Read Uzbek Muqaddas Kitob Sahroda 24 Bible Online

Sahroda 24 - Uzbek Muqaddas Kitob bible

Sahroda 24

¹Balom Isroilni duo qilayotgani Egamizga ma’qul kelganini koʻrib, bu safar fol ochgani bormadi. U sahro tomon nazar tashlab,

²u yerda qabila — qabila boʻlib qarorgoh qurgan Isroil xalqini koʻrdi. Shunda Xudoning Ruhi Balomni qamrab oldi,

³Balom shunday bashorat qildi: “Bavoʻr oʻgʻli Balom gapiryapti, Koʻzi ochiq inson soʻzlayapti.

⁴Xudoning kalomini eshitgan, Qodir Xudodan kelgan vahiyni koʻrgan, Hushidan ayrilgan, lekin koʻzlari katta ochiq odam aytyapti.

⁵Ey Yoqub nasli! Chodirlaringiz qanday ajoyib! Ey Isroil xalqi! Makoningiz naqadar goʻzal!

⁶Chodiru makonlaringiz palmazor[129] singari bepoyon, Bamisoli daryo boʻyidagi bogʻ — rogʻlardir, Egamiz oʻtqazgan aloega oʻxshar, Suv boʻyidagi sadr daraxti kabidir.

⁷Ularning chelaklari suv bilan toʻlib — toshar, Ekkan urugʻlari miriqib suvga toʻyar. Isroil shohi Oʻgaxdan[130] ustun boʻlar, Isroil shohligi gʻoyat yuksalar.

⁸Yovvoyi buqaning kuchi bilan Xudo Misrdan olib chiqqan ularni. Isroil xalqi yamlamay yutar gʻanimlarini, Ularning suyaklarini maydalab tashlar, Oʻqlar otib, ularni yakson etar.

⁹Ana, u urgʻochi sherday egildi — da, yotdi. Uni turgʻizishga kim jur’at etar?! Seni duo qilganlar baraka topar, Seni la’natlaganlar la’nati boʻlar!”

¹⁰Boloq Balomdan qattiq gʻazablanganidan kaftini kaftiga urib: — Men seni, gʻanimlarimni la’natlagin deb, chaqirtirgan edim. Sen esa ularni uch marta duo qilding! — deb doʻq urdi.

¹¹— Yoʻqol! Uyingga joʻna! Men seni mukofotlamoqchi edim, lekin Egang seni mukofotdan mahrum qildi.

¹²Shunda Balom Boloqqa dedi: — Mening oldimga joʻnatgan choparlaringga aytmaganmidim:

¹³“Boloq menga saroyidagi hamma oltinu kumushini bersa ham, men Egamizning aytganidan chetga chiqa olmayman. Oʻz ixtiyorim bilan biror yaxshi yoki yomon ish qilolmayman. Egamiz menga nima desa, shuni aytaman”, deb?!

¹⁴Endi men oʻz xalqim oldiga qaytib ketaman. Lekin ketishimdan oldin, Isroil xalqi kelajakda xalqing boshiga qanday kunlarni solishini senga aytib qoʻyay.

¹⁵Shundan soʻng Balom quyidagicha bashorat qildi: “Bavoʻr oʻgʻli Balom gapiryapti, Koʻzi ochiq inson soʻzlayapti.

¹⁶Xudoning kalomini eshitgan, Xudoyi Taolodan ilmu ma’rifat olgan, Qodir Xudoning vahiyini koʻrgan, Hushidan ayrilgan, lekin koʻzlari katta ochiq odam aytyapti.

¹⁷Uni koʻryapman — u, lekin shu topda yoʻq, Unga qarayapman — u, lekin u yaqin emas. Bir yulduz chiqar Yoqub naslidan, Saltanat hassasi[131] Isroil xalqidan. Vayron qilar u Moʻab chegaralarini[132], Yakson etar Shet xalqining[133] yerlarini[134].

¹⁸Edom oʻljaga aylanar, Ha, Seir[135] gʻanimlarning mulki boʻlar, Isroil xalqi esa zafarni quchar.

¹⁹Yoqub naslidan hukmdor chiqar, Ir[136] xalqini tamom qirib tashlar.”

²⁰Soʻng Balom Omolek xalqini[137] koʻrib, ular haqida shunday bashorat qildi: “Xalqlarning sardoridir Omoleklar, Lekin oxiri abadiy halokatga yoʻliqar ular.”

²¹Keyin u Xayin xalqini koʻrib, ular haqida quyidagicha bashorat qildi: “Mustahkamdir sizning boshpanangiz, Togʻ choʻqqisida joylashgan sizning iningiz.

²²Oshur xalqi[138] sizni asir qilib olib ketajak, Shunda Xayin xalqi qirilib yoʻq boʻlajak.”

²³Balom yana bashoratini davom ettirdi: “Evoh! Xudo shu ishlarni amalga oshirgach, kim tirik qolar?!

²⁴Kiprdan[139] suzib kelar kemalar, Oshur va Ibir xalqlarini taslim etishar. Abadiy halokatga uchraydi ular.”

²⁵Shundan keyin Balom yoʻlga chiqib, uyiga joʻnadi. Boloq ham oʻz yoʻliga ketdi.