Read Uzbek Muqaddas Kitob Amos 1 Bible Online

Amos 1 - Uzbek Muqaddas Kitob bible

Amos 1

¹Ushbu kitobda Taxuvada[2] chorvador boʻlgan Amosning soʻzlari bayon etilgan. Isroil[3] toʻgʻrisidagi bu soʻzlar Amosga zilziladan[4] ikki yil avval vahiy orqali ayon boʻlgan edi. Oʻsha davrda Yahudo yurtida shoh Uzziyo, Isroil yurtida esa Yohoʻsh[5] oʻgʻli shoh Yorubom[6] hukmronlik qilayotgan edilar.

²Amos shunday dedi: “Egamiz Quddusdan turib hayqiradi, Siondan[7] gulduros ovozi yangraydi! Choʻponlarning yaylovlari qurib qoladi[8], Karmil[9] choʻqqisidagi oʻtlar xazon boʻladi.”

³Egamiz shunday demoqda: “Damashq[10] aholisi gunoh ustiga gunoh qildi! Men ularni jazosiz qoldirmayman, Axir, ular Gilad aholisini temir tishli xoʻptir bilan yanchdi[11].

⁴Shunday ekan, Men shoh Xazayilning saroyiga olov yogʻdiraman, Olov Banhadadning[12] qal’alarini yondirib yuboradi.

⁵Men Damashq darvozalarining tambalarini sindiraman. «Qabihlik[13] vodiysi»ning hukmdorini yoʻq qilaman, Bayt — Edenda[14] saltanat hassasini[15] tutgan zotni halok qilaman. Oram xalqi asirlikka tushadi, Xir yurtiga[16] olib ketiladi.” Egamizning kalomi shudir.

⁶Egamiz shunday demoqda: “Gʻazo[17] aholisi gunoh ustiga gunoh qildi! Men ularni jazosiz qoldirmayman, Axir, ular xalqimning qishloqlaridagi aholisini Asirlikka olib, Edom xalqiga qul qilib sotdilar.

⁷Shunday ekan, Men Gʻazo devoriga olov yogʻdiraman, Olov Gʻazo qal’alarini kuydirib tashlaydi.

⁸Men Ashdod shahrining hukmdorini[18] yoʻq qilaman, Ashqalonda saltanat hassasini tutgan zotni halok qilaman. Exron shahriga qarshi qoʻl koʻtaraman, Omon qolgan Filistlarni qirib tashlayman!” Egamiz Rabbiyning kalomi shudir.

⁹Egamiz shunday demoqda: “Tir[19] aholisi gunoh ustiga gunoh qildi! Men ularni jazosiz qoldirmayman. Axir, ular birodarlik ittifoqini unutib, Xalqimning qishloqlaridagi aholisini Edomliklarga qul qilib sotdilar.

¹⁰Shunday ekan, Men Tir devoriga olov yogʻdiraman, Olov Tir qal’alarini kuydirib tashlaydi.”

¹¹Egamiz shunday demoqda: “Edom[20] aholisi gunoh ustiga gunoh qildi! Men ularni jazosiz qoldirmayman. Axir, ular qardoshi Isroil xalqiga[21] rahm qilmadilar. Ularni qilich bilan ta’qib qilib[22], Qahrini cheksiz sochdilar, Gʻazabidan hech tushmadilar.

¹²Shunday ekan, Men Temon shahriga olov yogʻdiraman, Bozrax[23] qal’alarini olov kuydirib tashlaydi.”

¹³Egamiz shunday demoqda: “Ommon[24] xalqi gunoh ustiga gunoh qildi, Men ularni jazosiz qoldirmayman. Axir, ular hududini kengaytirish uchun Giladga hujum qildilar, Oʻshanda homilador ayollarning qorinlarini yordilar.

¹⁴Shunday ekan, Men Rabba shahrining[25] devoriga oʻt qoʻyaman, Olov Rabba qal’alarini kuydirib tashlaydi. Oʻsha kuni jangdagi hayqiriqlar falakni tutadi, Jang boʻron kabi avj oladi.

¹⁵Ommon shohi surgun qilinadi, U bilan birga mulozimlar ham olib ketiladi.” Egamizning kalomi shudir.