Read Uzbek Muqaddas Kitob Sahroda 2 Bible Online

Sahroda 2 - Uzbek Muqaddas Kitob bible

Sahroda 2

¹Egamiz Muso bilan Horunga yana dedi:

²“Isroil xalqining har bir qabilasi chodirlarini oʻz qarorgohida, oʻz xonadoni bayroqlari ostida joylashtirsin. Ular chodirlarini Uchrashuv chodirining aylanasiga, undan ma’lum bir masofada tikishsin.

³Uchrashuv chodirining sharq tomonida chodir tikadigan qabilalar Yahudo qarorgohida guruh — guruh boʻlib joylashsin. Yahudo qabilasining yoʻlboshchisi Ominadav oʻgʻli Naxshoʻndir.

⁴Uning sanoqqa kirgan sipohlari 74.600 tadir.

⁵Undan keyin Issaxor qabilasi chodirlarini joylashtirsin. Issaxor qabilasining yoʻlboshchisi Zuvor oʻgʻli Natanildir.

⁶Uning sanoqqa kirgan sipohi 54.400 tadir.

⁷Undan keyin esa Zabulun qabilasi chodirlarini joylashtirsin. Zabulun qabilasining yoʻlboshchisi Xalon oʻgʻli Eliyobdir.

⁸Uning sanoqqa kirgan sipohi 57.400 tadir.

⁹Yahudo qarorgohidagi sanoqqa kirgan sipohlarning hammasi 186.400 tadir. Birinchi boʻlib ular yoʻlga chiqishsin.

¹⁰Uchrashuv chodirining janub tomonida chodir tikadigan qabilalar Ruben qarorgohida guruh — guruh boʻlib joylashsinlar. Ruben qabilasining yoʻlboshchisi Shaduvor oʻgʻli Elizurdir.

¹¹Uning sanoqqa kirgan sipohlari 46.500 tadir.

¹²Uning yonida Shimoʻn qabilasi chodirlarini oʻrnashtirsin. Shimoʻn qabilasining yoʻlboshchisi Zurishaday oʻgʻli Shalumiyoldir.

¹³Uning sanoqqa kirgan sipohi 59.300 tadir.

¹⁴Keyin Gad qabilasi chodirlarini joylashtirsin. Gad qabilasining yoʻlboshchisi Duvel[7] oʻgʻli Eliasafdir.

¹⁵Uning sanoqqa kirgan sipohi 45.650 tadir.

¹⁶Ruben qarorgohidagi hisobga kirgan sipohlarning hammasi 151.450 tadir. Ikkinchi boʻlib ular yoʻlga chiqishsin.

¹⁷Dastlabki ikkita qarorgoh va keyingi ikkita qarorgoh oʻrtasida levilar Uchrashuv chodiri bilan birga yoʻlga chiqishsin. Qabilalar qay tartibda qarorgohda joylashgan boʻlsa, yana oʻsha tartibda yoʻlga chiqishlari lozim. Har biri oʻz oʻrnida, oʻz qarorgohi safida borsin.

¹⁸Uchrashuv chodirining gʻarb tomonida chodir tikadigan qabilalar Efrayim qarorgohida guruh — guruh boʻlib joylashsinlar. Efrayim qabilasining yoʻlboshchisi Omihud oʻgʻli Elishamadir.

¹⁹Uning sanoqqa kirgan sipohi 40.500 tadir.

²⁰Undan keyin Manashe qabilasi chodirlarini oʻrnashtirsin. Manashe qabilasining yoʻlboshchisi Padozur oʻgʻli Gamaliyoldir.

²¹Uning sanoqqa kirgan sipohlari 32.200 tadir.

²²Soʻngra Benyamin qabilasi chodirlarini joylashtirsin. Benyamin qabilasining yoʻlboshchisi Gidoʻnax oʻgʻli Avidondir.

²³Uning sanoqqa kirgan sipohlari 35.400 tadir.

²⁴Efrayim qarorgohidagi sanoqqa kirgan hamma sipohlar 108.100 tadir. Uchinchi boʻlib ular yoʻlga chiqishsin.

²⁵Uchrashuv chodirining shimol tomonida chodir tikadigan qabilalar Dan qarorgohida guruh — guruh boʻlib joylashsinlar. Dan qabilasining yoʻlboshchisi Omishaday oʻgʻli Oxazardir.

²⁶Uning sanoqqa kirgan sipohlari 62.700 tadir.

²⁷Uning yonida Osher qabilasi chodirlarini oʻrnashtirsin. Osher qabilasining yoʻlboshchisi Oxron oʻgʻli Paxiyoldir.

²⁸Uning sanoqqa kirgan sipohlari 41.500 tadir.

²⁹Soʻngra Naftali qabilasi chodirlarini oʻrnashtirsin. Naftali qabilasining yoʻlboshchisi Enan oʻgʻli Oxirdir.

³⁰Uning sanoqqa kirgan sipohlari 53.400 tadir.

³¹Dan qarorgohidagi sanoqqa kirgan hamma sipohlar 157.600 tadir. Ular guruh — guruh boʻlib oxirida yoʻlga chiqishsin.”

³²Shunday qilib, butun Isroil xalqi xonadonlari boʻyicha sanoqdan oʻtdi. Qarorgohlarda guruh — guruh boʻlib joylashgan lashkarning umumiy soni 603.550 ta chiqdi.

³³Musoga Egamiz amr etganday, Levi qabilasi Isroil xalqiga qoʻshib hisoblanmadi.

³⁴Xullas, Musoga Egamiz nima amr etgan boʻlsa, Isroil xalqi shuni qildi. Ular qarorgohi boʻyicha joylashgan, har biri oʻz urugʻi, xonadoni boʻyicha yoʻlga chiqqan edi.