Read Uzbek Muqaddas Kitob Sahroda 23 Bible Online

Sahroda 23 - Uzbek Muqaddas Kitob bible

Sahroda 23

¹Balom Boloqqa dedi: — Shu yerda men uchun yettita qurbongoh qurib, yettita buqa va yettita qoʻchqorni tayyorlab qoʻy.

²Boloq Balom aytganday qildi. Soʻng ikkovlari har bir qurbongohda bittadan buqa va bittadan qoʻchqorni qurbonlik qilishdi.

³Keyin Balom Boloqqa dedi: — Sen kuydirilgan qurbonliklaring yonida qol, men esa borib koʻray, Egamiz menga peshvoz chiqarmikin. U menga nimani ayon qilsa, shuni senga aytaman. Balom tepalikka chiqdi.

⁴Xudo Balom bilan uchrashgach, Balom Xudoga dedi: — Men yettita qurbongoh qurdirib, har bir qurbongohda bittadan buqa va bittadan qoʻchqorni qurbonlik qildim.

⁵Egamiz Balomning ogʻziga soʻz solib: — Boloqning oldiga qaytib bor, unga Men aytgan soʻzlarimni yetkaz, — dedi.

⁶Balom Boloqning oldiga qaytib keldi. Boloq hamma Moʻab a’yonlari bilan birga kuydirilgan qurbonliklarning yonida turgan edi.

⁷Balom quyidagicha bashorat qildi: “Meni Moʻab shohi Boloq sharqiy togʻlardan, Oramdan[125] olib kelib, dedi: «Kel, men uchun Yoqub naslini la’natla, Kel, Isroil xalqini sen qargʻa!»

⁸Xudo la’natlamaganni men qanday la’natlayin?! Egamiz qargʻamaganni qanday qilib qargʻayin?!

⁹Qoyaning tepasida turib men ularni koʻryapman, Tepalikdan ularga qarab turibman, Yashaydi bu xalq hammadan alohida. Oʻzgachadir ular xalqlar orasida.

¹⁰Qumday son — sanoqsiz boʻlgan Yoqub naslini kim sanab chiqar?! Isroilning choragini kim hisoblab chiqa olar?! Men ham solih inson boʻlib olamdan oʻtay, Iloyim, boʻlsin ularnikiday oxiratim baxayr.”

¹¹— Sen nima qilyapsan oʻzi? — dedi Boloq Balomga. — Men seni, dushmanlarimni la’natlaydi deb, chaqirtirib kelgan edim, sen esa ularni duo qilyapsan — ku!

¹²— Men faqat Egamiz ogʻzimga solgan soʻzni aytishim kerak — ku! — deb javob berdi Balom.

¹³— Kel, men bilan birga boshqa joyga bora qol, — dedi Balomga Boloq. — Sen oʻsha joydan Isroil xalqining bir qismini koʻrasan. Oʻsha joydan turib Isroilni men uchun la’natla.

¹⁴Boloq Balomni Fisgax togʻ tizmasi[126] tepasidagi Zoʻfim degan yassi joyga boshlab keldi. U yerda ham yettita qurbongoh qurib, har bir qurbongoh ustida bittadan buqa va bittadan qoʻchqorni qurbonlik qildi.

¹⁵Soʻng Balom Boloqqa dedi: — Sen shu yerda — kuydirilgan qurbonliklaring yonida qol, men esa hov anavi yerga borib, Egamiz bilan uchrashib kelaman.

¹⁶Egamiz Balomga peshvoz chiqib, uning ogʻziga soʻz soldi. Soʻng: — Boloqning oldiga qaytib bor, unga Men aytgan soʻzlarimni ayt, — dedi.

¹⁷Balom Boloqning oldiga qaytib keldi. Boloq Moʻab a’yonlari bilan birga kuydirilgan qurbonliklarning yonida turgan edi. — Egang nima dedi? — deb soʻradi undan Boloq.

¹⁸Balom quyidagicha bashorat qildi: “Menga qara, ey Zippur oʻgʻli Boloq, Gaplarimni eshit, yaxshilab solgin quloq.

¹⁹Xudo inson emaski, U yolgʻon gapirsa, U odam emaski, fikrini oʻzgartirsa. U doim va’dasi ustidan chiqar! Oʻz aytganlarin albatta bajarar!

²⁰Xudo menga berdi duo soʻzlarini, Oʻzgartira olmayman men Xudoning barakasini.

²¹Men Isroilning kelajagini koʻryapman, Yoqub nasli boshiga kulfat tushmas, Bu xalq biror koʻrgilik koʻrmas. Egasi Xudo ularning orasida, Shoh, deya olqishlar Uni hamma.

²²Yovvoyi buqaning kuchi bilan Xudo ularni Misrdan olib chiqqan.

²³Yoqub nasliga hech qanday sehr — jodu ta’sir qilmaydi, Isroilga qarshi folbinlik aslo oʻtmaydi[127]. Odamlar Yoqub nasli haqida, Isroil toʻgʻrisida: «Qaranglar, Xudo nimalarni qilgan», deb aytishar.

²⁴Isroil xalqi sher kabi qoʻzgʻalar, Arslonday sakrab turar, Oʻljasini yeb bitirmaguncha, Qurbonlarning qoniga toʻymaguncha yotmas.”

²⁵Shundan soʻng Boloq Balomga aytdi: — Isroil xalqini la’natlamagin ham, duo ham qilmagin!

²⁶Lekin Balom Boloqqa: — Men sizga, faqat Egamizning aytganini qilaman, deb aytmaganmidim?! — dedi.

²⁷— Yur, endi men seni boshqa joyga olib boraman, — dedi Boloq. — Balki shunda Xudo mamnun boʻlib, oʻsha yerdan turib men uchun Isroilni la’natlashingga yoʻl qoʻyar.

²⁸Boloq Balomni Piyor togʻining[128] tepasiga boshlab olib chiqdi. Bu togʻdan sahroning manzarasi koʻrinib turardi.

²⁹Balom Boloqqa dedi: — Shu yerda menga yettita qurbongoh qurib, yettita buqa bilan yettita qoʻchqorni tayyorlab qoʻy.

³⁰Boloq Balom aytganday qilib, har bir qurbongohda bittadan buqa va bittadan qoʻchqorni qurbonlik qildi.