Read Uzbek Muqaddas Kitob Sahroda 6 Bible Online

Sahroda 6 - Uzbek Muqaddas Kitob bible

Sahroda 6

¹Muso orqali Isroil xalqiga Egamiz quyidagi qonunlarni berdi: agar erkak yoki ayol ont ichib, oʻzini ma’lum bir muddatga Egamizga nazr sifatida bagʻishlashga[22] qaror qilgan boʻlsa,

³u sharob va oʻtkir ichimliklardan oʻzini tiysin. Uzum sirkasini ham, boshqa oʻtkir ichimliklarni ham iste’mol qilmasin. Uzumdan tayyorlangan biror ichimlikni zinhor ichmasin. Mayizni va uzumni hech ogʻziga olmasin.

⁴U oʻzini nazr qilgan davr mobaynida uzumdan tayyorlangan biror narsani iste’mol qilmasin, hatto uzumning doni va poʻstlogʻini ham ogʻziga olmasin.

⁵Oʻzi ont ichib, belgilagan davr mobaynida sochiga ham, soqoliga ham ustara tekkizmasin. U Egamizga bagʻishlanganligi uchun nazr qilingan kunlari tugagunga qadar sochlarini oʻstirib yursin.

⁶Soch oʻsha odamning Xudoga bagʻishlanganligi belgisidir. Shuning uchun oʻsha odam Egamizga nazr qilingan kunlari davomida murdaga yaqinlashmasin. Otasi, onasi, aka — ukasi yoki opa — singillaridan birortasi vafot etib qolganda ham, u murda yoniga borib oʻzini bulgʻamasin.

⁸Nazr qilingan kunlari davomida u Egamizga bagʻishlangandir.

⁹Bordi — yu, uning oldida kimdir toʻsatdan vafot etib qolsa, nazr qilingan odamning boshi harom boʻlgan hisoblanadi. Shuning uchun nazr qilingan odam yetti kundan keyin sochini oldirsin. Shunda u yana pok boʻladi.

¹⁰Sakkizinchi kuni esa Uchrashuv chodiri kiraverishiga ikkita kaptar yoki ikkita musichani olib kelib ruhoniyga bersin.

¹¹Ruhoniy bu qushlardan bittasini gunoh qurbonligi qiladi, ikkinchisini esa kuydiriladigan qurbonlik qiladi. Shunday qilib, murda tufayli harom boʻlgan oʻsha odamni gunohidan poklaydi. Nazr qilingan odam oʻsha kuniyoq oʻzini qaytadan Egamizga bagʻishlashi kerak.

¹²U bulgʻanganligi uchun oldingi kunlar hisobga kirmaydi. U Egamizga bagʻishlangan nazr kunlarini boshqatdan boshlashi lozim. Buning uchun u bir yoshli qoʻchqor qoʻzini ayb qurbonligi[23] qilsin.

¹³Nazr qilinganlar uchun qonun quyidagichadir: nazr qilingan odam Egamizga bagʻishlagan kunlari tugaganda, Uchrashuv chodiri kiraverishiga kelsin.

¹⁴U Egamizga atab quyidagi qurbonligu nazrlarni keltirsin: kuydiriladigan qurbonlik uchun bir yoshli nuqsonsiz qoʻchqor qoʻzini, gunoh qurbonligi uchun bir yoshli nuqsonsiz sovliq qoʻzini, tinchlik qurbonligi uchun nuqsonsiz qoʻchqorni,

¹⁵ularga qoʻshib qilinadigan don bilan sharob nazrini, bir savat xamirturushsiz nonni — zaytun moyi aralashtirilgan sifatli undan tayyorlangan nonlar va zaytun moyi surtilgan chalpaklarni.

¹⁶Ruhoniy bularning hammasini Egamizga taqdim qilib, gunoh qurbonligi va kuydiriladigan qurbonlik qilsin.

¹⁷Soʻng qoʻchqorni don va sharob nazri bilan birga Egamizga tinchlik qurbonligi qilsin. Shuningdek, savatdagi xamirturushsiz nonni ham keltirsin.

¹⁸Nazr qilgan odam Uchrashuv chodiriga kiraverishda nazr qilingan sochini oldirsin. Keyin sochlarini yigʻishtirib olib, tinchlik qurbonligi kuydirilayotgan olovga tashlasin.

¹⁹U sochini oldirib boʻlgandan soʻng, ruhoniy qoʻchqorning pishirilgan yelkasini, savatdan bir dona xamirturushsiz nonni, bitta chalpakni olib, nazr qilingan odamning qoʻliga tutqizsin.

²⁰Keyin ruhoniy oʻsha narsalarni Egamizga bagʻishlaganini koʻrsatib, yuqoriga koʻtarsin. Bu narsalar ruhoniyning muqaddas ulushi boʻladi. Bular — ruhoniy yuqoriga koʻtarishi uchun beriladigan qoʻchqor toʻshi va nazr qilingan qoʻchqor sonidan tashqari beriladi. Shundan soʻng nazr qilingan odam sharob ichishi mumkin.

²¹Nazr qilinganlar uchun qonun shundan iboratdir. Agar nazr qilingan odam Egamizga bulardan tashqari yana biron narsani va’da qilgan boʻlsa, bergan va’dasi ustidan chiqsin.

²²Egamiz Musoga dedi:

²³— Horun va uning oʻgʻillari Isroil xalqini duo qilganlarida, shunday deb aytishlari kerak:

²⁴“Egam senga baraka bersin, Seni Oʻz panohida asrasin!

²⁵Egam senga ochiq yuz bilan boqsin, Senga iltifot qilsin.

²⁶Egam senga nazarini solsin, Senga tinchlik ato etsin!”

²⁷Horun va uning oʻgʻillari Isroil xalqini Mening nomim bilan duo qilishsin[24]. Shunda Men Isroil xalqiga baraka beraman.