Read Uzbek Muqaddas Kitob Yunus 3 Bible Online

Yunus 3 - Uzbek Muqaddas Kitob bible

Yunus 3

¹Yunusga Egamiz ikkinchi marta shu soʻzlarni ayon qildi:

²“Qani, boʻl, qudratli Naynavo shahriga[9] borib, Mening soʻzlarimni jar solib u yerdagilarga e’lon qil.”

³Yunus Egamizning amriga boʻysunib, Naynavo tomonga ketdi. Naynavo juda katta shahar boʻlib, uni aylanib chiqishga uch kun vaqt ketardi.

⁴Yunus shahar boʻylab bir kun yoʻl yurib oʻtdi. U aylanib yurib: “Yana qirq kundan keyin Naynavo xarob boʻladi”, deb jar soldi.

⁵Naynavoliklar Xudoga ishonib, roʻza tutamiz, deb e’lon qildilar. Shahardagi kattayu kichik tavba qilib qanorga oʻrandi[10].

⁶Bu xabar Naynavo shohiga ham yetib bordi. U taxtdan tushib, shohona liboslarini yechdi, qanorga oʻranib, kulga oʻtirdi.

⁷Oʻzi va amaldorlari nomidan butun Naynavo boʻylab quyidagi farmonni e’lon qildi: “Na insonlar, na hayvonlar — mol — qoʻylar hech narsa yemasin, suv ichmasin.

⁸Insonlar ham, hayvonlar ham qanorga oʻransin. Har kim Xudoga yalinib iltijo qilsin, yovuz qilmishidan qaytsin, zulm qilmasin.

⁹Kim biladi, balki Xudo rahm qilib, bizga boʻlgan gʻazabini qaytarar, biz halok boʻlmasmiz.”

¹⁰Xudo ularning qilgan ishlarini, yovuz qilmishlaridan qaytganini koʻrib, rahm qildi va ularning ustiga “yuboraman”, deb aytgan ofatni yubormadi.