Read Uzbek Muqaddas Kitob Sahroda 9 Bible Online

Sahroda 9 - Uzbek Muqaddas Kitob bible

Sahroda 9

¹Isroil xalqi Misrdan chiqqandan keyin, ikkinchi yilning birinchi oyida[39] Egamiz Sinay sahrosida Musoga dedi:

²“Isroil xalqiga ayt, ular Fisih ziyofatini belgilangan vaqtda,

³shu oyning oʻn toʻrtinchi kuni kechqurun nishonlashsin. Bayramning hamma qonun — qoidalariga rioya qilishsin.”

⁴Shunday qilib, Muso Isroil xalqiga: “Fisih ziyofatini nishonlanglar”, deb buyruq berdi.

⁵Isroil xalqi birinchi oyning oʻn toʻrtinchi kuni kechqurun Sinay sahrosida Fisih ziyofatini nishonladi. Ular hamma narsani Egamizning Musoga bergan amri boʻyicha qilishdi.

⁶Biroq odam murdasiga tegib harom boʻlganlar oʻsha kuni Fisih ziyofatida ishtirok etisha olmadi. Ular oʻsha kuniyoq Muso bilan Horunning huzuriga kelib shunday deyishdi:

⁷— Biz murdaga tekkanimiz uchun harommiz. Lekin nima uchun biz chetda qolishimiz kerak? Biz ham, Isroil xalqi qatori, belgilangan vaqtda Egamizga qurbonlik keltirmoqchimiz!

⁸Muso ularga: — Kutib turinglar — chi, Egamiz sizlar toʻgʻringizda qanday amr berar ekan, eshitay, — dedi.

⁹Musoga Egamiz shunday dedi:

¹⁰— Isroil xalqiga Mening shu gapimni yetkaz: “Birortangiz yoki avlodlaringizdan kimdir murdaga tegib harom boʻlsa yoki safarga ketgan boʻlsa, Egamizga bagʻishlangan Fisih ziyofatini nishonlayversin.

¹¹Bunday odamlar bayramni ikkinchi oyning[40] oʻn toʻrtinchi kuni kechqurun nishonlab, qurbonlik[41] goʻshtini xamirturushsiz non va taxir oʻtlar bilan birga yeyishsin.

¹²Ertalabgacha taomdan qoldirishmasin. Qurbonlikning birorta suyagini sindirishmasin. Fisih ziyofatini hamma qonunlarga muvofiq nishonlashsin.

¹³Lekin bironta odam pok boʻlib, safarda boʻlmasa va shunga qaramay, Fisih ziyofatini nishonlashdan bosh tortsa, belgilangan vaqtda Egamizga bagʻishlab qurbonlik qilmagani uchun Isroil xalqi orasidan yoʻq qilinsin. Shunday qilib, u oʻz gunohi uchun jazosini tortadi.

¹⁴Orangizda yashayotgan musofir Egamizga bagʻishlangan Fisih ziyofatini nishonlamoqchi boʻlganda, oʻsha qonun — qoidalarga rioya qilishi shart. Hammangiz uchun — sizlar va musofirlar uchun qonun bitta boʻlsin.”

¹⁵Muqaddas chodir oʻrnatilgan kuni[42] Chodirni[43] bulut qoplab oldi. Oqshomdan ertalabgacha Muqaddas chodir tepasidagi oʻsha bulutning koʻrinishi alangaga oʻxshar edi.

¹⁶Har doim shu ahvol yuz berardi: Chodirni kunduzi bulut qoplab olar, tunda esa bulut alangaga oʻxshab turardi.

¹⁷Bulut Chodir tepasidan koʻtarilgach, Isroil xalqi yoʻlga chiqardi. Bulut toʻxtagan joyda esa Isroil xalqi chodir tikardi.

¹⁸Isroil xalqi Egamizning amri bilan yoʻlga chiqar va Egamizning amri bilan chodir tikardi. Bulut Muqaddas chodir tepasida turgan vaqt mobaynida, ular ham joylaridan siljimas edilar.

¹⁹Bulut Chodir tepasida uzoq kunlar turib qolganda ham, Isroil xalqi Egamizning talabiga rioya qilib, yoʻlga chiqmasdi.

²⁰Ba’zan esa bulut Chodir tepasida ozroq kun turardi. Bunday paytda ham Isroil xalqi Egamizning amriga muvofiq toʻxtardi, Uning amri bilan yoʻlga chiqardi.

²¹Ayrim vaqtlarda esa bulut Chodir tepasida bor — yoʻgʻi bir kechagina turib, ertalab koʻtarilar edi. Shunda Isroil xalqi ham yoʻlga chiqardi. Bulut koʻtarilgan payti, kechasi boʻladimi, kunduzi boʻladimi, Isroil xalqi ham yoʻlga chiqardi.

²²Ba’zan bulut ikki kun, bir oy yoki uzoqroq vaqt mobaynida Chodir tepasida turib qolardi. Shunda Isroil xalqi ham qarorgohda qolib, yoʻlga chiqmasdi. Bulut koʻtarilgandan soʻng Isroil xalqi yoʻlga chiqardi.

²³Ular Egamizning amri bilan toʻxtab, Uning amri bilan yoʻlga chiqishardi. Muso orqali Egamiz bergan amrlariga muvofiq hamma talablarni bajarishar edi.