Read Uzbek Muqaddas Kitob Sahroda 26 Bible Online

Sahroda 26 - Uzbek Muqaddas Kitob bible

Sahroda 26

¹Oʻlatdan soʻng Egamiz Muso bilan ruhoniy Horun oʻgʻli Elazarga dedi:

²“Jamiki Isroil xalqining urushga yaroqli boʻlgan yigirma va undan yuqori yoshdagi hamma erkaklarini xonadoni boʻyicha sanab chiqinglar.”

³Bu paytda Isroil xalqi Moʻab tekisligida, Yerixo shahri roʻparasidagi Iordan daryosi boʻyida qarorgoh qurgan edi. Muso bilan ruhoniy Elazar xalqqa:

⁴“Egamiz bizga amr qilganday yigirma yoshdan yuqori boʻlgan erkaklarini sanab chiqinglar”, deb aytishdi. Misr yurtidan chiqqan jamiki Isroil xalqining roʻyxati quyidagicha edi:

⁵Ruben Isroilning[143] toʻngʻichidir. Ruben oʻgʻillaridan kelib chiqqan urugʻlar mana shulardir: Xanoʻxdan Xanoʻx urugʻi, Palluvdan Palluv urugʻi,

⁶Xazrondan Xazron urugʻi, Karmidan Karmi urugʻi kelib chiqqan.

⁷Ruben urugʻlari mana shulardan iboratdir. Ular sanalganda, 43.730 kishi chiqdi.

⁸Palluvning Eliyob degan oʻgʻli bor edi,

⁹Eliyobning esa Namuvol, Datan va Aburam degan oʻgʻillari bor edi. Datan va Aburam Isroil yoʻlboshchilari edi. Koʻraxning izdoshlari Egamizga qarshi isyon koʻtarishganda[144], Datan va Aburam ham ularga qoʻshilishib, Muso bilan Horunga qarshi bosh koʻtargan edilar.

¹⁰Yer yorilib, Koʻrax bilan birga ularni ham yutib yuborgandi. Oʻsha kuni alanga Koʻraxning 250 nafar izdoshini kuydirib yoʻq qilgandi. Mana shu voqea xalqqa ogohlantirish edi.

¹¹Lekin Koʻraxning oʻgʻillari oʻsha kuni omon qoldi.

¹²Shimoʻn oʻgʻillaridan kelib chiqqan urugʻlar shulardir: Namuvoldan Namuvol urugʻi, Yomindan Yomin urugʻi, Yoxindan Yoxin urugʻi,

¹³Zeraxdan Zerax urugʻi, Shovuldan Shovul urugʻi kelib chiqqan.

¹⁴Shimoʻn urugʻlari mana shulardan iboratdir. Ular sanalganda, 22.200 kishi chiqdi.

¹⁵Gad oʻgʻillaridan kelib chiqqan urugʻlar shulardir: Zafoʻndan Zafoʻn urugʻi, Xagidan Xagi urugʻi, Shunodan Shuno urugʻi,

¹⁶Oznaxdan Oznax urugʻi, Yeridan Yeri urugʻi,

¹⁷Aroʻddan Aroʻd urugʻi, Eralidan Erali urugʻi kelib chiqqan.

¹⁸Gad urugʻlari mana shulardan iboratdir. Ular sanalganda, 40.500 kishi chiqdi.

¹⁹Yahudo oʻgʻillaridan kelib chiqqan urugʻlar shulardir: Shelodan Shelo urugʻi, Parazdan Paraz urugʻi, Zeraxdan Zerax urugʻi kelib chiqqan. Yahudoning ikki oʻgʻli Gʻur va Oʻnan Kan’on yurtida olamdan oʻtgan edilar[145].

²⁰

²¹Parazdan kelib chiqqan urugʻlar shulardir: Xazrondan Xazron urugʻi, Xomuldan Xomul urugʻi kelib chiqqan.

²²Yahudo urugʻlari mana shulardan iboratdir. Ular sanalganda, 76.500 kishi chiqdi.

²³Issaxor oʻgʻillaridan kelib chiqqan urugʻlar shulardir: Toʻlodan Toʻlo urugʻi, Puvaxdan Puvax urugʻi,

²⁴Yoshuvdan Yoshuv urugʻi, Shimrondan Shimron urugʻi kelib chiqqan.

²⁵Issaxor urugʻlari mana shulardan iboratdir. Ular sanalganda, 64.300 kishi chiqdi.

²⁶Zabulun oʻgʻillaridan kelib chiqqan urugʻlar shulardir: Sareddan Sared urugʻi, Eloʻndan Eloʻn urugʻi, Yaxliyoldan Yaxliyol urugʻi kelib chiqqan.

²⁷Zabulun urugʻlari mana shulardan iboratdir. Ular sanalganda, 60.500 kishi chiqdi.

²⁸Yusufning oʻgʻillari Manashe va Efrayimdan kelib chiqqan urugʻlar quyidagilardir:

²⁹Manashedan kelib chiqqan urugʻlar shulardir: Moxirdan Moxir urugʻi kelib chiqdi. Gilad urugʻi Moxirning oʻgʻli Giladdan kelib chiqqan.

³⁰Giladdan kelib chiqqan urugʻlar quyidagichadir: Yazardan Yazar urugʻi, Xalekdan Xalek urugʻi,

³¹Osriyoldan Osriyol urugʻi, Shakamdan Shakam urugʻi,

³²Shamidodan Shamido urugʻi, Xaferdan Xafer urugʻi kelib chiqqan.

³³Xafer oʻgʻli Zalofxodning oʻgʻli yoʻq, qizlari bor edi, xolos. Zalofxod qizlarining ismlari Maxlo, Nuvah, Xoʻglax, Milxo va Tirza edi.

