Read Uzbek Muqaddas Kitob Amos 9 Bible Online

Amos 9 - Uzbek Muqaddas Kitob bible

Amos 9

¹Men qurbongohning[98] oldida turgan Rabbiyni koʻrdim, U shunday dedi: “Sajdagoh ustunqoshlariga shunday zarba beringlarki, Poydevorlari larzaga kelsin. Ustunqoshlar odamlar ustiga oʻpirilib tushsin. Omon qolganlarni Men qilichdan oʻtkazaman, Ulardan birontasi ham qochib ketolmaydi. Hech qaysisi qutulib qolmaydi.

²Ular yer qazib, oʻliklar diyoriga[99] kirishsa ham, Men qoʻlimni uzatib, ularni chiqarib olaman. Osmonga chiqib olishsa ham, U yerdan tortib tushiraman.

³Karmil choʻqqisida yashirinib olishsa ham, Ularni ovlab, qoʻlga tushiraman. Mendan qochib, dengiz tubiga bekinib olishsa ham, Dengiz iloniga amr berib chaqtiraman.

⁴Dushmanlar ularni asirlikka olib ketishsa ham, Qilichga amr berib, hammasini qirib tashlayman. Ularga yaxshilik emas, yomonlik keltirishga qaror qildim.”

⁵Sarvari Olam — Rabbiy Yerga qoʻl tekkizsa, yer oʻpirilib ketadi, Butun yer yuzi Nil suvlariday Baland koʻtarilib, pastga tushadi[100]. Yerda yashovchi har bir mavjudot aza tutadi.

⁶Egamiz osmonda Oʻziga maskan qurdi, Yer uzra osmon gumbazini[101] oʻrnatdi. Dengiz suvlarini yigʻib, Yer yuziga sochib yuboradigan Oʻshadir. Egamizdir Uning nomi.

⁷Egamiz shunday demoqda: “Ey Isroil xalqi, Sizning Habashistonliklardan[102] ortiq joyingiz bormidi?! Men Isroilni Misrdan qanday olib chiqqan boʻlsam, Filist xalqini ham xuddi shunday Xaftoʻrdan[103] olib chiqqanman, Oram xalqini ham Xirdan[104] olib chiqqanman.

⁸Men, Egangiz Rabbiy, Gunohkor Isroil shohligini kuzatib turibman. Uni yer yuzidan supurib tashlayman, Yoqub naslini[105] esa batamom yoʻq qilmayman, — deb aytmoqda Egamiz. —

⁹Men amr beraman, Shunda barcha xalqlar orasida, Bugʻdoy elaganday Isroilni gʻalvirdan oʻtkazaman. Yaxshi donning birontasi yerga tushmaydi.

¹⁰Xalqim orasidagi hamma gunohkorlar esa qilichdan halok boʻladi, Axir, bunday odamlar shunday aytishadi: «Koʻrmaymiz biz yomonlik, Boshimizga tushmas biror koʻrgilik.»”

¹¹Egamiz shunday demoqda: “Oʻsha kuni Men Dovud shohligini qayta tiklayman. Hozir u qiyshayib ketgan kulbaday boʻlsa — da, Devorlaridagi yoriq joylarini tuzataman, Buzilgan joylarini koʻtaraman. Uni qayta qurib, ilgarigi holatga qaytaraman. Shunda Isroil xalqi egalik qiladi Edomliklarning omon qolganlariga, Qoʻlim ostidagi hamma xalqlarga.” Egamiz aytganlarini bajo qiladi.

¹³Egamiz shunday demoqda: “Shunday vaqtlar keladiki, Dehqon hosilni yigʻib ulgurmasdan, Yerni shudgor qilish vaqti keladi. Sharobni tayyorlab ulgurmasdan, Uzumning yangi hosili pishadi. Togʻlardan shirin sharob tomadi, Hamma qirlardan pastga oqib tushadi.

¹⁴Men xalqimni yana farovonlikka erishtiraman[106]. Ular vayron boʻlgan shaharlarni qayta qurib, U yerda oʻrnashib oladilar. Uzumzorlar barpo qilib, sharobini ichadilar. Bogʻlar yaratib, mevalarini yeydilar.

¹⁵Men ularni oʻz yurtida koʻkartiraman. Men bergan yurtdan Ularni hech kim sugʻurib tashlamaydi.” Egangiz Xudoning kalomi shudir.