Read Uzbek Muqaddas Kitob Obodiyo 1 Bible Online

Obodiyo 1 - Uzbek Muqaddas Kitob bible

Obodiyo 1

¹Quyidagilar Obodiyoning bashoratidir. Egamiz barcha xalqlarga jarchi yubordi, Bizga shunday xabar yetib keldi: “Tayyorlaninglar! Qani, kelinglar, Edomga[1] qarshi urushga boraylik!” Edom xalqi haqida Egamiz Rabbiy quyidagilarni aytmoqda:

²“Ey Edom xalqi, xalqlarning orasida Men eng arzimasi qilib qoʻyaman sizni, Hamma sizlardan nafratlanadi.

³Takabburligingiz sizlarni aldadi. Qoyadagi[2] qoʻrgʻondir poytaxtingiz, Baland tepalikdadir uylaringiz, Shuning uchun aytasiz oʻzingizcha: «Kim bizlarni tushira olar yerga?!»

⁴Burgutday baland parvoz qilsangiz ham, Iningiz yulduzlar orasida boʻlsa ham, Sizlarni u yerdan tortib tushiraman, — deb aytmoqda Egamiz. —

⁵Uyingizga oʻgʻri tushsa, Kechasi bosqinchilar kelsa, Faqat xohlagan narsasini oladi — ku! Bogʻingizda uzum tergan odamlar Bir — ikki bosh boʻlsa — da, uzum qoldiradi — ku! Dushmanlaringiz esa sizni tamoman yoʻq qiladi!

⁶Ey Esovning avlodi[3] — Edom, Yovlar hamma narsangizni talon — taroj qilishar, Qadrli buyumlaringizni topib, tortib olishar.

⁷Barcha ittifoqchilaringiz sizga qarshi chiqib, Sizni oʻz yurtingizdan haydab yuborar. Tinchlik va’da qilib aldaydi ular, Ammo sizlarni magʻlub qilarlar. Sizlarga tuzoq qoʻyar noningizni yeganlar. Sizlar esa buni bilmay qolasizlar.”

⁸Egamiz shunday aytmoqda: “Ey Edom xalqi, hukm qilinadigan kunda, Men donishmandlaringni halok qilarman, Esov togʻidagi[4] aql — idroklilarin yoʻq qilarman.

⁹Ey Temon shahri[5], jangchilaring dahshatga tushar, Esov togʻidagi har bir inson yoʻq qilinar.

¹⁰Sizlar qondoshingiz Yoqub avlodiga[6] zulm qilib, Ularni oʻldirdingiz. Shu bois to abad sharmanda boʻlib, Butunlay halok boʻlasiz.

¹¹Ularning boyliklarin begonalar olib ketgan kun Sizlar bir chetda qarab turdingiz. Yot xalqlar Quddus shahriga kirib[7], Shahar uchun qur’a tashlaganlarida, Sizlar ham ular kabi yovuz ishlar qildingiz.

¹²Qondoshlaringizga kelgan baxtsizlikni koʻrib, Xushnud boʻlmasligingiz kerak edi. Yahudo xalqi[8] xarob boʻlgan kun Sevinmasligingiz kerak edi. Boshlariga tushgan kulfatni koʻrib, Mazax qilmasligingiz kerak edi.

¹³Mening xalqimga falokat kelgan kuni Shahar darvozalaridan kirmasligingiz kerak edi. Yahudo xalqining boshiga falokat tushgan kuni, Xushnud boʻlganlarga qoʻshilmasligingiz kerak edi. Ularning boshiga falokat tushgan kuni, Buyumlarini oʻljaga olmasligingiz kerak edi.

¹⁴Qochib ketayotganlarni kutib chorrahalarda, Pistirmalar qoʻymasligingiz kerak edi. Oʻsha kulfat kuni tirik qolganlarni Dushman qoʻliga bermasligingiz kerak edi.

¹⁵Men, Egangiz, barcha xalqlarni hukm qiladigan kun[9] yaqinlashib qoldi. Ey Edom xalqi! Nima qilgan boʻlsangiz boshqalarga, Oʻzingiz ham tusharsiz oʻsha koʻyga, Qilmishlaringiz qaytar oʻz boshingizga.

¹⁶Ey Yahudo xalqi[10], muqaddas togʻimda[11] Gʻazab sharobin[12] ichib boʻldingiz. Shu singari, barcha xalqlar ham Bu sharobdan toʻxtamasdan icharlar. Hech qachon yer yuziga kelmagan kabi, Ichib — ichib, yoʻq boʻlib ketarlar.

¹⁷Lekin Sion togʻida najot toparlar Isroil xalqining[13] omon qolganlari. Bu togʻ muqaddas boʻlar. Yoqub nasli haydab chiqarar yovlarini, Uning mulkini tortib olganlarni Va yana egallar oʻz yerlarini.

¹⁸Yoqub avlodi boʻlar olovday, Yusufning avlodi[14] bir alangaday. Esovning avlodi esa Boʻlib qolar quruq poyaday. Mening xalqim Isroil Esovning avlodini yondirar, Yondirib, ularni yoʻq qilar. Esov avlodidan tirik qolmas hech biri.” Zotan, bu soʻzlarni Egamiz aytdi.

¹⁹Isroil xalqining Nagav choʻlida yashaydiganlari Esov togʻini egallab oladilar[15], Yahudo qir etaklarida[16] yashaydiganlari esa Filistlarning yerlariga[17] egalik qiladilar. Isroil xalqi Efrayim yerlarini va Samariya shahrini qoʻlga kiritadi, Benyamin avlodi esa Giladga[18] egalik qiladi.

²⁰Shimoliy Isroildan asirlikka olib ketilganlar[19] qaytib keladi. Ular shimoldagi Zorafat shahrigacha[20] boʻlgan Finikiya yerlarini oladilar. Quddusdan Safaradga[21] asirlikka olib ketilganlar[22] esa Nagav choʻlidagi shaharlarni qoʻlga kiritadilar.

²¹Gʻoliblar Sion togʻiga chiqadilar. Oʻsha yerda turib, Esov togʻi ustidan hukmronlik qiladilar. Egamizning Oʻzi Shoh boʻladi.