Read Uzbek Muqaddas Kitob Amos 6 Bible Online

Amos 6 - Uzbek Muqaddas Kitob bible

Amos 6

¹Ey Quddusda[64] rohat — farogʻatda yashaganlar, holingizga voy! Ey Samariya togʻida[65] bexatar boʻlganlar, holingizga voy! Sizlar oʻzlaringizni eng sara xalqning obroʻli odamlari deb bilasizlar, Bizga bosh boʻlinglar, deb Isroil xalqi sizning oldingizga keladi.

²Kalney shahriga borib, uning ahvolini koʻringlar. U yerdan buyuk Xomat shahriga oʻtib, holini bilinglar. Filist xalqining Gat[66] shahriga ham borib koʻringlar. Sizlarning bu shohliklardan afzalroq joyingiz bormidi?! Yoki yeringiz ularnikidan kattaroqmidi?![67]

³Kulfat kuni kelishiga sizlar ishonmayapsizlar, Zoʻravonlik hukmron boʻlishiga sababchi boʻlyapsizlar!

⁴Sizlar fil suyagidan yasalgan supalarda choʻzilib yotasizlar, Kursilarda[68] yonboshlab oʻtirasizlar, Qoʻzichoqlarning goʻshtidan lazzatlanasizlar, Semirtirilgan buzoqlarning goʻshtidan taom yeysizlar,

⁵Oʻzlaringizcha Dovud kabi kuylar bastalaysiz, Arfaning yangragan navolariga ashulalar aytasiz.

⁶Qadahlab sharob ichasiz, Xushboʻy moyning eng a’losini badaningizga surtasiz. Xalqingiz — Yusuf naslining[69] kulfati uchun esa qaygʻurmaysiz!

⁷Shunday ekan, sizlar birinchi boʻlib surgun qilinasiz, Yonboshlab oʻtkazgan ziyofatlaringiz tugaydi.

⁸Egamiz Rabbiy Oʻz nomini oʻrtaga qoʻyib ont ichdi, Ha, Parvardigori Olam — Egamiz shunday demoqda: “Men Yoqub naslining[70] takabburligidan nafratlanaman, Ularning qal’alaridan hazar qilaman. Samariya shahrini va u yerdagi hamma narsani Men dushmanning[71] qoʻliga beraman.”

⁹Agar bir uyda oʻnta odam qolgan boʻlsa, ularning hammasi oʻladi.

¹⁰Ularning yaqin qarindoshi va goʻrkov marhumlarni dafn qilmoqchi boʻlib kelishadi. Yaqin qarindoshi jasadlarni olib chiqqanda goʻrkovdan: “Yana jasadlar bormi?” deb soʻraydi. Goʻrkov: “Yoʻq”, deb javob beradi. Keyin esa: “Jim![72] Egamizning nomini tilga olmaylik!” deb aytadi.

¹¹Ana, Egamiz amr bermoqda: Koshonalar buzib tashlanadi, Kulbalar yakson boʻladi.

¹²Otlar qoyalar ustida chopa olmaydi — ku! Dengizni[73] hoʻkizlar bilan shudgor qilib boʻlmaydi — ku! Qoyil — e, sizlar esa adolatni zaharga aylantirdingiz, Solihlikning shirin mevasini achchiq qildingiz.

¹³Sizlar: “Loʻdavor shahrini[74] Qoʻlga kiritdik”, deb maqtanib yuribsizlar. “Karnayim shahrini[75] Oʻz kuchimiz bilan yengdik”, deb aytyapsizlar.

¹⁴Parvardigori Olam — Egamiz shunday demoqda: “Ey Isroil xalqi, qaranglar! Men sizlarga qarshi bir xalqni qoʻzgʻatdim. Ular Levo — Xomatdan[76] to Arabadagi soylikkacha[77] sizlarni ezadilar.”