Read Uzbek Muqaddas Kitob Amos 2 Bible Online

Amos 2 - Uzbek Muqaddas Kitob bible

Amos 2

¹Egamiz shunday demoqda: “Moʻab[26] xalqi gunoh ustiga gunoh qildi! Men ularni jazosiz qoldirmayman. Axir, ular Edom shohining qabrini bulgʻadilar, Suyaklarini kuydirib ohak qildilar.

²Shunday ekan, Men Moʻab ustiga olov yogʻdiraman, Olov Xariyoʻt[27] qal’alarini kuydirib tashlaydi. Shovqin — suron ostida, bosqinchilarning hayqiriqlariyu Burgʻu sadolari ostida Moʻab xalqi halok boʻladi.

³Men Moʻab hukmdorini yoʻq qilaman, U bilan birga mulozimlarini qirib tashlayman.” Egamizning kalomi shudir.

⁴Egamiz shunday demoqda: “Yahudo xalqi gunoh ustiga gunoh qildi! Men ularni jazosiz qoldirmayman, Axir, ular qonunlarimdan yuz oʻgirdilar. Qoidalarimni bajarmadilar. Ota — bobolari singari, soxta xudolarga sigʻinib, Haq yoʻldan ozdilar.

⁵Shunday ekan, Men Yahudo yurtiga olov yogʻdiraman, Olov Quddus qal’alarini kuydirib tashlaydi.”

⁶Egamiz shunday demoqda: “Isroil xalqi gunoh ustiga gunoh qildi! Men ularni jazosiz qoldirmayman, Axir, ular aybsizlarni pulga sotyaptilar. Kambagʻallarni bir juft choriqqa almashtiryaptilar.

⁷Yoʻqsilning boshini tuproqqa qorib, oyoq osti qilyaptilar, Mazlumni yoʻldan chetga itarib chiqaryaptilar. Ota va oʻgʻil bitta juvon bilan yotib[28], Meni badnom qilyaptilar.

⁸Ular har bir qurbongoh oldida Oʻzlari garovga olgan liboslar ustida yotibdilar[29]. Oʻz Xudosining uyida, Jarima evaziga olgan sharobni ichyaptilar.

⁹Ey Isroil xalqi, Men sizni deb, Amor xalqlarini[30] yoʻq qilgan edim. Ularning boʻy — basti sadr daraxtiday baland, Eman daraxtiday baquvvat boʻlgan boʻlsa — da, Men ularning mevasini qovjiratgan edim, Ildizini quritgan edim.

¹⁰Amor xalqining yurtini sizlarga mulk qilib beraman deb, Sizlarni Misr yurtidan olib chiqqandim. Qirq yil sahroda sizlarga yoʻl koʻrsatib yurgandim.

¹¹Farzandlaringizdan paygʻambarlar tayinladim, Ba’zi yigitlaringizni, Menga bagʻishlaninglar[31], deb chorladim. Shunday emasmi, ey Isroil xalqi?! — deb aytmoqda Egamiz. —

¹²Sizlar esa Menga bagʻishlanganlarga sharob ichirdingiz[32], Paygʻambarlarimga: «Bashorat qilmanglar!» deb buyurdingiz.

¹³Mana endi sizlarni shu qadar ezamanki, Sizlar ogʻir yuk ostida gʻirchillagan aravaday boʻlasiz.

¹⁴Oʻshanda chaqqonlar ham qochib qutulolmaydi, Pahlavonlar ham kuchdan qoladi, Hatto jangchilar ham jonini saqlay olmaydi.

¹⁵Kamonkash dosh berolmaydi, Choparlar qutqara olmaydi oʻzini, Otliqlar saqlay olmaydi jonini.

¹⁶Oʻsha kuni jasurlarning eng dovuragi ham Qurol — aslahalarini tashlab qochadi.” Egamizning kalomi shudir.