Read Uzbek Muqaddas Kitob Amos 7 Bible Online

Amos 7 - Uzbek Muqaddas Kitob bible

Amos 7

¹Egamiz Rabbiy menga shunday vahiy koʻrsatdi: dehqonlar shoh saroyi uchun bugʻdoy oʻrib olganlaridan keyin, ikkinchi ekinlar unib chiqa boshlabdi[78]. Shu paytda Egamiz gala — gala chigirtkalarni[79] paydo qildi.

²Chigirtkalar yer yuzida koʻkarib turgan hamma narsani yeb bitirishibdi. Shunda men yolvordim: “Ey Egam Rabbiy, iltijo qilaman, gunohimizdan oʻtgin! Yoqub nasli[80] bunga bardosh bera olarmikin?! Oʻzi kichkina bir xalq boʻlsa!”

³Shunda Egamiz shaxtidan qaytdi: “Bunday qilmayman”, deb menga aytdi.

⁴Egamiz menga yana bir vahiy koʻrsatdi: Egamiz Rabbiy xalqini olov bilan[81] jazolamoqchi boʻlibdi. Olov buyuk dengizni[82] yamlabdi, keyin yurtni yondira boshlabdi.

⁵Shunda men yolvordim: “Ey Egam Rabbiy, oʻtinaman, bas qilgin! Yoqub nasli bunga bardosh bera olarmikin?! Oʻzi kichkina bir xalq boʻlsa!”

⁶Shunda Egamiz shaxtidan qaytdi. Egamiz Rabbiy: “Xoʻp, bunday ham qilmayman”, deb menga aytdi.

⁷Men yana bir vahiy koʻrdim: shoqul[83] yordamida qurilgan devorning oldida Rabbiy turgan ekan. U devorning toʻgʻri yoki qiyshiqligini shoqul bilan tekshirayotgan edi.

⁸Egamiz mendan: — Nimani koʻryapsan, Amos? — deb soʻradi. — Shoqulni, — deb javob berdim men. Soʻng Rabbiy shunday dedi: “Qara, Men shoqul yordamida Xalqim Isroilni tekshiraman. Endi ularga shafqat qilmayman.

⁹Is’hoq naslining[84] sajdagohlari[85] vayron boʻladi, Ha, Isroilning qadamjolari yoʻq qilinadi, Men shoh Yorubom[86] xonadoniga qilich bilan hujum qilaman[87].”

¹⁰Baytildagi[88] ruhoniy Emoziyo Isroil shohi Yorubomga xabar yuborib, shunday dedi: — Amos Isroil xalqi orasida sizga qarshi fitna uyushtirmoqda. Uning bu soʻzlarini xalqimiz koʻtara olmaydi.

¹¹Amos shunday deb aytib yuribdi: “Yorubom qilichdan halok boʻladi, Isroil xalqi oʻz yurtidan albatta surgun qilinadi.”

¹²Emoziyo Amosning oʻziga esa shunday dedi: — Ey valiy, bu yerdan chiqib ket! Yahudo yurtiga bor. Noningni oʻsha yerdan topib yegin. Bashoratlaringni ham oʻsha yerda ayt.

¹³Ammo Baytilda qayta bashorat qila koʻrma, chunki bu shohning qutluq joyidir, shohligimizning sajdagohidir.

¹⁴Amos esa Emoziyoga shunday javob berdi: — Mening mashgʻulotim paygʻambarlik emas, paygʻambarlarga shogird ham tushmaganman. Men bir chorvador edim, shikamora — anjir daraxtlarini[89] ham parvarish qilardim.

¹⁵Bir kuni suruvni haydab ketayotganimda Egamiz meni chaqirib: “Bor, xalqim Isroilga bashorat qil”, deb aytdi.

¹⁶Ey Emoziyo, endi Egamizning soʻzlarini eshit! Sen menga: “Isroil haqida bashorat qilma, Is’hoq xonadoniga[90] qarshi gap gapirma”, deb aytyapsan.

¹⁷Shu sababdan Egamiz shunday demoqda: “Sening xotining shaharda fohishalik qiladi, Oʻgʻil — qizlaring qilichdan halok boʻladi. Yering boshqalarga boʻlib beriladi. Oʻzing esa harom bir yurtda oʻlasan. Isroil xalqi oʻz yurtidan albatta surgun qilinadi.”