³⁴Manashe urugʻlari mana shulardan iboratdir. Ular sanalganda, 52.700 kishi chiqdi.

³⁵Efrayim oʻgʻillaridan kelib chiqqan urugʻlar shulardir: Shutalaxdan Shutalax urugʻi, Boxirdan Boxir urugʻi, Taxandan Taxan urugʻi kelib chiqqan.

³⁶Shutalax oʻgʻli Irondan Iron urugʻi kelib chiqqan.

³⁷Efrayim urugʻlari mana shulardan iboratdir. Ular sanalganda, 32.500 kishi chiqdi. Yusuf nasli ana shulardan iboratdir.

³⁸Benyamin oʻgʻillaridan kelib chiqqan urugʻlar shulardir: Belaxdan Belax urugʻi, Oshboldan Oshbol urugʻi, Oxiramdan Oxiram urugʻi,

³⁹Shafufamdan Shafufam urugʻi, Xufamdan Xufam urugʻi kelib chiqqan.

⁴⁰Belaxning oʻgʻillari Ard va Noʻmondan kelib chiqqan urugʻlar shulardir: Arddan Ard urugʻi, Noʻmondan Noʻmon urugʻi kelib chiqqan.

⁴¹Benyamin urugʻlari mana shulardan iboratdir. Ular sanalganda, 45.600 kishi chiqdi.

⁴²Dan oʻgʻli Xushimdan Xushim[146] urugʻi kelib chiqqan. Dan urugʻlari shulardan iboratdir:

⁴³butun Dan nasli Shuxom urugʻidan tashkil topgan edi. Ular sanalganda, 64.400 kishi chiqdi.

⁴⁴Osher oʻgʻillaridan kelib chiqqan urugʻlar shulardir: Yimnaxdan Yimnax urugʻi, Yishvidan Yishvi urugʻi, Bariyodan Bariyo urugʻi kelib chiqqan.

⁴⁵Bariyo oʻgʻillaridan kelib chiqqan urugʻlar shulardir: Xaberdan Xaber urugʻi, Malxiyoldan Malxiyol urugʻi kelib chiqqan.

⁴⁶Osherning Serax degan qizi ham bor edi.

⁴⁷Osher urugʻlari mana shulardan iboratdir. Ular sanalganda, 53.400 kishi chiqdi.

⁴⁸Naftali oʻgʻillaridan kelib chiqqan urugʻlar shulardir: Yaxziyoldan Yaxziyol urugʻi, Goʻnodan Goʻno urugʻi,

⁴⁹Izardan Izar urugʻi, Shillemdan Shillem urugʻi kelib chiqqan.

⁵⁰Naftali urugʻlari mana shulardan iboratdir. Ular sanalganda, 45.400 kishi chiqdi.

⁵¹Shunday qilib, Isroil xalqining hamma erkaklari sanalganda, 601.730 kishi chiqdi.

⁵²Egamiz Musoga dedi:

⁵³“Yerni odamlarning soniga qarab qabilalarga mulk qilib boʻlib ber.

⁵⁴Katta qabilaga kattaroq ulush ber, kichik qabilaga kichikroq ulush ber. Har bir qabilaga roʻyxatga olingan odamlarning miqdoriga qarab ulush berilsin.

⁵⁵Yerni qabilalarga roʻyxatdagi odamlarning soniga qarab boʻlib berayotganingizda, qur’a tashlanglar[147].

⁵⁶Har bir qabilaning ulushi qabilaning katta — kichikligiga qarab qur’a boʻyicha taqsimlansin.”

⁵⁷Levi qabilasining roʻyxati esa, urugʻlari boʻyicha, quyidagichadir: Gershondan Gershon urugʻi, Qohotdan Qohot urugʻi, Maroridan Marori urugʻi kelib chiqqan.

⁵⁸Bu urugʻlardan: Lubnax urugʻi, Xevron urugʻi, Maxli urugʻi, Mushi urugʻi, Koʻrax urugʻi kelib chiqqan. Qohot Imromning otasi edi.

⁵⁹Imromning xotini esa Yoʻxavad degan ayol edi. Yoʻxavad Levining qizi boʻlib, u Misrda tugʻilgan edi. Yoʻxavad Imromga ikki oʻgʻil — Horun va Musoni hamda bir qiz — Maryamni tugʻib berdi.

⁶⁰Horunning Nadov, Abihu, Elazar, Itamar degan oʻgʻillari bor edi.

⁶¹Nadov va Abihu Egamiz amr etmagan olovni Uning huzuriga olib kelganlari uchun nobud boʻlgan edilar[148].

⁶²Shunday qilib, Levi qabilasining bir oylik oʻgʻil bolalaridan tortib, katta yoshdagi erkaklarigacha sanalganda, 23.000 kishi chiqdi. Levilarga Isroil xalqi orasida ulush berilmagani uchun, ular Isroil xalqi qatorida roʻyxatga olinmagan edi.

⁶³Muso bilan ruhoniy Elazar Moʻab tekisligida, Yerixo shahri roʻparasidagi Iordan daryosi boʻyida roʻyxatga olgan Isroil xalqi ana shulardan iborat edi.

⁶⁴Muso bilan ruhoniy Horun Sinay sahrosida roʻyxatga olgan odamlarning birortasi bu roʻyxatga kirmadi,

⁶⁵chunki Egamiz Isroil xalqining oʻsha avlodiga: “Sizlar sahroda oʻlib ketasizlar”, deb aytgandi[149]. Ulardan faqat Natan oʻgʻli Xolib va Nun oʻgʻli Yoshua tirik qolgan edi.