Read Uzbek Muqaddas Kitob Sahroda 25 Bible Online

Sahroda 25 - Uzbek Muqaddas Kitob bible

Sahroda 25

¹Isroil xalqi Shitimda[140] oʻrnashganda, Isroil erkaklari Moʻab ayollari bilan zino qila boshlashdi.

²Moʻab ayollari ularni oʻz xudolariga bagʻishlangan qurbonlik ziyofatlariga taklif etishdi. Isroil xalqi ularning qurbonligidan tanovul qilib, xudolariga ham sajda etdi.

³Isroil xalqi Piyor togʻidagi Baalga qattiq bogʻlanib qolgani uchun, Egamiz ulardan gʻazablandi.

⁴U Musoga shunday dedi: — Bu xalqning boshliqlarini ushla, ularni kuppa — kunduzi Men, Egangizning huzurida qatl qil, jasadlarini esa tik oʻrnatilgan xodaning uchiga qoqtir. Shunda Men Isroil xalqidan qahr — gʻazabimni qaytaraman.

⁵Muso Isroil hakamlariga[141]: — Piyordagi Baalga sajda qilgan har bir odamingizni oʻldiringlar, — deb buyruq berdi.

⁶Shu payt Isroil xalqidan bittasi Musoning va butun Isroil jamoasining koʻzi oldida qarorgohga Midiyonlik[142] bir ayolni boshlab kelib qoldi. Jamoa Uchrashuv chodiriga kiraverishda yigʻlab turgan edi.

⁷Ruhoniy Horunning nabirasi — Elazar oʻgʻli Finxaz buni koʻrdi — yu, oʻrnidan turib, jamoa orasidan chiqib ketdi. U nayzasini olib,

⁸Isroil xalqidan boʻlgan oʻsha odamning orqasidan chodirga kirdi — da, nayzasi bilan ikkovini ham oʻldirdi. Finxazning sanchgan nayzasi oʻsha odamning badanini teshib oʻtib, ayolning qorniga kirgan edi. Shundan keyingina Isroil xalqi orasidagi oʻlat toʻxtadi.

⁹Lekin oʻlatdan 24.000 odam oʻlib boʻlgan edi.

¹⁰Shunda Egamiz Musoga:

¹¹— Ruhoniy Horunning nabirasi — Elazar oʻgʻli Finxaz Mening qahr — gʻazabimni Isroil xalqidan qaytardi, — dedi. — Isroil xalqi orasida u Menga jon kuydirgani uchun, Men gʻazab ustida ularga qirgʻin keltirmadim.

¹²Sen unga ayt: Men Finxaz bilan alohida tinchlik ahdimni tuzaman.

¹³Bu ahdga muvofiq, Finxazning oʻzi va uning avlodi to abad ruhoniy boʻlishadi, chunki u oʻz Xudosiga — Menga jon kuydirib, qilgan ishi bilan Isroil xalqidan Mening gʻazabimni qaytardi.

¹⁴Midiyonlik ayol bilan birga oʻldirilgan Isroil odamining ismi Zimri boʻlib, Shimoʻn qabilasining urugʻboshisi Soluning oʻgʻli edi.

¹⁵Oʻldirilgan ayolning ismi esa Xozbi edi, u Midiyonliklarning urugʻboshisi Zurning qizi edi.

¹⁶Egamiz Musoga:

¹⁷— Midiyon xalqini dushman deb bilinglar, ularni qirib tashlanglar! — dedi.

¹⁸— Chunki ular sizlarga dushmanlik qilib, Piyordagi voqea orqali sizlarni yoʻldan ozdirishdi. Bundan tashqari, Piyorda oʻlat hukmronlik qilgan kuni oʻlgan Midiyonlik yoʻlboshchining qizi Xozbi orqali sizlarni aldashdi.