Read Uzbek Muqaddas Kitob Sahroda 21 Bible Online

Sahroda 21 - Uzbek Muqaddas Kitob bible

Sahroda 21

¹Nagav choʻlida[109] istiqomat qilayotgan Arod shohi: “Isroil xalqi Otorim yoʻlidan kelayotgan ekan” degan xabarni eshitib, jangga otlandi. Kan’on naslidan boʻlgan bu shoh Isroil xalqi bilan jang qilib, ulardan bir nechtasini asir oldi.

²Bu voqeadan soʻng Isroil xalqi Egamizga qasam ichib, shunday dedi: — Ey Egamiz! Agar Sen shu xalqni bizning qoʻlimizga bersang, ularning hamma shaharlarini butunlay vayron qilamiz.

³Egamiz Isroil xalqining iltijosini eshitib, Kan’on xalqini ularning qoʻliga berdi. Ular Kan’onliklarni qirib tashlab, shaharlarini butunlay vayron qilishdi. Shuning uchun bu joyga Xoʻrmax[110] deb nom berildi.

⁴Isroil xalqi Xoʻr togʻini tark etib, Edom yerlarini chetlab oʻtish uchun Qizil dengizga[111] boradigan yoʻldan ketdi. Lekin xalq yoʻlda ketayotib, yana sabrsizlik qildi.

⁵Ular mingʻirlab Xudodan va Musodan noliy boshladilar: — Nimaga bizni Misrdan olib chiqdingizlar? Sahroda oʻlib ketishimiz uchunmi?! Bu yerda na non bor, na suv. Mana bu boʻlmagʻur manna me’damizga tegib ketdi — ku!

⁶Shu voqeadan keyin Egamiz xalq orasiga zaharli ilonlarni joʻnatdi, ilonlar Isroil xalqining koʻpchiligini chaqib oʻldirdi.

⁷Oxiri xalq Musoning oldiga kelib: — Biz Egamizga ham, senga ham qarshi gapirib gunoh qildik, — dedi, — Egamizga iltijo qil, U bizning oramizdan ilonlarni daf qilsin. Muso xalq uchun Egamizga iltijo qildi.

⁸Shunda Egamiz Musoga dedi: — Ilon yasab, uni xodaga mahkamlab qoʻy. Ilon chaqqan odam oʻshanga qarab tirik qoladi.

⁹Muso bronzadan ilonni yasab[112], uni xodaga mahkamlab qoʻydi. Ilon chaqqan odam bronzadan yasalgan ilonga qaraganda, oʻlmasdan tirik qolardi.

¹⁰Isroil xalqi safarini davom ettirib, Oboʻtda qarorgoh qurdi.

¹¹Soʻng ular Oboʻtdan ham ketib Ivay — Aborimga qoʻnishdi. Ivay — Aborim Moʻab yurtining sharqidagi sahroda joylashgan edi.

¹²U yerdan ham ketib, Zarad soyligida toʻxtashdi.

¹³Soʻng yana yoʻlga chiqib, Arnon soyligining shimoliy qirgʻogʻiga — Amor yurtining chegarasiga tutash boʻlgan sahroga joylashishdi. Arnon soyligi[113] Amor va Moʻab yurtlarining oʻrtasida chegara edi.

¹⁴Shu sababdan “Egamizning jangnomasi” kitobida[114] Sufa yerlaridagi Vohib shahri va soyliklar tilga olinadi. Shuningdek, Arnon soyligi

¹⁵va Moʻab chegarasidagi Or shahrigacha choʻzilgan daryoning irmoqlari eslanadi.

¹⁶Isroil xalqi u yerdan chiqib, Ber[115] degan joydagi quduqqa yoʻl oldi. Oʻsha quduq yonida Egamiz Musoga: “Xalqni yigʻ, Men ularga suv beraman”, dedi.

¹⁷Oʻshanda Isroil xalqi shu qoʻshiqni kuyladi: “Toʻlib — tosh, ey quduq, Quduq haqida kuylang!

