Read Uzbek Muqaddas Kitob Amos 8 Bible Online

Amos 8 - Uzbek Muqaddas Kitob bible

Amos 8

¹Egamiz Rabbiy menga yana vahiy koʻrsatdi: bir savat yetilib pishgan mevalar bor ekan.

²Egamiz mendan: — Amos, nimani koʻryapsan? — deb soʻradi. — Bir savat yetilgan mevani, — deb javob berdim men. Soʻng Egamiz menga shunday dedi: “Xalqim Isroil ham jazo uchun yetilib turibdi. Endi Men ularga shafqat qilmayman.

³Oʻsha kuni Ma’baddagi ashulalar marsiyaga aylanadi, — deb aytmoqda Egamiz Rabbiy. — Hamma joyda jasadlar yotadi. Sukunat bosgan!”

⁴Ey yoʻqsillarni ezadiganlar, quloq solinglar! Ey yurtdagi kambagʻallarni yoʻq qilganlar, eshitinglar!

⁵Sizlar shunday aytasizlar: “Yangi oy shodiyonasi tezroq tamom boʻla qolsa — yu, Donni sotsak. Shabbat kuni[91] tezroq oʻtsa — yu, Bugʻdoyni bozorga olib chiqsak. Shunda biz ogʻirligini kamaytirib, Narxini oshiramiz, Tarozidan urib, odamlarni aldaymiz.

⁶Bugʻdoy chiqitlarini ham sotib yuboramiz. Yoʻqsilni bir juft choriqqa sotib olamiz, Kambagʻalni kumushga xarid qilamiz.”

⁷Yoqub naslining takabburligini koʻrib, Egamiz shunday deb ont ichdi[92]: “Ularning qilmishlarini Men hech qachon unutmayman, Ularni albatta jazolayman.

⁸Shu sababdan yer titraydi! Yer yuzida yashovchi har bir mavjudot aza tutadi! Butun yer yuzi daryo toʻlqinlariday larzaga keladi, Ha, Nil suvlariday koʻtarilib, pastga tushadi[93].”

⁹Egamiz Rabbiy demoqda: “Ey Isroil xalqi, Oʻsha kuni shunday qilamanki, Quyosh tush paytida botadi, Kuppa — kunduzi yer yuzini qorongʻilik qoplaydi.

¹⁰Bayramlaringiz motamga aylanadi, Hamma ashulalaringiz marsiya boʻladi. Sizlar hammalaringiz qaygʻudan qanorga oʻranasiz, Aza tutganingizdan sochingizni qirdirasiz[94]. Yolgʻiz oʻgʻlidan judo boʻlgan ota — onaga oʻxshab qolasiz. Oʻsha kun oxiriga qadar achchiq kulfatday boʻladi.”

¹¹Egamiz Rabbiy demoqda: “Shunday kunlar keladiki, Men yurtga ocharchilik yuboraman. Odamlar non bilan suvni emas, Men, Egangizning soʻzini qoʻmsab, och qolishadi.

¹²Ular Mening soʻzimni eshitmoqchi boʻlib, Bir dengizdan boshqa dengizgacha oyogʻini sudrab borishadi, Shimoldan sharqqa yoʻl olishadi. U yoqdan — bu yoqqa yurib, sarson boʻlishadi — yu, Ammo Men, Egangizning soʻzini eshita olishmaydi.

¹³Oʻsha kuni goʻzal qizlaru baquvvat yigitlar Tashnalikdan hushidan ketadilar.

¹⁴Axir, ular Samariyaning sharmanda ma’budasi[95] nomi bilan Qasam ichib yuribdilar, «Ey Dan shahri[96], xudoying shohid», deb aytib yuribdilar, «Bershebaga[97] olib boradigan ziyorat yoʻli haqi», deb yuribdilar. Ammo ular yiqilib tushadilar, qaytib turmaydilar.”