Read Uzbek Muqaddas Kitob Sahroda 13 Bible Online

Sahroda 13 - Uzbek Muqaddas Kitob bible

Sahroda 13

¹Shundan soʻng xalq Xazeroʻtdan yoʻlga chiqib, Poron choʻliga[64] kelib qarorgoh qurdi.

²Egamiz Musoga dedi:

³“Men Isroil xalqiga berayotgan Kan’on yurtiga aygʻoqchilar yubor. Har bir qabiladan bittadan yoʻlboshchini joʻnat.”

⁴Muso, Egamizning amriga muvofiq, qabila yoʻlboshchilarini Poron choʻlidan Kan’on yurtiga joʻnatdi.

⁵Ularning ismi quyidagichadir: Ruben qabilasidan — Zakkur oʻgʻli Shammuva.

⁶Shimoʻn qabilasidan — Xoʻri oʻgʻli Shofot.

⁷Yahudo qabilasidan — Yafunax oʻgʻli Xolib.

⁸Issaxor qabilasidan — Yusuf oʻgʻli Yixal.

⁹Efrayim qabilasidan — Nun oʻgʻli Xoʻsheya[65].

¹⁰Benyamin qabilasidan — Rofu oʻgʻli Palti.

¹¹Zabulun qabilasidan — Soʻdi oʻgʻli Gaddiyol.

¹²Yusuf qabilasidan, ya’ni Manashe qabilasidan — Susix oʻgʻli Gaddi.

¹³Dan qabilasidan — Gamali oʻgʻli Omiyol.

¹⁴Osher qabilasidan — Mikoyil oʻgʻli Satur.

¹⁵Naftali qabilasidan — Vofsi oʻgʻli Naxbi.

¹⁶Gad qabilasidan — Moxi oʻgʻli Guval.

¹⁷Muso Kan’on yurtiga aygʻoqchilikka yuborgan odamlarning ismi ana shulardir. Muso Nun oʻgʻli Xoʻsheyaning ismini oʻzgartirib, uni Yoshua deb atadi[66].

¹⁸Muso ularni Kan’on yurtiga aygʻoqchilikka yuborar ekan, shunday dedi: “Shimolga qarab yuringlar, Nagav choʻlini[67] aylanib chiqqaningizdan keyin, choʻldan shimolda joylashgan qirli yerlarni ham koʻrib chiqinglar.

¹⁹U yerlar qanday joy, u yerda yashayotgan xalq kuchlimi yoki zaifmi, koʻpmi yoki ozmi,

²⁰yurti yaxshimi yoki yomonmi, shaharlari devor bilan oʻralganmi yoki yoʻqmi,

²¹yerlari unumdormi yoki kamhosilmi, daraxtlari bormi yoki yoʻqmi, bilib kelinglar. Oʻsha yurtning mevalaridan olib kelishning ilojini qilinglar.” Uzum mavsumi endi boshlangan edi.

²²Shunday qilib, aygʻoqchilar shimolga qarab ketishdi. Zin choʻlidan boshlab, Levo — Xomat[68] yaqinidagi Rexob shahrigacha boʻlgan hamma joylarni koʻzdan kechirib chiqishdi.

²³Dastavval ular Nagav choʻlini kesib oʻtib, Xevron shahriga[69] borishgandi. Oʻsha yerda Onoq avlodidan kelib chiqqan[70] Oximan, Sheshay va Talmay urugʻlari yashashardi. Xevron Misrdagi Zoʻvan shahridan yetti yil oldin qurilgan edi.

²⁴U yerdan aygʻoqchilar Eshkoʻl soyligiga borib, bir bosh uzumni shoxi bilan qirqib olishgandi. Bu bosh uzumni ikki kishi xodaga osib koʻtarib ketgandi. Bundan tashqari, ular anor va anjirlardan ham olishgandi.

²⁵Aygʻoqchilar soylikdan bir bosh uzum qirqib olganlari uchun oʻsha soylikka Eshkoʻl[71] deb nom berildi.

²⁶Nihoyat, ular yurtni koʻrib chiqib, qirqinchi kuni qaytishdi.

²⁷Poron choʻlidagi Kadeshga[72] — Muso, Horun va butun Isroil jamoasi oldiga kelishdi. Ularga koʻrgan — bilganlarini aytib, oʻsha yurtning mevalarini koʻrsatishdi.

²⁸Ular Musoga shunday deb aytishdi: — Siz bizni yuborgan yurtga bordik, u yerda chindan ham sut va asal oqib yotibdi[73]. Mana bu mevalar oʻsha yerdan.

²⁹Lekin u yerning xalqlari kuchli, shaharlari mustahkam va nihoyatda ulkan ekan. Biz u yerda hatto Onoq avlodini[74] ham koʻrdik!

³⁰Omolek xalqi — Nagav choʻlida, Xet, Yobus va Amor xalqlari — qirlarda, Kan’on xalqi esa Oʻrta yer dengizi qirgʻoqlarida va Iordan daryosi boʻylarida istiqomat qilishar ekan.

³¹Xolib Musoning roʻparasida turgan xalqni tinchlantirib: — Boʻla qolinglar, oʻsha yurtga hujum qilib, uni egallab olaylik. Oʻsha yurtni bosib olishga albatta kuchimiz yetadi, — dedi.

³²Lekin Xolib bilan birga borganlar: — U xalqqa bas kela olarmidik?! Ular bizdan kuchliroq — ku! — deyishdi.

³³Shunday qilib, ular oʻzlari koʻrib kelgan yurt toʻgʻrisida Isroil xalqi orasida boʻlmagʻur mish — mishlar tarqata boshlashdi: “Biz koʻrib kelgan yurt u yerda yashashga boradiganlarni yutib yuborar ekan. Oʻsha yurtdagi hamma odamlar dev qomat ekan.

³⁴Biz u yerda hatto ulkan pahlavonlar[75] urugʻidan boʻlgan Onoq avlodini koʻrdik. Ularning oldida oʻzimizni xuddi chigirtkaday his qildik. Ha, ularning nazarida ham biz chigirtkaday edik.”