Read Uzbek Muqaddas Kitob Sahroda 34 Bible Online

Sahroda 34 - Uzbek Muqaddas Kitob bible

Sahroda 34

¹Egamiz Musoga dedi:

²— Isroil xalqiga Mening shu gapimni yetkaz: “Kan’on yurtiga kirib borganingizdan keyin, sizlarga mulk qilib beriladigan bu yurt quyidagicha chegaralanadi:

³Yurtingizning janubiy qismi Zin choʻlidan Edom yurti boʻylab choʻziladi. Janubiy chegarangiz sharq tomonda Oʻlik dengizning[204] janubiy qirgʻogʻidan boshlanib,

⁴Chayonlar dovonidan[205] oʻtadi va janubga — Zin choʻli tomonga choʻziladi. Chegarangizning eng janubiy nuqtasi Kadesh — Barna boʻladi. U yerdan chegara Xazor — Adargacha borib, Ozmon orqali oʻtadi.

⁵Soʻng burilib, Misr chegarasidagi irmoq[206] boʻylab Oʻrta yer dengiziga borib taqaladi.

⁶Oʻrta yer dengizining qirgʻogʻi gʻarbiy chegarangizni tashkil qiladi.

⁷Shimoliy chegarangiz esa Oʻrta yer dengizidan sharqqa, Xoʻr togʻiga[207] tomon choʻziladi.

⁸Xoʻr togʻidan Levo — Xomatgacha[208] boradi, soʻng Zadoddan oʻtib,

⁹Zifroʻnga choʻzilib boradi va Xazor — Enanda toʻxtaydi. Bu sizning shimoliy chegarangiz boʻladi.

¹⁰Sharqiy chegarangiz shimoldagi Xazor — Enandan boshlanib, janub tomon Shafomga boradi,

¹¹soʻng yana janubga choʻzilib, Oyinning sharq tomonidagi Rivlodan oʻtadi va Jalila koʻlining[209] sharq tomonidagi qirlar boʻylab boradi.

¹²Soʻng chegara Iordan daryosi boʻylab janubga choʻzilib, Oʻlik dengizga borib toʻxtaydi. Har tomondan chegaralangan mana shu yerlar sizlarning yurtingiz boʻladi.”

¹³Shundan soʻng Muso Isroil xalqiga buyurdi: — Bu yurtni qur’a tashlab[210], boʻlib olinglar. Egamiz bu yurtni toʻqqizta qabilaga va bir qabilaning yarmiga boʻlib berishni amr etgan.

¹⁴Ruben, Gad qabilalari va Manashe qabilasining yarmi xonadonlari boʻyicha Yerixo shahrining roʻparasidagi Iordanning sharq tomonidan oʻzlariga tegishli mulkni olganlar.

¹⁶Egamiz Musoga yana aytdi:

¹⁷“Ruhoniy Elazar va Nun oʻgʻli Yoshua yurtni Isroil xalqiga boʻlib berishsin.

¹⁸Har bir qabiladan bittadan yoʻlboshchini ularga yordamchi qilib tayinlanglar.

¹⁹Oʻsha odamlarning ismlari quyidagichadir: Yahudo qabilasidan — Yafunax oʻgʻli Xolib.

²⁰Shimoʻn qabilasidan — Omihud oʻgʻli Shomuil.

²¹Benyamin qabilasidan — Xislon oʻgʻli Elidod.

²²Dan qabilasidan — Yoxli oʻgʻli Bukki.

²³Yusuf oʻgʻli Manashe qabilasidan — Efoʻd oʻgʻli Xanniyol.

²⁴Efrayim qabilasidan — Shifton oʻgʻli Kamuvol.

²⁵Zabulun qabilasidan — Parnoʻx oʻgʻli Elizofon.

²⁶Issaxor qabilasidan — Ozzon oʻgʻli Paltiyol.

²⁷Osher qabilasidan — Shalumi oʻgʻli Oxixud.

²⁸Naftali qabilasidan — Omihud oʻgʻli Padahiyol.”

²⁹Egamiz ana shu odamlarga, Isroil xalqiga Kan’on yurtini mulk qilib boʻlib beringlar, deb amr bergan edi.