¹⁸Yoʻlboshchilar qazigandi bu quduqni, Asilzodalar kovlagandi bu quduqni Saltanat hassalari[116] ila, Saltanat tamgʻalari ila.” Soʻng ular sahrodan Mattono shahriga yoʻl oldilar.

¹⁹Mattonodan esa Nahaliyolga, Nahaliyoldan Bomoʻtga,

²⁰Bomoʻtdan Moʻab yerlaridagi vodiyga borishdi. Fisgax togʻ tizmasi[117] yonidagi bu vodiydan sahroning manzarasi ochilardi.

²¹Keyin Isroil xalqi Amor xalqining shohi Sixoʻnga shu gapni aytish uchun choparlar joʻnatdi:

²²“Bizga yurtingiz orqali oʻtib ketishga ijozat bersangiz. Biz ekinzorlaringizga, uzumzorlaringizga kirmaymiz, quduqlaringiz suvidan ichmaymiz. Sizning yurtingizdan oʻtib ketguncha, faqat Shoh yoʻlidan[118] yuramiz.”

²³Lekin Sixoʻn Isroil xalqiga oʻz yurtidan oʻtib ketishga ijozat bermadi. U jamiki lashkarini yigʻib, sahrodagi Yaxaz shahri yonida Isroil xalqiga hujum qildi.

²⁴Jangda Isroil xalqi Sixoʻnni magʻlub etdi va Arnon soyligidan tortib, Yavoq daryosigacha[119] boʻlgan hamma yerlarini egallab oldi. Lekin Ommon xalqining chegarasidan u yogʻiga oʻtmadi, chunki Ommon yurtining chegarasi mustahkam edi.

²⁵Isroil xalqi Amor xalqining hamma shaharlarini, xususan, Xashbon shahri[120] va uning atrofidagi qishloqlarni bosib olib, oʻsha shaharlarda oʻrnashib oldi.

²⁶Xashbon shahri Amor shohligining poytaxti edi. Amor shohi Sixoʻn Moʻabning oldingi shohi bilan jang qilib, uning Arnon soyligigacha boʻlgan hamma yerlarini bosib olgan edi.

²⁷Shuning uchun dostonchilar aytishardi: “Xashbonga kelinglar, qayta quringlar uni, Mustahkam etinglar Sixoʻn shahrini.

²⁸Olov chiqib ketdi — ku Xashbon shahridan, Alanga chiqdi shoh Sixoʻnning shahridan. Yongʻin yakson qildi Moʻabdagi Or shahrini, Yoʻq qildi Arnon qirlari shohlarini.

²⁹Holingga voy, ey Moʻab xalqi! Tamom boʻldingiz, Xamoʻsh[121] ixlosmandlari! Xamoʻsh qochqin qildi oʻgʻillaringizni, Amor xalqining shohi Sixoʻnga asir qildi Sizning qiz — juvonlaringizni.

³⁰Qirib tashladik biz ularni, Xashbondan Dibonga qadar yoʻq qildik hammasini. Noʻfaxdan Midavoga qadar xonavayron qildik ularni.”

³¹Shunday qilib, Isroil xalqi Amor xalqining yurtida oʻrnashib oldi.

³²Muso Yazir shahriga aygʻoqchilar joʻnatdi. Isroil xalqi Yazir va uning atrofidagi qishloqlarni bosib olib, u yerda istiqomat qilayotgan Amor xalqini haydab chiqardi.

³³Soʻng ular Bashan oʻlkasiga[122] yoʻl olishdi. Bashan shohi Oʻg jamiki lashkarini boshlab, Edrey shahri yaqinida Isroil xalqi bilan jang qilgani chiqdi.

³⁴Shunda Egamiz Musoga dedi: — Oʻgdan qoʻrqma. Men uning oʻzini, lashkarini va butun yurtini sening qoʻlingga berganman. Sen Oʻgning boshiga Xashbonda hukmronlik qilgan Amor xalqining shohi Sixoʻnning kunini solasan.

³⁵Isroil xalqi Oʻgni, uning oʻgʻillarini, butun xalqini bitta qoldirmay qirib tashladi. Soʻng ular Oʻgning yurtini qoʻlga kiritishdi.