jang aravasiday gumburlab chopar, Yonayotgan xas — choʻp kabi chirsillar, Jangga tayyor boʻlib saf tortgan Kuchli lashkarga oʻxshar ular.

⁶Ularning oldida xalqlar dahshatga tushar, Hammaning yuzi boʻzday oqarib ketar.

⁷Jangchilarday hujum qilar bu lashkar, Sipohlarday devordan oshib tushar. Safdan chetga chiqmay olgʻa bosishar.

⁸Bir — birlarin turtmaslar, Hammasi oʻz yoʻlida ketar. Gʻovlarni ham yorib oʻtishar, Hech narsa ularni toʻxtata olmas.

⁹Bostirib borishar ular shaharga, Yopirilishar shahar devorlariga. Uylarga tirmashib chiqishar, Oʻgʻriday derazalardan ichkariga kirishar.

¹⁰Ularning oldida zamin titrar, Osmonu falak qaltirab turar. Quyosh ham, oy ham qorayar, Yulduzlar nuri soʻnar.

¹¹Egamiz lashkarning boshida turar, Lashkariga Oʻz sadosin berar. Naqadar behisob Uning qoʻshini, Uning amriga boʻysunadiganlar qudratli. Egamizning kuni chindan dahshatli! Bu vahimali kunga bardosh bergay kim?!

¹²Egamizning kalomi shudir: “Hozir ham kech emas, Roʻza tutib, yigʻlab, qaygʻurib, Butun qalbingiz bilan Menga qaytinglar.

¹³Kiyimingizni emas, bagʻringizni yirtinglar[8].” Egangiz Xudoga qaytinglar, U inoyatli, Rahmdil, jahli tez chiqmaydi, sodiq sevgisi moʻldir, Gʻazabidan tushib kechiradigan Xudodir.

¹⁴Kim bilsin, U shashtidan qaytar, Balki xirmoningizga baraka berar. Shunda Egangiz Xudoga sizlar Don bilan sharob nazrin taqdim qilasizlar.

¹⁵Burgʻu chaling Quddusda! Roʻza kunlarin belgilanglar, Oʻsha kunlarga yigʻin e’lon qilinglar.

¹⁶Yigʻing jamiki xalqni, Pok qiling jamoani. Chaqirtiring qariyalarni, Olib keling bolalaru emizikli goʻdaklarni. Hatto yangi kelin — kuyovlar ham Chimildiqdan chiqib kelishsin.

¹⁷Ma’badning ayvoni bilan qurbongoh orasida[9] Yigʻlashsin Egamizning xizmatkor ruhoniylari, Yolvorishsin shunday deya Xudoga: “Ey Egamiz, shafqat qilgin xalqingga, Mulking boʻlgan Isroil ellar aro kulgi boʻlmasin. «Ularning Xudosi qani?!» deya xalqlar bizni mazax qilmasin!”

¹⁸Egamiz Oʻz yurtiga jon kuydirdi shul zamon, Oʻz xalqiga rahm qildi U oʻshal on.

¹⁹Javob berdi[10] U xalqiga shunday debon: “Toʻq boʻlasiz, sizlarga beraman sharob, moy va don. Xalqlar orasida mazax boʻlishingizga endi yoʻl qoʻymayman.

²⁰Daf qilaman shimoldan kelgan lashkarlarni, Haydab solaman qaqroq, huvullagan sahroga ularni. Oʻlik dengizga uloqtiraman ilgʻor qismlarini, Oʻrta yer dengiziga suraman orqa qismlarini. Jasadlaridan qoʻlansa hid anqiydi.” Bajo qildi Egamiz buyuk ishlarini!

²¹Ey zamin, qoʻrqma! Xursand boʻl, shodlan. Bajo qildi Egamiz buyuk ishlarini!

²²Qoʻrqmanglar endi, ey yovvoyi hayvonlar, Chunki yam — yashildir dashtdagi yaylovlar, Meva berayotir endi daraxtlar, Anjir va uzumning hosili moʻldir.

²³Ey Quddus xalqi, xursand boʻlinglar, Egangiz Xudoning ishlaridan sevininglar. Sizlarga U yon bosib, yomgʻirni moʻl yogʻdirdi. Oldingiday, kuz, bahorda yomgʻirni quydirdi.

²⁴Endi xirmonlar donga toʻlib ketadi, Xumlar sharobu moy bilan toʻlib — toshadi.

²⁵Egamiz shunday deydi: “Zarar koʻrdingiz qirgʻin keltiruvchi, Yemiruvchi chigirtkalar[11] dastidan, Ekinzorlaringizni kemirib tashlagan Sakraydigan chigirtka galasi dastidan, Koʻrgan zararingizni Men qoplayman. Bu kuchli lashkarni sizga qarshi Men yuborganman.

²⁶Endi sizlar xohlaganingizcha yeysiz, Sizlar uchun ajoyibotlar koʻrsatgan Men, Egangiz Xudoga hamdu sano aytasiz. Ey xalqim, hech qachon sharmanda boʻlmaysan endi!

²⁷Ey Isroil, Men orangda ekanimni bilib olasan shunda, Men Egangiz Xudoman, yoʻqdir Mendan boshqasi. Ey xalqim, hech qachon sharmanda boʻlmaysan endi!

²⁸Soʻngra Oʻz Ruhimni yogʻdiraman har bir inson ustiga, Vahiylar keladi yigitlaringizga. Bashoratlar qilar sizning oʻgʻil — qizlaringiz. Karomatli tushlar koʻrar qariyalaringiz.

²⁹Oʻz Ruhimni yogʻdiraman oʻsha kunlarda, Hattoki qulu choʻrilaringiz ustiga.

³⁰Mening buyuk va dahshatli kunim kelishidan oldin, Men yeru osmonda alomatlarni koʻrsataman. Yer yuzida qonni, olovni va tutun ustunlarini paydo qilaman. Quyosh qorayadi, oy qon tusiga kiradi.”

³²Shunda Xudo da’vat etgan odamlar omon qoladi. Ha, Egamizga iltijo qilgan har bir inson qutqariladi. Egamiz aytganiday, Sion togʻiga va Quddusga qochib borganlar najot topishadi.