Read Uzbek Muqaddas Kitob Yunus 2 Bible Online

Yunus 2 - Uzbek Muqaddas Kitob bible

Yunus 2

¹Yunusni yutsin deb, Egamiz nahang baliqni yubordi. Yunus uch kechayu uch kunduz baliq qornida qoldi.

²Yunus baliqning qornida ekan, oʻzining Egasi Xudoga shunday deb ibodat qildi:

³“Ey Egam, qaygʻuli damlarimda Senga qildim iltijo, Iltijolarimni Sen eshitding. Oʻliklar diyorining[6] qa’ridan faryod koʻtardim, Sen eshitding ovozlarimni.

⁴Meni otganding tubsiz chuqurga, Dengiz bagʻriga, Meni qurshab olgandi suvning girdobi. Sening toʻlqinlaring Oʻtgandilar ustimdan bosib.

⁵Sening huzuringdan Quvilganman, dedim oʻshanda, Lekin muqaddas Ma’badingni Yana koʻraman!

⁶Suvlar meni boʻgʻzimgacha koʻmgandi, Tubsiz dengiz atrofimni oʻradi. Dengiz oʻtlari boshimga oʻralib qoldi.

⁷Togʻlarning tubiga[7] choʻkkandim — Zanjirlari bilan to abad menga toʻsiq qoʻygan joyga[8]. Sen esa, ey Egam Xudo, Jonimni oʻsha joydan qutqarding!

⁸Ey Egam, hayotim onlari tugay deganda, Men Seni esladim. Iltijolarim Sengacha, Muqaddas Ma’badinggacha yetib bordi.

⁹Soxta, bema’ni butlarga sigʻinadiganlar Senga boʻlgan sadoqatidan voz kechdilar!

¹⁰Men esa shukrona aytib, Senga qurbonlik keltiraman. Atagan nazrlarimni ado etaman. Ey Egam, najot faqat Sendandir!”

¹¹Egamiz shundan keyin nahang baliqqa amr bergan edi, nahang baliq Yunusni quruqlikka chiqarib qoʻydi.