Read Uzbek Muqaddas Kitob Yo‘el 3 Bible Online

Yo‘el 3 - Uzbek Muqaddas Kitob bible

Yo‘el 3

¹Egamiz shunday deydi: “Oʻsha kunlarda Men Yahudo va Quddusning oldingi mavqeini tiklayman.

²Soʻng barcha xalqlarni yigʻib, Hukm vodiysiga[12] olib tushaman. U yerda xalqim Isroil haqi ular bilan da’volashaman, chunki ular Mening xalqimni turli ellarga tarqatib yubordilar. Yurtimni esa oʻzaro boʻlishib oldilar.

³Ular xalqim uchun qur’a tashlab, oʻgʻil — qizlarimni sotib yubordilar. Tushgan pulga fohishabozligu aysh — ishrat qildilar.

⁴Ey Tir, Sidon[13] va butun Filist xalqi, Menda nima qasdingiz bor?! Sizlar hali Mendan oʻch olmoqchimisiz?! Bordi — yu, niyatingiz shu boʻlsa, Men oʻsha zahotiyoq qilmishingizga yarasha jazoingizni beraman.

⁵Sizlar oltinu kumushlarimni tortib oldingiz, qimmatbaho xazinalarimni sajdagohlaringizga olib ketdingiz.

⁶Yahudo va Quddus xalqini yunonlarga[14] sotib, oʻz vatanidan yiroq qildingiz.

⁷Endi Men Yahudo va Quddus xalqini sizlar sotgan yurtlardan olib chiqaman. Qilmishingizga yarasha jazoingizni beraman.

⁸Oʻgʻil — qizlaringizni Yahudo xalqiga sotaman, ular esa farzandlaringizni olisdagi bir xalqqa — Savoliklarga[15] sotishadi.” Zotan, bu soʻzlarni Egamiz aytdi.

⁹Xalqlar orasida shunday deb e’lon qiling: “Jangga tayyorlanib, jangchilarni safarbar qiling! Sipohlaringiz hujum qilsin!

¹⁰Omochlaringizdan yasang qilichlar, Oʻroqlaringizdan qiling nayzalar. Zaiflar ham qoʻliga qurol tutsin.

¹¹Ey tevarakdagi xalqlar, shoshiling[16], Qani, hammangiz vodiyda toʻplaning.” Oʻz sipohlaringni, ey Egam, chaqir!

¹²Egamiz shunday deydi: “Barcha xalqlar boʻlsin safarbar, Hukm vodiysiga[17] kelishsin ular. Men u yerda oʻtirarman, Hamma xalqlar ustidan hukm chiqararman.

¹³Qani, kelinglar, Yetilgan bugʻdoyni oʻrganday ularni oʻringlar, Pishgan uzumni ezganday[18], bosib yoʻq qilinglar, Xumlar toʻlgan, Ularning qabihliklari bilan toʻlib — toshgan.”

¹⁴Ming — minglab olomon Toʻplangan Hukm vodiysida! Zotan, yaqinlashgandir Egamizning kuni[19] Hukm vodiysiga.

¹⁵Quyosh ham, oy ham qoraygan, Yulduzlar nuri soʻngan.

¹⁶Egam Quddusdan turib hayqirar, Siondan gulduros ovozi yangrar, Yeru osmon larzaga kelar. Ammo Egam Oʻz xalqini panohiga olar, U Isroil xalqining qoʻrgʻoni boʻlar.

¹⁷Egamiz shunday deydi: “Ey xalqim, shunda sizlar Egangiz Xudo Men ekanligimni bilasizlar. Men muqaddas togʻim Sionda[20] qurganman maskan. Tabarruk bir shahar boʻladi Quddus, Bosqinchilar endi aslo unga qilmas tajovuz.

¹⁸Oʻsha kuni sut oqar qirlardan, Uzum sharbati kelar togʻlardan, Yahudodagi oʻzanlar suvga toʻlar, Mening uyimdan buloq otilib chiqar, Akas daraxtlari oʻsadigan qaqroq soylikni[21] sugʻorar.

¹⁹Misr huvullab, Edom[22] boʻm — boʻsh sahroga aylanar. Oh, Yahudo xalqiga zulm oʻtkazdi ular, Begunoh odamlarning qonin toʻkdilar.

²⁰Men albatta jazolayman ularni! Aslo oqlamayman jinoyatchilarni![23] Yahudo esa abadiy yashar, Quddus avlodlar osha barqaror boʻlar. Men, Egangiz, Sionda qurganman maskan.”