Read Uzbek Muqaddas Kitob Sahroda 10 Bible Online

Sahroda 10 - Uzbek Muqaddas Kitob bible

Sahroda 10

¹Egamiz Musoga aytdi:

²“Sen ikkita kumush karnay yasattir, karnaylar zarb urib yasalgan boʻlsin. Bu karnaylar jamoani yigʻish hamda yoʻlga chiqish vaqtini e’lon qilish uchun kerak boʻladi.

³Karnaylarning ikkalasi chalinganda, butun jamoa sening oldingga — Uchrashuv chodiri kiraverishi oldiga toʻplansin.

⁴Karnayning bittasi chalinganda esa, Isroil qabilalarining yoʻlboshchilari sening oldingga yigʻilib kelishsin.

⁵Karnay qisqa chalinganda, sharqdagi qarorgohda turgan qabilalar yoʻlga chiqishsin.

⁶Ikkinchi marta qisqa chalinganda esa, janubdagi qarorgohda turgan qabilalar yoʻlga chiqishsin. Karnayning qisqa sadosi yoʻlga chiqish kerakligini bildiradi[44].

⁷Jamoani yigʻish lozim boʻlganda esa, karnaylar boshqacha sado chiqarib chalinsin.

⁸Karnayni Horunning oʻgʻillari, ruhoniylar chalishlari lozim. Bu amr sizlar uchun va sizlarning avlodlaringiz uchun doimiy qonun — qoidadir.

⁹Yurtingizga bostirib kelgan dushmanga qarshi jangga otlanayotganingizda, xatardan darak berib karnaylarni chalinglar. Shunda Men, Egangiz Xudo, sizlarga yordam berib, sizlarni dushmanlaringiz qoʻlidan xalos qilaman.

¹⁰Shuningdek, xursandchilik kunlaringizda — belgilangan bayramlaringizda va oy boshida qurbonliklar kuydirganingizda hamda tinchlik qurbonliklarini keltirganingizda karnaylarni chalinglar. Shunda Men, Egangiz Xudo, sizlarga yordam beraman. Zotan, Men Egangiz Xudoman.”

¹¹Isroil xalqi Misrdan chiqqandan keyin, ikkinchi yilning ikkinchi oyi[45] yigirmanchi kunida bulut Muqaddas ahd chodiri[46] tepasidan koʻtarildi.

¹²Shundan soʻng Isroil xalqi Sinay sahrosidan yoʻlga chiqdi[47]. Nihoyat, bulut Poron choʻlida[48] toʻxtadi.

¹³Ular birinchi marta Egamizning Muso orqali bergan amriga koʻra, yoʻlga chiqqan edilar.

¹⁴Birinchi boʻlib, Ominadav oʻgʻli Naxshoʻn boshchiligida Yahudo qarorgohida turgan qabilalar oʻz bayrogʻi ostida guruh — guruh boʻlib yoʻlga chiqishdi.

¹⁵Issaxor qabilasiga Zuvor oʻgʻli Natanil boshchilik qilar edi.

¹⁶Zabulun qabilasiga Xalon oʻgʻli Eliyob boshchilik qilar edi.

¹⁷Shundan keyin Muqaddas chodir yigʻishtirib olindi. Gershon va Marori urugʻlari Chodirni koʻtarib, yoʻlga chiqishdi.

¹⁸Keyin Shaduvor oʻgʻli Elizur boshchiligida Ruben qarorgohida turgan qabilalar oʻz bayrogʻi ostida guruh — guruh boʻlib yoʻlga chiqishdi.

¹⁹Shimoʻn qabilasiga Zurishaday oʻgʻli Shalumiyol boshchilik qilar edi.

²⁰Gad qabilasiga Duvel oʻgʻli Eliasaf boshchilik qilar edi.

²¹Keyin Chodirning muqaddas ashyolarini koʻtargan Qohot urugʻi yoʻlga chiqdi. Ular qarorgoh quriladigan joyga yetib borgunlaricha, Muqaddas chodir oʻrnatib boʻlinishi kerak edi.

²²Keyin Omihud oʻgʻli Elishama boshchiligida Efrayim qarorgohida turgan qabilalar oʻz bayrogʻi ostida guruh — guruh boʻlib yoʻlga chiqishdi.

²³Manashe qabilasiga Padozur oʻgʻli Gamaliyol boshchilik qilardi.

²⁴Benyamin qabilasiga Gidoʻnax oʻgʻli Avidon boshchilik qilardi.

²⁵Eng oxirida Omishaday oʻgʻli Oxazar boshchiligida Dan qarorgohidagi qabilalar oʻz bayrogʻi ostida guruh — guruh boʻlib yoʻlga chiqishdi. Ular Isroil qarorgohlarining qorovullar boʻlinmasini tashkil qilishgan edi.

²⁶Osher qabilasiga Oxron oʻgʻli Paxiyol boshchilik qilardi.

²⁷Naftali qabilasiga Enan oʻgʻli Oxir boshchilik qilardi.

²⁸Isroil xalqi doim shu tartibda guruh — guruh boʻlib yoʻlga chiqar edi.

²⁹Muso oʻzining qaynagʻasi, Midiyonlik Yatro[49] oʻgʻli Xoʻvovga dedi: — Egamiz, sizlarga beraman, deb va’da qilgan yurtga biz ketyapmiz, siz ham biz bilan yuring. Egamiz bizga koʻp yaxshiliklarni va’da qilgan, agar biz bilan borsangiz, biz ham sizga yaxshilik qilamiz.

³⁰— Bormayman, — dedi Xoʻvov, — men oʻz yurtimga — oʻzimning qarindoshlarim oldiga qaytib ketaman.

³¹— Iltimos, bizni tashlab ketmang! — dedi unga Muso. — Sahroning qaysi joyiga chodir tikish kerakligini siz bilasiz. Siz bizning koʻzimiz boʻlasiz.

³²Agar biz bilan birga borsangiz[50], Egamiz bizga qilgan hamma yaxshiliklarni siz bilan baham koʻramiz.

³³Ular Egamizning muqaddas togʻini[51] tark etganlaridan soʻng, uch kun yoʻl yurishdi. Levilar chodir tikadigan joyini topish uchun Egamizning Ahd sandigʻini doimo oldinda koʻtarib borishardi.

³⁴Ular kunduz kuni yoʻl yurganlarida, Egamizning buluti ularning ustida borar edi.

³⁵Sandiq yoʻlga chiqqanda, Muso shunday derdi: “Qoʻzgʻal, ey Egam, Sening gʻanimlaring tumtaraqay boʻlsin. Seni koʻrolmaganlar oldingdan qochib ketsin.”

³⁶Ahd sandigʻi toʻxtaganda esa Muso shunday derdi: “Qayt, ey Egam, Ming — minglab Isroil xalqi orasiga!”